Read መ/ቅዱስ ትግርኛ, Tigrigna Bible, 1997 ኦሪት ዘፍጥረት 21 Bible Online

ኦሪት ዘፍጥረት 21 - መ/ቅዱስ ትግርኛ, Tigrigna Bible, 1997 bible

ኦሪት ዘፍጥረት 21

¹እግዚኣብሄር ድማ፡ ከምቲ ዝበሎ ንሳራ በጽሓ። እግዚኣብሄር ከኣ ንሳራ ኸምቲ እተዛረቦ ገበረላ።

²ሳራ ድማ ጠነሰት በቲ ኣምላኽ እተዛረቦ ምዱብ ወርሓት ከኣ ንኣብርሃም ኣብ እርግናኡ ወዲ ወለደትሉ።

³ኣብርሃም ድማ ነቲ እተወልደሉ ወዱ፡ ሳራ ዝወለደትሉ ስሙ ይስሓቅ ኣውጽኣሉ።

⁴ኣብርሃም ከኣ ንይስሃቕ ወዱ፡ ከምቲ ኣምላኽ ዝኣዘዞ ወሲ ሾሞንተ መዓልቲ ምስ ኮነ ገዘሮ።

⁵ኣብርሃም ድማ ወዱ ይስሃቅ ኪውለደሉ ኸሎ፡ ወዲ ሚእቲ ዓመት ኮይኑ ንበረ።

⁶ሳራ ኸኣ፡ ኣምላኽ ሰሓቕ ገበረለይ እዚ ዝሰምዔ ዘበለ ኹሉ ኸኣ ምሳይ ይስሓቕ በለት።

⁷ኣብ እርግናኡ ወዲ ወለደሉ እየ እሞ፡ ሳራ ቖልዓ ተጥቡ ሽም ዘላስ፡ ንኣብርሃም መን ምነገሮ ድማ በለት።

⁸እቲ ቖልዓ ኸኣ ዐብየ፡ ጡብውን ሃደገ። በታ ይስሃቅ ጡብ ዝሓደገላ መዓልቲ ድማ ኣብርሃም ዓብዩ ምሳሕ ገበረ።

⁹ሳራ ድማ እቲ ኣጋር ግብጻዊት፡ ንኣብርሃም ዝወለደትሉ ወዲ ኼላግጽ ረኣየት።

¹⁰ንኣብርሃም ድማ፡ ወዲ እዛ ባርያ እዚኣ ምስ ወደይ ምስ ይስሃቅ ኣይኪወርስን ኣዩ እሞ፡ ነዛ ባርያ እዚኣን ንወዳን ኣውጽኣዮም በለቶ።

¹¹እዚ ነገርዚ ኽኣ ንኣብርሃም ብምኽንያት ወዱ ኣዝዩ ኽፋእ ኮይኑ ተራእዮ።

¹²ኣምላኽ ድማ ንኣብርሃም ብናይ እዚ ወድን ብናይ እዛ ባርያኻን ክፋእ ኮይኑ ኣይርኤኻ። ብይስሃቅ እዩ ዘርኢ ዘጽውዓልካ እሞ ብኹሉ ንሳራ እትብለካ ዘላ ቓላ ስማዕ።

¹³ንወዲ እዛ ባያ ድማ ዘርእኻ ስለ ዝኾነ ህዝቢ ኽገብሮ እየ በል።

¹⁴ንጽብሒቱ ኸኣ ኣብርሃም ኣንጊሁ ተንሲኡ እንጌራን ሓርቢ ማይን ወሲዱ፡ ንኣጋር ሃባ ኣብ መንኩባ ድማ ኣሰከማ፡ እቲ ቖልዓውን ሂቡ ሰዳዳ። ንሳ ኸኣ ኸይዳ፡ ኣብ በረኻ ብኤርሸባዕ ኮብለል ትብል ነበረት።

¹⁵እቲ ማይ ካብ ሓርቢ ምስ ተወድኤ ኸኣ፡ ነቲ ቖልዓ ኣብ ትሕቲ ሓንቲ ኦም ይውደቕ ሓደገቶ።

¹⁶ሞትት እዚ ቖልዓ ኸይርኢ፡ ኢላ ድማ ኸደት እሞ ምውርዋር ቀስቲ ዘኣክል ርሒቓ ኣብ መንጽሩ ተቐመጠት። ኣብ መንጽሩ ተቐሚጣ ድማ ዓው ኢላ በኸየት።

¹⁷ኣምላኽ ከኣ ድምጺ እቲ ቖልዓ ሰምዔ። መልኣኽ ኣምላኽ ድማ ንኣጋር ካብ ሰማይ ጸዊዑ፡ ኣጋር እንታይ ኳንኪ ኢኺ፡ ኣምላኽ ድምጺ እቲ ቖልዓ ኣብታ ዘለዋ ኸሎ ሰሚዕው እዩ እሞ ኣይትርሂ።

¹⁸ነቲ ቖልዓ ዓብዩ ህዝቢ ኽገብሮ እየ እሞ ተንስኤ፡ ኣልዒልኪ ብኢድኪ ደግፍዮ በላ።

¹⁹ኣምላኽ ድማ ዓይና ኸፈተላ፡ ዔላ ማይ ከኣ ረኣየት። ከይዳ ኸኣ ሓርባ ማይ መሊኣ ነቲ ቖልዓ ኣስተየቶ።

²⁰ኣምላኽ ድማ ምስቲ ቖልዓ ነበረ፡ ንሱ ኽኣ ዐበየ፡ ኣብ በረኸውን ተቐመጠ፡ ቀስተኛ ኸኣ ኮነ።

²¹ንሱ ኣብ በረኻ ጳራን ይቕመጥ ነበረ። ኣዲኡ ድማ ካብ ግብጺ ሰበይቲ ኣምጽኣትሉ።

²²ኮነ ኽኣ በቲ ዘበን እቲ ኣቢሜሌክ ምስ ፊክል ሓለቃ ሰራውቱ መጺኣኡ ንኣብርሃም ከምዚ ኢሉ ተዛረቦ ኣምላኽ ብትገብሮ ዘበለ ኹሉ ምሳኻ እዩ።

²³ሕጂ ኽኣ ከምቲ ኣነ ለውሃት ዝገብርኩልካ ንኣይን ነዛ ሰደተኛ ኼንካ እትነብራ ዘሎኻ ምድርን፡ ከምኡ ኽትገብር እምበር ንኣይን ንደቀይን ንደቂ ደቀይን ከይትጠልም ብኣምላኽ ምሓለለይ።

²⁴ኣብርሃም ከኣ ኣነ እምሕል በለ።

²⁵ኣብርሃም ድማ ብዛዕባ እታ ባሮት ኣቢሜሌክ ብሓይሊ ዝሓዝዋ ዔላ ማይ ንኣቢሜሌክ ወቐሶ።

²⁶ኣቢሜሌክ ከኣ፡ ነዚ ነግር እዝስ መን ከም ዝገበሮ ኣይፈለጥኩን፡ ንስኻ ድማ ኣይነገርካንን፡ ኣነውን ብዘይ ሎሚ ኣይሰማዕኩን፡ በለ።

²⁷ኣብርሃም ድማ ኣባጊዕን ኣቡዑርን ወሲዱ ንኣቢሜሌክ ሀቦ። ክልቲኦም ከኣ ኪዳን ተኣታተው።

²⁸ኣብርሃም ድማ ካብ መጋርያኡ ሻብዓተ ሽበን ንበይነን ፈለየ።

²⁹ኣቢሜሌክ ከኣኣ ንኣብርሃም እዘን ንበይነን ዝፈሌኻየን ሻብዓተ ሽበን እንታይ እየን በሎ።

³⁰ንሱ ድማ ነዛዔላ እዚኣ ኣነ ኸም ዝኾዐትክዋ ምእንቲ ንኣይ ምስክር ክኾነኒ፡ እዛን ሻብዓተ ሸብን እዚኤን ካብ ኢደይ ክትወስድ በለ።

³¹ስለዚ ክልቲኦም ኣብኣ ስለ እተማሓሓሉ፡ ነታ ቦታ እቲኣ ብኤርሸባዕ ኢሉ ኣውጽኣላ።

³²ኣብ ብኤርሸባዕ ከኣ ኪዳን ተኣታታው፡ ኣቢሜሌክ ድማ ተንሲኣኡ ምስ ፊኮል፡ ሓለቃ ሰራዊቱ፡ ናብ ምድር ፍልስጥኤማውያን ተመልሱ።

³³ኣብርሃም ከኣ ኣብ ብኤርሸባዕ ተምሪ ተኸለ። ኣብኣውን ብስም እግዚኣብሄር፡ ዘለኣኣለማዊ ኣምላኽ ተማህለል።

³⁴ኣብርሃም ድማ ኣብ ምድሪ ፍልስጥኤማውያን ስደተኛ ኾይኑ ነዊሕ ዘበን ተቐመጠ።