Read መ/ቅዱስ ትግርኛ, Tigrigna Bible, 1 ሰቆቃወ 3 Bible Online

ሰቆቃወ 3 - መ/ቅዱስ ትግርኛ, Tigrigna Bible, 1 bible

ሰቆቃወ 3

¹ኣሌፍ። ብበትሪ ቝጥዓኡ መከራ ዝረአየ ሰብ ኣነ እየ፤

²ንሱ ብርሃን ናብዘይብሉ፥ ናብ ፀልማት መሪሑ ወሰደኒ።

³ብርግፅ ኵሉ መዓልቲ ደጋጊሙ፥ ኢዱ ኣብ ልዕለይ መለሰ።

⁴ቤት። ንስጋይን ንቘርበተይን ኣእረጎ፤ ነዕፅምተይውን ሰባበሮ።

⁵ኣብ ልዕለይ ቅፅሪ ሰርሐ፤ ብሓሙትን ብድኻምን ከበበኒ።

⁶ከምቶም ቀደም ዝሞቱ፥ ኣብ ፀልማት ኣንበረኒ።

⁷ጋሜል። ከይወፅእ ብመንደቕ ከበበኒ፤ ንሞቝሐይውን ኣኽበዶ።

⁸ሓገዝ ደልየ እንተ ጠራዕኹን እንተ ኣእዌኹን እኳ፥ ንፀሎተይ መሕለፊ ዓፀወሉ።

⁹ንመንገደይ ብዝተፀርቡ ኣእማን ዓፀዎ፤ ንመንገድታተይ ጥውይዋይ ገበሮ።

¹⁰ዳሌጥ። ከም ዘድበየ ድቢ ተሓቢኡ ፀንሐኒ፤ ከም ዝፀናቶ ኣንበሳ ኾነኒ።

¹¹ንመንገደይ ለወጦ፤ ሰባበረኒ ኣዕነወኒ እውን።

¹²ቀስቱ ገተረ፤ ዕላማ ፍላፃኡ ኸዓ ገበረኒ።

¹³ሄ። ፍላፃታቱ ኻብ ሰገባኡ ኣውፂኡ፥ ኣብ ውሽጢ ኰላሊተይ ተኸሎ።

¹⁴መላገፂ ዅሉ ህዝበይ ኮንኩ፤ ምሉእ መዓልቲ መላገፂኣቶም ኮንኩ።

¹⁵መሪር ኣብልዐኒ፤ ዕረውን ኣፅገበኒ።

¹⁶ዋው። ነስናነይ ብፀፀር ሰበረን፤ ብሓመድውን ከደነኒ።

¹⁷ንነፍሰይ ካብ ሰላም ኣርሓቕካ፤ ነቲ ሰናይ ረሳዕኽዎ።

¹⁸ኣነ ኸዓ “ሓይለይን፥ ብእግዚኣብሄር ዝነበረኒ ተስፋን ጠፊኡ እዩ” በልኩ።

¹⁹ዛይ። መከራይን ሽግረይን፥ ምረትን ሓሞትን ዘክር።

²⁰ነፍሰይ እንተየቋረፀት ትዝክሮ ኣላ፤ ነፍሰይ ኣብ ውሽጠይ ተጨነቐት።

²¹ይኹን እምበር ነዙይ ኣብ ልበይ ኣንብሮ፤ ስለዙይ ድማ ተስፋ እገብር።

²²ሔት። ፈፂምና ዘይጠፋእናስ፥ ካብ ምሕረት እግዚኣብሄር ዝተልዓለ እዩ፤ ርህራሄኡ ኣይውዳእን እዩ እሞ።

²³ንግሆ ንግሆ ሓድሽ እዩ፤ ተኣማንነትካውን ብዙሕ እዩ።

²⁴ነፍሰይ፥ “ዕድለይ እግዚኣብሄር እዩ፤ ስለዙይ ብእኡ ተስፋ እገብር” ትብል ኣላ።

²⁵ጤት። እግዚኣብሄር ነቶም ብተስፋ ዝፅበይዎ፥ ነታ እትደልዮ ነፍሲ ሰናይ እዩ።

²⁶ሰብ ምድሓን እግዚኣብሄር፥ ብህድኣት ተስፋ እንተ ገበረ ሰናይ እዩ።

²⁷ንሰብ ብንእስነቱ ኣርዑት ምፅዋር ሰናይ እዩ።

²⁸ዮድ። እግዚኣብሄር ኣሰኪምዎ እዩ እሞ፥ ስቕ ኢሉ በይኑ ይቀመጥ።

²⁹ገና ተስፋ ዝኾኖ እንተ ኾይኑ፥ ኣፉ ኣብ ውሽጢ ሓመድ የንብር።

³⁰ንዝወቕዖ መልትሑ ይሃብ፤ ፀርፊውን ይፅገብ።

³¹ካፍ። እግዚኣብሄር ንሰብ፥ ንዘለኣለም ኣይድርብን እዩ እሞ፤

³²እንተ ኣሕዘነኳ፥ ከምቲ ብዝሒ ምሕረቱ ይርህርህ እዩ።

³³ፀገም ወይ መከራ፥ ኣብ ልዕሊ ሰብ ኣየምፅእን፤ ኣየጨንቕንውን።

³⁴ላሜድ። ኵሎም እሱራት እታ ምድሪ፥ ኣብ ትሕቲ እግሩ ንኽረግፆም፥

³⁵ኣብ ቅድሚ ልዑል፥ ንሰብ መሰሉ እንትገሃስ፥

³⁶ሰብ፥ ፍትሒ እንትጐድሎ፥ ጐይታ ኣይፈቅድን።

³⁷ሜም። እግዚኣብሄር ዘይኣዘዞ፥ ዝናገርን ዝፍፅምን መን እዩ?

³⁸ካብ ኣፍ ልዑል ክፉእ ይኹን ፅቡቕ ነገር ኣይወፅእንዶ?

³⁹ስለ ምንታይ እቲ ህያው ሰብ ዘጕረምርም? ነፍሲ ወከፍ ሰብ ብሓጢኣቱ እንትቕፃዕ፥ ስለ ምንታይ ደኣ የጕረምርም?

⁴⁰ኖን። መንገድና ንተዓዘብን ንመርምርን እሞ ናብ እግዚኣብሄር ንመለስ።

⁴¹ልብናን ኣእዳውናን ኣብ ሰማይ ናብ ዘሎ እግዚኣብሄር ነልዕል።

⁴²“ንሕና በደልና፤ ዓመፅናውን፤ ንስኻ ኸዓ ይቕረ ኣይበልካልናን።”

⁴³ሳምኬት። “ብቝጥዓ ኸደንካና፤ ሰጐጕካናን ቀተልካናን፤ ኣይራህራህኻልናንውን።

⁴⁴ፀሎትና ከይሓልፍ፥ ንባዕልኻ ብደመና ኸደንካ።

⁴⁵ኣብ ማእኸል ኣህዛብ፥ ጐሓፍን ጐድፍን ገበርካና።”

⁴⁶ዔ። “ኵሎም ፀላእትና፥ ኣብ ልዕሌና ኣፋቶም ከፈቱ።

⁴⁷ብጥፍኣትን ብምፍርራስን፥ ብሽግርን ብሽብርን ተሳቐና።

⁴⁸ብምጭፍላቕ ጓል ህዝበይ፥ ካብ ዓይነይ ውሕጅ ንብዓት ይውሕዝ ኣሎ።”

⁴⁹ፌ። “እግዚኣብሄር ካብ ሰማይ ክሳዕ ዝርእን፥ ዝምልከትን፥ ኣዒንተይ ብዘይዕረፍትን ብዘይምቍራፅን፥ ንብዓት የፍስሳ ኣለዋ።

⁵⁰

⁵¹ነተን ኵለን ኣብ ከተማይ ዘለዋ ቘናጁ ዝበፅሐን መከራ፥ ዓይነይ ንነፍሰይ ኣጨነቓ።”

⁵²ፃዴ። “እቶም ብዘይ ምኽንያት ዝፀልኡኒ፥ ከም ምህዳን ዒፍ ሃደኑኒ።

⁵³ህይወተይ ኣብ ጕድጓድ ኣጥፍኡ፤ ኣብ ልዕለይውን እምኒ ደርበዩ።

⁵⁴ቆፍ። ማይ ኣብ ልዕሊ ርእሰይ ወሓዘ፤ ኣነውን ጠፋእኹ ኢለ ነይረ።”

⁵⁵“ኣብ መዓሙቝ ጕድጓድ ኮይነ፥ ኦ እግዚኣብሄር፥ ስምካ ፀዋዕኹ።

⁵⁶ልመናይ ሰሚዕኻ ኢኻ፤ ረዳኢ ደልየ እንተእዊ፥ ካብ ምስማዕ እዝንኻ ኣይትከልከል።

⁵⁷ምስ ፀዋዕኩኻ ቐረብካኒ፤ ‘ኣይትፍራሕ’ ድማ በልካኒ።”

⁵⁸ሬስ። “ኦ ጐይታ፥ ጠበቓይ ኮንካ፤ ንህይወተይ ከዓ ተቤዘኻያ።

⁵⁹ኦ እግዚኣብሄር፥ ነቲ ዝወረደኒ ግፍዒ ርኢኻ ኢኻ እሞ ፍትሒ ኣውፅአለይ።

⁶⁰ኵሉ በቐሎምን፥ ኣብ ልዕለይ ዝኣለምዎ ውዲታትን ትፈልጦ ኢኻ።

⁶¹ሳን። ኦ ጐይታይ፥ ኵሉ ፀርፎምን ኣባይ ዝኣለምዎ ውዲቶምን ሰሚዕኻዮ ኣለኻ።

⁶²ምሉእ መዓልቲ ኣብ ልዕለይ ይዛረቡን፥ ክፍኣት ከዓ ይመኽሩለይን ኣለዉ።

⁶³ተመልከቶም! ኣብ ምቕማጦም ኮነ፥ ኣብ ምትሳኦም የላግፁለይ ኣለዉ።

⁶⁴ታው። ኦ እግዚኣብሄር፥ ከምቲ ግብሪ ኣእዳዎም፥ መሊስካ ኽፈሎም።

⁶⁵ንልቦም ኣደንዝዞ፤ መርገምካውን ኣውርደሎም።

⁶⁶ብቝጥዓኻ ኣሳጕጎም፤ ካብ ትሕቲ ሰማይ ከዓ ኣጥፍኣዮም።”