Read መ/ቅዱስ ትግርኛ, Tigrigna Bible, 1 መሃልየ 8 Bible Online

መሃልየ 8 - መ/ቅዱስ ትግርኛ, Tigrigna Bible, 1 bible

መሃልየ 8

¹ንስኻ ኣበይሞ ጡብ ወላዲተይ ከም ዝጠበወ፥ ከም ሓወይ እንተ እትኾነለይ! ኣብ ወፃኢ እንትረኽበካ ምሰዓምኩኻ ነይረ፤ ሓደ እኳ ኣይምነዓቐንን ነይሩ።

²መሪሐ ናብ ቤት እኖይ መእተኹኻ፤ ኣብኡ ኸዓ ንስኻ ምመሃርካኒ፤ ኣነውን ካብ ዝተፀምቈ ጥዑም ወይነይን፥ ካብ ማይ ሮማነይን መስተኹኻ ነይረ።

³ፀጋመይቲ ኢዱ ምተተርኣስኩ፤ የማነይቱ ኸዓ ምሓቘፈትኒ ነይራ።

⁴ኣትን ኣዋልድ ኢየሩሳሌም፥ ፍቱወይ ክሳዕ ዝደሊ፥ ከይተተስአኦን ከይተበራብራኦን ኣምሕለክን ኣለኹ።

⁵እዛ፥ ፈታዊኣ ተደጊፋ፥ ካብ በረኻ እትድይብ ዘላ መን እያ? ኣብ ትሕቲ ኦም ምልዖ ኣንቃሕኹኻ፤ ኣብኡ እኖኻ ንኣኻ ኽትሓርስ ተፅዓረት፤ ኣብኡ እኖኻ ወለደትካ።

⁶ፍቕሪ ኸም ሞት ሓያል እያ፤ ቅንኣትውን ከም ሲኦል ጨካን እዩ፤ ረስና ኸም ሓዊ፥ ከም ሃልሃልታ ሓዊ እግዚኣብሄር እዩ እሞ፥ ከም ማሕተም ኣብ ልብኻ፥ ከም ማዕተብ ኣብ ቅልፅምካ ኣንብረኒ።

⁷ንፍቕርስ ብዙሕ ማይ እኳ ኸጥፍኣ ኣይኽእልን፤ ወሓይዝውን ኣየስጥሙዋን፤ ሰብ ምእንቲ ፍቕሪ ኢሉ፥ ኵሉ ጥሪት ቤቱ እንተ ዝህብ፥ ፈፂሞም ምነዓቕዎ።

⁸ጡብ ዘይብላ ንእሽተይ ሓፍቲ ኣላትና፤ ብዛዕባኣ ዝናገሩላ መዓልቲ፥ ንሓፍትና እንታይ ንግበረላ?

⁹ንሳ ቕፅሪ እንተ ኾነት፥ ኣብ ልዕሊኣ ግንቢ ብሩር ክንሰርሐላ ኢና፥ ኣፍ ደገ እንተ ኾነት ከዓ፥ ብፅሩብ ፅሕዲ ኽንከባ ኢና።

¹⁰ኣነ ቕፅሪ እየ፤ ኣጥባተይ ከዓ ኸም ግንቢ እየን፤ ኣብ ቅድሚ ኣዒንቱ ሰላም ከም እትረክብ ኮንኩ።

¹¹ንሰሎሞን ኣብ ብኤላሞን፥ ኣታኽልቲ ወይኒ ነበሮ፤ ነዝ ኣታኽልቲ ወይኒ እዙይ፥ ፍረኡ ንዝሕልዉ ብኽራይ ሃቦም፤ ኵሉ ሰብ ከዓ ኽንዲ ፍረኡ፥ ሽሕ ቅርሺ ብሩር የምፅአሉ ነበረ።

¹²ናተይ ዝኾነ ኣታኽልቲ ወይኒ ኣብ ቅድመይ እዩ፤ ኦ ሰሎሞን፥ ሽሕ ቅርሺ ብሩር ንኣኻ፥ ክልተ ሚእቲ ድማ ፍረኡ ንዝሕልዉ ይኹን።

¹³ኣቲ ኣብ ቦታ ኣታኽልትታት እትነብሪ ፍቕርተይ፥ እቶም ብፆተይ ንድምፅኺ የዳምፁ ኣለዉ እሞ፥ ድምፅኺ ኣስምዕኒ።

¹⁴ኣታ ፍቱወይ፥ ቀልጥፍ፤ ኣብቲ ምዑዝ ቀመም ዝበቝሎ እምባታት፥ ከም ሜዳቝ ወይ ከም ወጠጦ ሰስሓ ምሰል።