Read መ/ቅዱስ ትግርኛ, Tigrigna Bible, 1 ሰቆቃወ 5 Bible Online

ሰቆቃወ 5 - መ/ቅዱስ ትግርኛ, Tigrigna Bible, 1 bible

ሰቆቃወ 5

¹ኦ እግዚኣብሄር፥ ነቲ ዝወረደና ዘክር፤ ቈላሕ በል እሞ ንውርደትና ጠምቶ።

²ርስትና ንመፃእተኛታት፥ ኣባይትና ንጓኖት ሓሊፎም ተውሃቡ።

³ኣቦ ዘይብሎም ደኽታማት ኮንና፤ እኖታትናውን መበለታት ኮና።

⁴ማይና ብዋጋ ንሰቲ፥ ዕንፀይትናውን ብመሸጣ ንዕድግ።

⁵ሰጐጕትና ኣብ ክሳድና እዮም፤ ንሕና ደኸምና፤ ዕረፍቲ እውን ሰኣንና።

⁶እንጀራ ምእንቲ ኽንፀግብ፥ ንግብፅን ኣሶርን ኢድና ሃብና።

⁷ኣቦታትና ሓጢኣት ገበሩ፤ ሕዚ ግና የለዉን፤ ንሕና ድማ በደሎም ንፀውር ኣለና።

⁸ባሮት ይገዝኡና ኣለዉ፤ ካብ ኢዶም ዘናግፈና ኸዓ የለን።

⁹ኣብ ምድረ በዳ ኻብ ዘሎ ሰይፊ ዝተልዓለ፥ ብህይወትና እንጀራና ነምፅእ ኣለና።

¹⁰ካብቲ ረስኒ ጥሜት ዝተልዓለ ቈርበትና ኸም እቶን ፀለመ።

¹¹ንኣንስቲ ኣብ ፅዮን፥ ንደናግል ድማ ኣብ ከተማታት ይሁዳ ዓመፁወን፤

¹²ንመራሕቲ በእዳዎም ሰቐልዎም፤ ንኣረጋውያንውን ኣየኽበርዎምን።

¹³ኣጕባዝ መጥሓን ተሰከሙ፤ ኣወዳት ቈልዑ ኸዓ፥ ዕንፀይቲ ተሰኪሞም ሰንከልከል በሉ።

¹⁴ኣረጋውያንና ደጊም ኣብ ባይቶ ኣይቕመጡን፤ መንእሰያት ከዓ ድምፂ በገናኦም ሓደጉ።

¹⁵ታሕጓስ ካብ ልብና ጠፍአ፤ ጐይላና ናብ ብኽያት ተለወጠ።

¹⁶ኣኽሊል ካብ ርእስና ወደቐ፤ ሓጢኣት ሰሪሕና ኢና እሞ ወይለና።

¹⁷ካብዙይ ዝተልዓለውን ልብና ጠለመና፤ ኣዒንትናውን ደኸማ፤

¹⁸ጥራሓ ዝተረፈት እምባ ፅዮን፥ መዐንደሪ ወኻሩ ኾይና እያሞ።

¹⁹ንስኻ ግና ኦ እግዚኣብሄር፥ ንዘለኣለም ትነብር፤ ዙፋንካ ኸዓ ኻብ ትውልዲ ኽሳዕ ትውልዲ ይነብር፤

²⁰ስለ ምንታይ ፈፂምካ እትርስዐና? ስለ ምንታይከ ንነዊሕ ዘመን እትሓድገና?

²¹ኦ እግዚኣብሄር፥ ናባኻ ምለሰና፤ ንሕናውን ክንምለስ ኢና፤ ንዘመናትና ኸምቲ ናይ ቀደም ሓድሶ።

²²ፈፂምካ ደርቢኻና ዲኻ? የመናኸ ተቘጢዕኻና ዲኻ?