Read መ/ቅዱስ ትግርኛ, Tigrigna Bible, 1997 ኦሪት ዘፍጥረት 19 Bible Online

ኦሪት ዘፍጥረት 19 - መ/ቅዱስ ትግርኛ, Tigrigna Bible, 1997 bible

ኦሪት ዘፍጥረት 19

¹ኣቶም ክልተ መላእኽቲ ድማ ምሸት ናብ ሶዶም መጹ። ሎጥ ከኣ ኣብ ደገ ሰዶም ተቐሚጡ ነበረ። ሎጥ ድማ ምስ ረኣዮም፡ ኪቕበሎም ተንስኤ፡ ብገጹ ኽኣ ናብ ምድሪ ተደፍኤ እሞ።

²ኣቱም ጎይተተይ፡ በጃኹም እንሆ ኣብ ቤት ባርያኹም ኣግልሱ፡ ኣብኣ ድማ ሕደሩ፡ ኣእጋርኩምውን ተሓጸቡ። ኣንጊህኩም ተንሲእኩም ከኣ መገድኹም ትኸዱ፡ በለ። ንሳቶም ግና፡ ኣይፋልናን፡ ኣብ ኣደባብይ ደኣ ንሓደር በሉ።

³ንሱ ኽኣ ኣዝዩ ግዲ በሎም እሞ ናብኡ ኣግሊሶም ናብ ቤቱ ኣተው። ንሱ ድማ ቅጫ ሰንኪቱ መኣሲ ኣዳለወሎም፡ ንሳቶምውን በልዑ።

⁴ገና ኸይደቀዱ ኸለው ድማ፡ ሰብ እታ ኽተማ ሰብ ሰዶም፡ ኣጉባዞምን ኣረገውትን፡ ብዘሎ ኣቲ ህዝቢ ኻብ ኹሉ ሸነኽ መጺኡ፡ ነታ ቤት ከበባ።

⁵ንሎጥ ጸዊዖም ከኣ፡ እዞም ብለየቲ ናባኻ ዝኣተው ሰባት ኣበይ ኣለው፡ ምእንቲ ኽንፈልጦምሲ፡ ናባና ኣውጽኣዮም በልዎ።

⁶ሎጥ ድማ ናባታቶም ናብ ኣፍ ደገ ወጸ፡ ነቲ ማዕጾውን ብድሕሪኡ ዐጸዎ።

⁷በሎም ከኣ ኣሕዋተየ፡ ከምዚ ዝበለ ኽፉእ ኣይትግበሩ፡

⁸እነዋ ሰብኣይ ዘይፈልጣ ኽልተ ኣዋልድ ኣለዋኒ፡ በጃኹም ሕደጉ፡ ንኣታተን ከውጻኣሉም ባህ ዝበልኩም ግበርወን። እዞም ሰባት እዚኦም ግና ኣብ ጽላል ናሕሰይ ኣትዮም እዮም እሞ ገለ እኳ ኣይትግበርዎም።

⁹ንሳቶም ግና ኣልግስ፡ ንየው በል በሉ። ድማ እዚ ሓደ ስደተኛ ኾይኑ ዝመጸ ዳኛ ኾይኑ ኽፈርድ ይደሊ ኣሎ፡ ሕጂ ግና ካብ ናኣታቶም ዝገደደ ኸነኽፍኣልካ ኢና በሉ። ነቲ ሰብኣይ፡ ንሎጥ፡ ብሓይሊ ጎነጽኦ፡ ማዕጾ ኺሰብሩ ድማ ቐረቡ።

¹⁰ሽዑ እቶም ሰባት ኣእዳዎም ኣስሊኾም፡ ንሎጥ ናባታቶም ናብ ቤት ኣእተውዎ፡ ነቲ ማዕጾ ድማ ዐጸውዎ።

¹¹ነቶም ኣብ ኣፍ ቤት ዝነበሩ ሰባት ካብ ናኣሽቱ ኽሳዕ ዓበይቲ፡ ኣዖርዎም እሞ ነቲ ኣፍ ደገ ኺረኽቡ ይደክሙ ነበሩ።

¹²እቶም ሰብ ድማ ንሎጥ ኣብዚ ገና ኻብ ናትካዶ ኣሎካ ሰብኣይ ጓልካ ኣወዳትካን ኣዋልድካን ኣብዛ ኸተማ ዘሎ ናትካ ዘበለ ኹሉን ካብዛ ቦታ እዚኣ ኣውጽኣዮም።

¹³ነዛ ቦታ እዚኣ ኽኣ ጭራሕምራሖም ኣብ ቅድሚ እግዚኣብሄር ዓብዩ ስለ ዝኾነ፡ እግዚኣብሄር ከኣ ከነጥፍኣኦም ልኢኹና እዩ እሞ፡ ንሓና ኸነጥፍኣ ኢና፡ በልዎ።

¹⁴ሎጥ ድማ ወጺኣኡ ነቶም ኣዋልዱ ዘእተው ሰብኡት ኣዋልዱ፡ እግዚኣብሄር ነዛ ኸተማ ኼጥፍኣ እዩ እሞ፡ ተንስኡ፡ ካብዛ ቦታ እዚኣ ውጹ፡ ኢሉ ተዛረቦም። እቶም ሰብኡት ኣዋልዱ ግና ይዋዘኸም ዘሎ መሲሉ ተራእዮም።

¹⁵ቀይሔጸሊም ኪቐድድ ከሎ ድማ እቶም መላእኽቲ ንሎጥ፡ ብዓመጽ እዛ ኸተማ ኸይትጠፍእሲ፡ ስበይትኻን እዘን ኣብዚ ዘለዋ ኽልተ ኣዋልድካን ተማሊእካ ተላዓል፡ ኢሎም ሀውኽዎ።

¹⁶ንስ ግና ደንጎየ። እግዚኣብሄር ክንሕፎ ስለ ዝደለየ፡ እቶም ሰባት ኢዱን ኢድ ሰበይቱን ኢድ ክልቲኤን ኣዋልዱን ሒዞም ኣውጽእዎም፡ ኣብ ወጻኢ እታ ኸተማ ድማ ሓደግዎ።

¹⁷ኮነ ኽኣ ናብ ወጻኢ ምስ ኣውጽእዎም፡ ነፍስኻ ኣድሕን፡ ንድሕሪት ገጽካ ኣይትበል፡ ኣብ ብዘሎ እዚ ጎልጎል ድማ ደው ኣይትበል። ምእንቲ ኸይትጠፍእ፡ ናብ ከረን ኣቢልካ ድሓን በለ፡

¹⁸ሎጥ ግና ኣይፋልካን ጐይታይ፡

¹⁹እንሆ ባርያኻ ኣብ ቅድሜኻ ሞጎስ ረኺቡ ኣሎ ንነፍሰይ ብምድሓንካ ዝገብርካለይ ምሕረትካ ድማ ኣዕቤኻዮ። ኣነ ግና፡ እቲ ኽፉእ ከየርክበንን ከይመውትን፡ ናብ ከረን በጺሔ ክድሕን ኣይክእልን እየ።

²⁰በጃኻ እንሃ፡ እዛ ኸተማ እዚኣ ናብኣ ንምህዳም ቀረብ እያ፡ ንእሽቶ ኽኣ እያ። ንእሽቶዾ ኣይኮነትን፡፡ እሞ ነፍሰይ ብህይወት ምእንቲ ኽትነብርሲ፡ በጃኻ ናብኣ ኽድሕን ሕደገኒ በሎም።

²¹ንስ ድማ ነታ እተዛረብካላ ኸተማ ኸይግልብጣስ እንሆ፡ በዚ ነግርዚውን ሕራይ ኢለካ እየ።

²²ኣብኣ ኸይበጻሕካ ገለ ነገር ከገብር ኣይክእልን እየ እሞ፡ ቅውልጢፍካ ናብኣ ድሓን፡ በሎ። ስለዚ ስም እታ ኸተማ ዞኣር ተባህለት።

²³ሎጥ ኣብ ዞኣር ምስ ኣተወ ድማ፡ ኣብታ ምድሪ ጸሓይ በረቐት።

²⁴ሽዑ እግዚኣብሄር ካብ ሰማይ ኣብ ልዕሊ ሶዶምን ኣብ ልዕሊ ጎሞራን ካብ እግዚኣብሄር ዲንን ሓውን ኣዝነመ።

²⁵ነዘን ከተማታት እዚኤንን ንኹሉ ጎልጎልን ኣብተን ከተማታት ንዝነብሩ ኹሎምን ንብቑሊ ምድርን ገልበጠ።

²⁶ሰበይቲ ሎጥ ግና ንድሕሪት ክትርኢ ግልጽ በለት፡ ሓወልቲ ጨው ከኣ ኾነት።

²⁷ኣብርሃም ድማ ንጽብሒቱ ናብታ ኣብ ቅድሚ እግዚኣብሄር ደው ኢሉላ ዝነበረ ቦታ ኣንግሄ።

²⁸ናብ ሶዶምን ጎሞራን ናብ ብዘላ ምድሪ ጎልጎልን ኣማዕደወ፡ እንሆ ኸኣ ካብታ ሃገር ትኪ እቶን ዝመስል ትኪ ኺለዐል ረኣየ።

²⁹ከምዚ ኽኣ ኾነ፡ ኣምላኽ ነተን ኣብ ጎልጎል ዝነበራ ኸተማታት ኬጥፍኡ ከሎ፡ ኣምላኽ ንኣብርሃም ዘከዎ። ነተን ሎጥ ተቐሚጥወን ዝነበረ ኸተማታት ኪግለብጥ ከሎ፡ ንሎጥ ካብ ማእከል ምግልባጥ ኣውጽኦ።

³⁰ሎጥ ከኣ ኣብ ዛኦር ንምቕማጥ ፈሪሁ ነበረ እሞ፡ ካብ ዛኦር ደይቡ፡ ክልቲኤን ኣዋልዱ ድማ ምስኡ ኣብ ከአን ተቐመጠ።

³¹እታ በኹሪ ኽኣ ነታ ንእሽቶ ኣቦና ኣሪጉ እዩ። ኣብ ምድሪ ድማ ከም ልማድ ኩሉ ምድሪ ዜእትወና ሰብኣይ የልቦን።

³²ንዒ ነቦና ወይኒ ነስትዮ ካብ ኣቦና ዘርኢ ምእንቲ ኸነትርፍሲ ምስኡ ንደቅስ በለታ።

³³ኣሞ በታ ለይቲ እቲኣ ነቦኤን ወይኒ ኣስተይኦ፡ እታ በኹሪ ድማ ኣትያ ምስ ኣቦኣ ደቀሰት። ንሱ ግና ምድቃሳን ምትንሳኣን ኣይፈለጠን።

³⁴ኮነ ኸኣ፡ ንጽብሒቱ እታ በኹሪ ነታ ንእሽቶ እንሆ ትማሊ ለይቲ ምስ ኣቦይ ደቂሰ፡ በዛ ለይቲ እዚኣ ድማ ወይኒ ነስትዮ ካብ ኣቦና ዘርኢ ምእንቲ ኸነትርፍ፡ ንስኺ ድማ ኣቲኺ ምስኡ ደቅሲ በለታ።

³⁵በታ ለይቲ እቲኣ ድማ ነቦኤን ወይኒ ኣስተይኦ፡ እታ ንእሽቶ ኸኣ ከይዳ ምስኡ ደቀሰት። ንሱ ግና ምድቃሳን ምትንሳኣን ኣይፈለጠን።

³⁶ክልቴኤን ደቂ ሎጥ ከኣ ካብ ኣቦኤን ጠኒሳ።

³⁷እታ በኹሪ ወዲ ፡ ስሙ ኸኣ ሞኣብ ኣውጽኣትሉ። ንሱ ኽሳዕ ሎሚ ኣቦ ሞኣባውያን እዩ።

³⁸ኣታ ንእሽቶ፡ ንሳ ድማ ወለደት፡ ስሙ ብንዓሚ ኣውጽኣትሉ። ንሱ ኽሳዕ ሎሚ ኣቦ ደቂ ዓሞን እዩ።