Read መ/ቅዱስ ትግርኛ, Tigrigna Bible, 1 ኢሳይያስ 60 Bible Online

ኢሳይያስ 60 - መ/ቅዱስ ትግርኛ, Tigrigna Bible, 1 bible

ኢሳይያስ 60

¹ብርሃንኪ መፂኡ እዩሞ፥ ክብሪ እግዚኣብሄር ከዓ ወፂኡልኪ እዩ እሞ፥ ተስኢ ኣብርሂ።

²እንሆ፥ ፀልማት ንምድሪ፥ ጣቓ ድማ ንኣህዛብ ከጐልብቦም እዩ፤ ንኣኺ ግና እግዚኣብሄር ክወፅእ፥ ክብሩውን ኣብ ልዕሌኺ ኽረአ እዩ።

³ህዝብታት ናብ ብርሃንኪ፥ ነገስታት ከዓ፥ ናብ ፀዳል ምብራቕኪ ኽመፁ እዮም።

⁴ኣዒንትኺ ኣልዒልኪ ናብ ዙርያኺ ጠምቲ፤ ኵሎም ተኣኪቦም፥ ናባኺ ይመፁ ኣለዉ፤ ኣወዳትኪ ኻብ ርሑቕ፥ ክመፁ እዮም፤ ንኣዋልድኪውን ኣብ ማእገሮም ተሰኪሞምወን፥ ናባኺ ኽመፁ እዮም።

⁵ሽዑ ምልኣት ሃብቲ ባሕሪ ናባኺ ኽምለስ፥ ሃብቲ ኣህዛብ ከዓ፥ ናባኺ ኽመፅእ እዩሞ፥ ርኢኺ ደስ ክብለኪ እዩ፤ ልብኺውን ክድነቕን ክሰፍሕን እዩ።

⁶ብዙሓት ኣግማል፥ ኣግማል ምድያምን ጌፌርን፥ ክሽፍኑኺ እዮም፤ ንምድርኺ ኽመልእዋ እዮም፤ እወ፥ ኵላቶም ወርቅን ዕጣንን ፅዒኖም፥ ካብ ሳባ ኽመፁ፥ ምስጋና እግዚኣብሄር ድማ፥ ክነግሩ እዮም።

⁷ኵላቶም መጓሰታት ቄዳር ናባኺ ኽእከቡ፥ ማጓሉ ነባዮትውን ከገልግሉኺ፥ ናባኺ ኽመፁ እዮም። ንኣይ ዘሐጕስ መስዋእቲ ኾይኖም ከዓ፥ ኣብቲ መሰውኢየይ ክወፁ እዮም፤ ኣነውን ንቤት ክብረይ፥ ከኽብር እየ።

⁸ርግቢታት ናብ ሰፈረን ከም ዝበራ፥ እዞም ከም ደመና ዝበሩ እዚኣቶም እንመን እዮም?

⁹ንሱ ኣኽቢሩኪ እዩሞ፥ ስለ ስም እግዚኣብሄር ኣምላኽኪን፥ ስለ እቲ ናይ እስራኤል ቅዱስን፥ ንደቅኺ ኻብ ርሑቕ ምስ ብሩሮምን ወርቆምን፥ ምእንቲ ኸምፅኣስ፥ ደሴታትን መራኽብ ተርሴስን፥ ኣቐዲመን ይፅበያ ኣለዋ።

¹⁰“ብቝጥዓይ ወቒዐኪ ነይረ፤ ሕዚ ግና ብርህራሀይ ምሒረኪ እየ እሞ፥ ደቂ መፃእተኛታት ንቕፅርኺ ኽነድቅዎ፥ ነገስታቶም ከዓ ኸገልግሉኺ እዮም።

¹¹ ሰባት ሃብቲ ኣህዛብ ምእንቲ ኸምፅኡልኪ፥ ነገስታቶም ድማ ተዓጂቦም ክኣትዉኽስ፥ ደገታትኪ ዅልሻዕ ኽፉት ክኸውን እምበር፥ ለይትን መዓልትን ኣይዕፆን እዩ።

¹²እቶም ዘይግዝኡኺ ህዝብታትን መንግስታትን ግና ኽጠፍኡ፥ እዞም ኣህዛብ እዚኣቶምውን ፈፂሞም ክጠፍኡ እዮም።”

¹³“ነታ ስፍራ ቤተ መቕደሰይ ምእንቲ ኽሽልምዋ፥ ካብቲ ኽብሪ ሊባኖስ ዝኾነ ዱር፥ ፅሕድን ዝግባን ኦም ሊባኖስን፥ ናባኺ ኽመፅእ እዩ፤ ኣነውን ነቲ መርገፂ እግረይ ዝኾነ ቦታ፥ ከኽብሮ እየ።

¹⁴ ደቂ እቶም ዝገፍዑኺ፥ ክሳዶም እናድነኑ ናባኺ ኽመፁ፥ እቶም ዝነዓቑኺ ዅሎም ድማ፥ ኣብ ትሕቲ ኣእጋርኪ፥ ፍግም ኢሎም፥ ክሰግዱልኪ እዮም እሞ፥ ‘ፅዮን፥ ከተማ እግዚኣብሄር፥ ናይቲ ናይ እስራኤል ቅዱስ’ ኢሎም ክፅውዑኺ እዮም።”

¹⁵“ሓደ እኳ ብኣኺ ዘይሓልፍ ሕድግትን ፅልእትን ነበርኪ፤ ኣነ ግና ዘለኣለማዊ መመክሒት፥ ናይ ትውልድታት ከዓ ደስታ ኽገብረኪ እየ።

¹⁶ፀባ ኣህዛብ ክትሰትዪ፥ ኣጥባት ነገስታት ከዓ ኽትጠብዊ ኢኺ፤ ሽዑ ኣነ እግዚኣብሄር መድሓኒኺ፥ እቲ ናይ ያእቆብ ሓያል፥ ተቤዛዊኺ ምዃነይ ክትፈልጢ ኢኺ።”

¹⁷“ክንዲ ነሃስ ወርቂ፥ ክንዲ ሓፂን ብሩር፥ ክንዲ ዕንፀይቲ ነሃስ፥ ክንዲ እምኒውን ሓፂን ከምፅአልኪ እየ፤ መራሕትኺ ‘ሰላም’፥ ገዛእትኺ ድማ ‘ፅድቂ’ ኽገብር እየ፤

¹⁸ድሕሪዙይ ዓመፅ ኣብ ምድርኺ፥ ጥፍኣትን ምዕናውን ኣብ ወሰንኪ፥ ኣይስማዕን እዩ፤ ግና ንቕፅርታትኪ ‘ድሕነት’ ንደገታትኪ ኸዓ፥ ‘ምስጋና’ ኢልኪ ኽትፅውዕየን ኢኺ።”

¹⁹ “ኣነ እግዚኣብሄር ዘለኣለማዊ ብርሃንኪ ክኾነልኪ፥ ኣምላኽኪ ድማ ኽብርኺ ክኸውን እዩሞ፥ ድሕሪዙይ ፀሓይ ብመዓልቲ፥ ብርሃንኪ ኣይትኸውንን፤ ወርሒ ኸዓ ብምድማቓ ኣይተብርሀልክን እያ።

²⁰መዓልቲታት ሓዘንኪ ኽውድኣ እየን፤ ኣነ እግዚኣብሄርውን ዘለኣለማዊ ብርሃንኪ፥ ክኸውን እየ እሞ፥ ድሕሪ ሕዚ ፀሓይኪ ኣይዓርብን፤ ወርሕኺውን ኣይጐድልን።

²¹ኵሎም ህዝብኺ ፃድቃን ክኾኑ፥ ነታ ምድሪ ኸዓ ንዘለኣለም ክወርስዋ እዮም፤ ንሳቶም ንኽብረይ ዝኸውን ጨንፈር ተኽለይ፥ ግብሪ ኣእዳወይ እዮም።

²²እቲ ንእሽተይ ንሽሕ፥ እቲ የመና ውሑድ ከዓ፥ ንብርቱዕ ህዝቢ ክኸውን እዩ። ኣነ እግዚኣብሄር ነዙይ ብጊዜኡ፥ ቀልጢፈ ኽገብሮ እየ።”