Read መ/ቅዱስ ትግርኛ, Tigrigna Bible, 1997 ኦሪት ዘፍጥረት 11 Bible Online

ኦሪት ዘፍጥረት 11 - መ/ቅዱስ ትግርኛ, Tigrigna Bible, 1997 bible

ኦሪት ዘፍጥረት 11

¹ምድሪ ብዘላ ብሓደ ቓንቋን ብሓደ ንግግርን ነበረት።

²ኮነ ድማ ፡ ንምብራቕ ኣቢሎም ምስ ተጓዕዙ፡ ኣብ ምድሪ ሲነኣር ጎልጎል ረኸቡ፡ ኣብኡ ድማ ተቐመጡ።

³ንሓድሕዶም ድማ ክላግዳ፡ ጡብ ንስራሕ እሞ ብሓዊ ንድፈኖ፡ ተበሃሃሉ እሞ ጡብ ኣብ ክንዲ እምኒ፡ ጸብሪ ኽኣ ኣብ ክንዲ ኖራ ኾነሎም።

⁴ሽዑ ድማ፡ ክላ ግዳ ኣብ ልዕሊ ገጽ ኩላ ምድሪ ምእንቲ ፋሕ ከይንብልሲ፡ ከተማን ርእሱ ሰማይ ዚጥንቁር ግምብን ንስራሕ፡ ስምና ኸኣ ነጸውዕ፡ በሉ።

⁵እግዚኣብሄር ከኣ ነቲ ደቂ ሰብ ዚሰርሕዎ ዝነበሩ ኸተማን ግምብን ኪርኢ ወረደ።

⁶እግዚኣብሄር ድማ ፡ ኣንሆ ኹላቶም ሓደ ዝዛረብኦም ሓደ ህዝቢ እዮም። መጀምርታ ግብሮም ከኣ እዚ እዩ። ሒጂ ድማ ኪገብርዎ ኢሎም ዝህቅንዎ ዘበለ ዚኽልክሎም የልቦን።

⁷እምበኣር ማንም ንዘረባ ብጻዩ ምእንቲ ኸይሰምዕሲ ፡ ንዑ ንውረድ፡ ኣብኡ ኸኣ ዘረባኦም ንደባልቕ፡ በለ።

⁸እግዚኣብሄር ድማ ካብኡ ናብ ልዕሊ ገጽ ኩላ ምድሪ ፋሕ ኣበሎም፡ ምስራሕ እታ ከተማ ኽኣ ገደፉ።

⁹እግዚኣብሄር ኣብኣ ቛንቋ ኹላ ምድሪ ፋሕፋሕ ስለ ዘበለ፡ ስም እታ ኸተማ ባቤል ተባህለ። ካብኣ ኽኣ እግዚኣብሄር ናብ ልዕሊ ገጽ ኩላ ምድሪ በተኖም።

¹⁰ወለዶ ሴም እዚ እዩ። ሴም ወዲ ሚእቲ ዓመት ኮነ፡ ክልተ ዓመት ድሕሪ ማይ ኣይሂ ኽኣ ንኣርፋክሳድ ወለደ።

¹¹ሴም ድማ ድሕርቲ ናኣርፋክሳድ ምስ ወለደ፡ ሓሙሽተ ሚእቲ ዓመት ገበረ፡ ኣወዳትን ኣዋልድን ከኣ ወለደ።

¹²ኣርፋክሳድ ድማ ሰላሳን ሓሙሽተን ዓመት ገብረ፡ ንሸላሕ ከኣ ወለደ።

¹³ኣርፋክሳድውን ንሸላሕ ምስ ወለደ፡ ድሕሪኡ ኣርባዕተ ሚእትን ሰለስተን ዓመት ገበረ ኣወዳትን ኣዋልድን ድማ ወለደ።

¹⁴ሸላሕ ከኣ ሰላሳ ዓመት ገበረ፡ ንዔበር ወለደ።

¹⁵ሸላሕ ንዔበር ምስ ወለደ ድማ፡ ድሕሪኡ ኣርባዕተ ሚእትን ስለስተን ዓመት ገብረ፡ ኣወዳትን ኣዋልድን ከኣ ወለደ።

¹⁶ዔበር ድማ ሰላሳን ኣርባዕተን ዓመት ገበረ፡ ንፌሌግ ከኣ ወለደ።

¹⁷ዔበር ንፌሌግ ምስ ወለደ ኽኣ፡ ድሕሪኡ ኣርባዕተ ሚእትን ሰላሳን ዓመት ገብረ፡ ኣወዳትን ኣዋልድን ድማ ወለደ።

¹⁸ፌሌግ ከኣ ስለላሳ ዓመት ገብረ፡ ንረጉ ወለደ።

¹⁹ፌሌግ ንረጉ ምስ ውለደ ድማ፡ ድሕሪኡ ክልተ ሚእትን ትሽዓተን ዓመት ገብረ፡ ኣወዳትን ኣውላድን ከኣ ወለደ።

²⁰ረጉ ድማ ሰላሳን ክልተን ዓመት ገብረ። ንሴሩግ ከኣ ወለደ።

²¹ረጉ ንሴሩግ ምስ ወለደ ድማ፡ ድሕሪኡ ክልተ ሚእትን ሾብዓተን ዓመት ገበረ፡ ኣወዳትን ኣዋልድን ከኣ ወለደ።

²²ሴሩግ ድማ ሰላሳ ዓመት ገበረ፡ ንናሆር ከኣ ወለደ።

²³ሴሩግ ንናሆር ምስ ወለደ ኸኣ ድሕሪኡ ክልተ ሚእቲ ዓመት ገበረ ኣወዳትን ኣዋልድን ከኣ ውለደ።

²⁴ናሆር ድማ ዕስራን ትሽዓተን ዓመት ገብረ፡ ንታራ ኸኣ ወለደ።

²⁵ናሆር ንታራ ምስ ወለደ ድማ፡ ድሕሪኡ ሚእትን ዓሰርተው ትሽዓተን ዓመት ገበረ፡ ኣወዳትን ኣዋልድን ከኣ ወለደ።

²⁶ታራ ድማ ሰብዓ ዓመት ገበረ፡ ንኣብራምን ንናሆርን ንሃራን ወለደ።

²⁷ወለዶ ታራ ኽኣ እዚ እዩ፡ ታራ ንኣብራምን ንናሆርን ንሃራንን ወለደ። ሃራን ድማ ንሎጥ ወለደ።

²⁸ሃራን ከኣ ኣብ ኡር ናይ ከለዳውያን ኣብታ እተወልደላ ምድሪ ኣብ ቅድሚ ኣቡኡ ታራ ሞተ።

²⁹ኣብራምን ናሆርን ድማ ኣንስቲ ኣእተው። ስም ሰበይቲ ኣብራም ሳራይ እዩ። ስም ሰበይቲ ናሆር ድማ ሚልካ፡ ጓል ሃራን፡ ኣቦ ሚልካን ኣቦ ዮስካን እዩ።

³⁰ሳራይ ከኣ መኻን ነበረት እሞ ውሉድ ኣይነብራን።

³¹ታራ ድማ ንኣብራም ወዱን፡ ንሎጥ ወራ ሃራን ወዲ ወዱን፡ ንሳራይ ከኣ ሰበይቲ ወዱ። ሰበይቲ ኣብራም ወዲ ወሰዱ፡ ካብ ኡር ናይ ከለዳውያን ናብ ምድሪ ከንኣን ኪኸዱ ብሓደ ወጹ። ናብ ካራን ድማ መጹ ኣብኡ ኸኣ ተቐመጡ።

³²ዕድመ ታራ ድማ ክልተ ሚእትን ሓሙሽተን ዓመት ኮነ። ታራ ኽኣ ኣብ ካራን ሞተ።