Read መ/ቅዱስ ትግርኛ, Tigrigna Bible, 1 ምሳሌ 9 Bible Online

ምሳሌ 9 - መ/ቅዱስ ትግርኛ, Tigrigna Bible, 1 bible

ምሳሌ 9

¹ጥበብ ቤታ ሓነፀት፤ ሸውዓተ ኣዕማድውን ኣቖመትሉ።

²ሰባብሕታ ሓረደት፤ ወይና ፀመቘት፤ ማእዳውን ኣሰናደወት።

³ኣገልገልታ ናብቲ የመና ዝበረኸ ስፍራ ኸተማ ለኣኸት፤ ከምዙይ ኢላ ድማ ፀውዐት፦

⁴“ዘይለበመ እንተ ሃልዩ ናብዙይ ይምፃእ።” ኣእምሮ ንዝጐደሎም ከምዙይ በለት፦

⁵ንዑ፥ እንጀራይ ብልዑ፤ ዝፀመቝኩዎ ወይነይ ስተዩ።

⁶ብህይወት ክትነብሩስ ስንፍና ሕደጉ፤ ብመንገዲ ምስትውዓል ድማ ተመላለሱ።

⁷ንመላገፂ ዝምዕድ ንባዕሉ ፀርፊ ይቕበል፤ ንኽፉእ ዝግስፅ ከዓ ውርደት ይመፆ።

⁸ከይፀልአካስ፥ ንሰነፍ ኣይትገስፆ፤ ንለባም ገስፆ፥ ክፈትወካ እዩ።

⁹ንጥበበኛ መሃሮ፥ ጥበብ ክውስኽ እዩ፤ ንፃድቕ መሃሮ፤ ፍልጠት ክውስኽ እዩ።

¹⁰ ናይ ጥበብ መጀመርታ ንእግዚኣብሄር ምፍራሕ እዩ፤ ነቲ ቕዱስ ምፍላጥውን ምስትውዓል እዩ።

¹¹ዕለታትካ ብኣይ እየን ዝበዝሓ፤ ዓመታት ዕድሜኻውን ክውሰኻልካ እየን።

¹²ለባም እንተ ዄንካ፥ ንርእስኻ ትልብም፤ መላገፂ እንተ ዄንካ፥ በይንኻ ኢኻ እትሽከሞ።

¹³ሰነፍ ሰበይቲ ሁከተኛ እያ፤ ሓሳብ የብላን፥ ሓደኳ ዘይትፈልጥ እያ፤

¹⁴ንሳ ኣብ ደገ ቤታን፥ ኣብ በሪኽ ስፍራ ኸተማን፥ ኣብ መንበር ትቕመጥ።

¹⁵ነቶም ኣቕኒዖም ዝኸዱ ሓለፍቲ መንገዲ ኸዓ፥ ከምዙይ ኢላ ትፅውዖም፦

¹⁶“ኣቱም ዓያሹ፥ ንዑ እተዉ።” ነቲ ኣእምሮ ዘይብሉ ድማ፦

¹⁷“ናይ ስርቂ ማይ ጥዑም እዩ፤ ዝተሓብአ እንጀራውን ደስ የብል እዩ” ትብሎ።

¹⁸ንሱ ግና ምዉታት ኣብኡ ኸም ዘለዉ፥ ዕዱማታውን ኣብ መዓሙቕ ሲኦል ከም ዘለዉ ኣይፈልጥን እዩ።