Read መ/ቅዱስ ትግርኛ, Tigrigna Bible, 1 መሳፍንት 5 Bible Online

መሳፍንት 5 - መ/ቅዱስ ትግርኛ, Tigrigna Bible, 1 bible

መሳፍንት 5

¹በታ መዓልቲ እቲኣ ዲቦራን ባርቅ ወዲ ኣቢኒኤምን እዝ መዝሙር እዙይ ዘመሩ፦

²“መራሕቲ ኣብ እስራኤል ስለ ዝመርሑ፥ እቲ ህዝቢ ድማ ባዕሉ ብፍቓዱ ነፍሱ ስለ ዝሃበ፥ ንእግዚኣብሄር ኣመስግንዎ።

³ኣቱም ነገስታት ስምዑ፤ ኣቱም ሹመኛታትውን ፅን በሉ፤ ኣነ ንእግዚኣብሄር ክዝምረሉ እየ፤ ንኣምላኽ እስራኤል ንእግዚኣብሄር፥ ክቕነየሉ እየ።

⁴ኦ ጐይታ! ኻብ ሴይር ምስ ወፃእኻ፥ ካብ በረኻ ኤዶምያስ ድማ ምስ ከድካ፥ ምድሪ ኣንቀጥቀጠት፤ ሰማያትውን ኣንጠብጠቡ፤ ደመናታት ድማ ማዮም ኣንጠብጠቡ።

⁵እምባታት ካብ ገፅ እግዚኣብሄር ዝተልዓለ መኸኹ፤ እዝ ሲና ኸዓ፥ ኣብ ቅድሚ እግዚኣብሄር ኣምላኽ እስራኤል ተነቓነቐ።

⁶ብዘመን ሰሜጋር ወዲ ዓናት፥ ብዘመን ኢያዔል መንገድታት ተቛረፁ፤ ሓለፍቲ መንገዲ ድማ ብጥውይዋይ መንገዲ ኸዱ።

⁷ኣቲ ዲቦራ ንስኺ ኽሳዕ እትትስኢ፥ ኣብ እስራኤል እኖ ዄንኪ ኽሳዕ እትትስኢ፥ ሓያላት ኣብ እስራኤል ወሓዱ፤ ሃለቑውን።

⁸ሓደስቲ ኣማልኽቲ ሓረዩ፤ ሽዑ ውግእ ኣብ ኣፍ ደጌታት ኮነ፤ ኣብቶም ኣርብዓ ሽሕ እስራኤላውያን ከዓ ዋልታ ኾነ፥ ኲናት ኣይተርኣየን።

⁹ልበይ ምስቶም ኣብ ማእኸል ህዝቢ ፈትዮም ርእሶም ዝወፈዩ፥ ምስቶም መራሕቲ እስራኤል እዩ፤ ንእግዚኣብሄር ኣመስግንዎ።

¹⁰ኣቱም ኣብ ልዕሊ ፀዓዱ ኣእዱግ እትቕመጡ፥ ኣቱም ኣብ ወለሽ ምንፃፍ እትቕመጡ፥ ኣቱም ሓለፍቲ መንገዲውን ብዛዕባኡ ተዛረቡ።

¹¹ካብ ደሃይ ቀስተኛታት ርሒቖም፥ ኣብ መንጎ ጋብላታት ኣብኡ ግብርታት ፅድቂ እግዚኣብሄር፥ እቲ ኣብ እስራኤል እተገብረ ግብርታት ፅድቂ ኣሕሉቕ ድማ ይንገሩ፤ ብድሕሪኡ ህዝቢ እግዚኣብሄር ናብ ኣፍ ደገታት ወረዱ።

¹²ተስኢ! ዲቦራ ተስኢ! ተስኢ! ተስኢ! መዝሙር ዘምሪ፤ ባርቅውን ተስእ! ኣታ ወዲ ኣቢጊኤም፥ ምሩኻትካ ማርኽ።

¹³ሽዑ እቶም ዝተረፉ፥ ናብቶም ሓያላቱን ናብ ህዝቡን ወረዱ፤ እግዚኣብሄርውን ምእንታይ ኣብ ልዕሊ ሓያላት ወረደ።

¹⁴ኣብ ኣማሌቅ ሱር ዝነበሮም ካብ ኤፍሬም ወረዱ፤ ድሕሬኻ ብንያም ኣብ ማእኸል ህዝብታትካ፥ ኣሕሉቕ ከዓ ኻብ ማኪር፥ ካብ ዛብሎንውን ብበትሪ ገዛኢ ዝሓዙ ወረዱ።

¹⁵ሹመኛታት ይሳኮርውን ምስ ዲቦራ ነበሩ፤ ይሳኮርውን ከም ባርቅ ነበረ፤ ቀልጢፎም ደድሕሪኡ ናብቲ ለሰ ጐየዩ፤ ኣብ ጥቓ ሩባታት ሮቤል፥ ብዙሕ ምምንታእ ልቢ ነበረ።

¹⁶ስለ ምንታይከ ፋፃ መጓሰ ኽትሰምዕ፥ ኣብ ማእኸል ደምበታት ኣባጊዕ ኮፍ በልካ? ኣብ ጥቓ ሩባታት ሮቤል፥ ዓብዪ ናይ ልቢ ምርምር ነበረ።

¹⁷ገለዓድ ኣብ ማዕዶ ዮርዳኖስ ተቐመጠ፤ ዳንከ ስለ ምንታይ ኣብ ውሽጢ መራኽብ ተረፈ? ኣሴር ኣብ ገምገም ባሕሪ ተቐመጠ፤ ኣብ ወደባቱ ኸዓ ዓረፈ።

¹⁸ዛብሎን ንነፍሱ ንሞት ዝወፈየ ህዝቢ እዩ፤ ንፍታሌምውን ኣብቲ በረኽቲ በረኻ ኸምኡ ገበረ።

¹⁹ነገስታት መፂኦም ተዋግኡ፤ ኣብ ታዕናክ፥ ኣብ ማያት መጊዶ፥ ነገስታት ከነዓን ተዋግኡ፤ ግና ምርኮ ብሩር ኣይወሰዱን።

²⁰ከዋኽብቲ ኻብ ሰማይ ተዋግኡ፤ ብኣካይዳኦምውን ምስ ሲሳራ ተዋግኡ።

²¹እቲ ኻብ ጥንቲ ዝተፈለጠ ፈለግ ቂሶን፥ ፀራሪጉ ወሰዶም፤ ኦ ነፍሰይ! ብሓይሊ ንቕድሚት ገስግሲ።

²²ካብ ብርትዐ እቶም ዝጋልቡ ሓያላት ዝተልዓለ፥ ሸኰና እቶም ኣፍራስ ከዓ ደርጓዕጓዕ በለ።

²³መልኣኽ እግዚኣብሄር፥ ‘ንሜሮዝ ርገሙ፤ ንእግዚኣብሄር ኣብ ማእኸል ሓያላት ንምርዳእ፥ ንእግዚኣብሄር ንምሕጋዝ ኣይመፁንሞ፥ ነቶም ኣብኣ ዝነብሩ ሰባት አዐሪኹም ርገምዎም’ በለ።

²⁴ኢያዔል፥ ሰበይቲ ሔቤር ቄናዊ፥ ካብ ኣንስቲ ብርኽቲ ትኹን፤ ኣብ ውሽጢ ድንኳን ካብ ዘለዋ ኣንስቲ ብርኽቲ ትኹን።

²⁵ንሱ ማይ ለመነ፥ ግና ፀባ ሃበቶ፤ ብመስተዪ ኽቡራት ገይራ፥ ርግኦ ኣቕረበትሉ።

²⁶ኣእዳዋ ናብ ሽኻል ወሰደት፤ የማነይቲ ኢዳውን ናብ መዶሻ ሰራሕተኛ ገበረት፤ ንሲሳራ ድማ ብመዶሻ ወቕዐቶ፤ ኣብ ርእሱ ሸኸለትሉ፤ ጕንዲ እዝኑ ኣንኲላ ጐድአቶ።

²⁷ኣብ መንጎ ኣእጋራ ተደፊኡ ወዲቑ ሞተ፤ ለጥውን በለ፤ ኣብ መንጎ ኣእጋራ ቝልዕፅ ኢሉ ወደቐ፤ ኣብቲ ዝተቘልዐፀሉ፥ ኣብኡ ወዲቑ ሞተ።

²⁸ኣብ መስኰት ኮይና ጠመተት፤ እኖ ሲሳራ በቲ ዓይኒ ርግቢ ኾይና ዓው ኢላ ፀውዐት፤ ‘ሰረገላኡ ስለ ምንታይ ምምፃእ ደንጐየ? ስለ ምንታይከ ድምፂ መንኰራዅር ሰረገላኡ ደሓረ?’ በለት።

²⁹እተን ብልሓተኛታት ወይዘራዝራ መለሳላ፤ ንሳውን ንርእሳ ኸምዙይ ኢላ መለሰት፤

³⁰‘ምርኮዶ ረኺቦም ኣይኮኑን? ተኻፊሎምከ የለዉንዶ? ምርኮ ንነፍሲ ወከፍ ሰብኣይ፥ ሓሓንቲ ወይ ከክልተ ቘናጁ፥ ምርኮ ንሲሳራ ዝተፈላለየ ዝሕብሩ ኽዳውንቲ፥ ዝተፈላለየ ዝሕብሩ ጥሉፍ ክዳውንቲ፥ ንኽሳድ ዝኸውን ብኽልተ ወገኑ ዝተጠልፈ ኽዳውንቲዶ ኣይረኸቡን?’

³¹ኦ እግዚኣብሄር! ኵሎም ፀላእትኻ ኸምኡ ይጥፍኡ፤ እቶም ዝፈትዉኻ ግና፥ ከም ፀሓይ፥ ከምቲ ፀሓይ ብሓይላ ኽትወፅእ እንተላ ዝኸውን።” ብድሕሪኡ እታ ሃገር ነርብዓ ዓመት ዝኣክል ዓረፈት።