Read መ/ቅዱስ ትግርኛ, Tigrigna Bible, 1997 ኦሪት ዘፍጥረት 25 Bible Online

ኦሪት ዘፍጥረት 25 - መ/ቅዱስ ትግርኛ, Tigrigna Bible, 1997 bible

ኦሪት ዘፍጥረት 25

¹ኣብርሃም ድማ መሊሱ ቁጡራ ዝስማ ሰበይቲ ኣእተወ።

²ንሳ ኽኣ ንዚምራንን ዮቅሻንን ሜዳንን ሚድያንን ይሽባቅን ሹኣሕን ወለደትሉ።

³ዮቅሻን ድማ ንሸባን ዴዳንን ወለደ። ደቂ ዴዳን ከኣ ኣሺሪምን ለጢሹምን ለኡሚምን እዮም።

⁴ደቂ ሚድያን ድማ ኤፋን ኤፌርን ሓኖክን ኣቢዳዕን ኤልዳዕን እዮም።እዚኣቶም ኩሎም ደቂ ቁጡራ እዮም።

⁵ኣብርሃም ድማ ኩሉ ዘለዎ ንይስሃቅ ሀቦ።

⁶ነቶም ውሉድ ኣንስቲ ወሰኑ ንኣብርሃም ግና ኣብርሃም ህያባት ቢሁ፡ ገና ብህይወት ኸሎ፡ ካብ ወዱ ይስሃቅ ንሸነኽ ምብራቕ ኣቢሉ ናብ ምድሪ ምብራቕ ሰደዶም።

⁷ኣብርሃም ዝነበሮ ዘበን ዓመታት ሕይወቱ ኸኣ እዚ እዩ፡ ሚእትን ሰብዓን ሓሙሽተን ዓመት።

⁸ኣብርሃም ድማ ጽቡቕ እርግና ኣሪጉ ዕድመ ጸጊቡ ትንፋሱ ወጸት ሞተውን ናብ ህዝቡ ኽኣ ተኣከበ።

⁹ደቂ ይስሃቅን እስማዔልን ድማ ኣብታ ግራት ኤፍሮን ወዲ ጾሓር ሔታዊ፡ ኣብ መንጽር መምሬ ዘላ በዓቲ ማክጴላ ቐበርዎ።

¹⁰ኣብታ ኣብርሃም ካብ ደቂ ሔት እተሸየጣ ግራት፡ ኣብርሃምን ሰበይቱን ሳራን ኣብኣ ተቐብሩ።

¹¹ኮነ ድማ ድሕሪ ሞት ኣብርሃም ንወዱ ይስሃቅ ኣምላኽ ባረኾ። ይስሃቅ ከኣ ኣብ ብኤርላሃይሮይ ይቕመጥ ነበረ።

¹²ወለዶ እስማዔል ወዲ ኣብርሃም፡ ኣጋር እታ ግብጻዊት ግዝእቲ ሳራ፡ ንኣብርሃም ዝወለደትሉ፡ እዚ እዩ፡

¹³ስማት ደቂ እስማዔል በብስሞም ኣብ ወወለዶኦም እዚ እዩ፡ በኹሪ ወዲ እስማዔል ነባዩት፡ ድማ ቄዳርን ኣድብኤልን ሚብሳምን፡

¹⁴ሚሽማዕን ዱማን ማሳን፡

¹⁵ሓዳርን ቴማን፡ የጡር፡ ናፍሽ፡ ቄድማ ኸኣ።

¹⁶እዚኣቶም ደቂ እስማዒል እዮም። እዚ ድማ እዩ ስሞም በብዓዶም፡ በብሰፈሮም፡ ዓሰርተው ክልተ መሳፍንቲ ነንህዝቦምን።

¹⁷ዓመታት ህይወት እስማዒል ድማ ሚእትን ሰላሳን ሾብዓተን ዓመት ኮነ። ትንፋሱ ወጸት ሞተ፡ ናብ ህዝቡ ኸኣ ተኣከበ።

¹⁸ካብ ሓዊላ ኽሳዕ እታ ኣብ መንጽር ግብጺ ዘላ ሹር፡ በታ ንኣሶር እተእቱ ሰፊሮም ነበሩ። ኣብ መንጽር ኩሎም ኣሕዋቱ ሰፈረ።

¹⁹ወለዶ ይስሃቅ ወዲ ኣብርሃም ድማ እዚ እዩ ኣብርሃም ንይስሃቅ ወለደ፡

²⁰ይስሃቅ ድማ ንርብቃ፡ ጓል ቤቱኤል እቲ ሶርያዊ በዓል ጳዳንኣራም፡ ሓብቲ ላባን እቲ ሶርያዊ ንሰበይቱ ኼእትዋ ኸሎ፡ ወዲ ኣርብዓ ዓመት ኮይኑ ነበረ።

²¹ይስሃቅ ድማ ሰበይቱ ርብቃ መኻን ነበረት እሞ ምእንትኣ ንእግዚኣሄር ለመነ። እግዚኣብሄር ከኣ ተለመኖ፡ ስበይቱ ርብቃ ድማ ጠነሰት።

²²እቶም ቖልዑ ኽኣ ኣብ ማሕጸና ይደፋፍኡ ነበሩ። ሽዑ ንሳ ከምዚ ኻብ ኮነ ደኣ፡ ንምንታይ እነብር ኣሎኹ በለት።

²³እግዚኣብሄር ከኣ በላ፡ ኣብ ማሕጸንኪ ኽልተ ህዝቢ ኣለዉ፡ ካብ ከርስኺውን ክልተ ህዝቢ ኽፈላለዩ እዮም። እቲ ሓደ ህዝቢ ኻብቲ ኻልኣይ ህዝቢ ኺብርትዕ እዩ። እቲ ዓብዩ ነቲ ንእሽቶ ኺግዛእ እዩ።

²⁴ክትወልድ ኣዋርሕ ምስ በጽሔ ድማ እንሆ ኣብ ማሕጸና ማንታ ነበሩ።

²⁵እቲ ቐድም ዝወጸ ቐይሕ ኩሉንትንኡ ኽኣ ጸጉሪ ማቕ ዝመስል ነበረ። ስሙ ኽኣ ኤሳው ኣውጽኣትሉ።

²⁶ድሕሪዚ ድማ ሓው ወጸ፡ ኢዱ ከ ኹርኹሪ ኤሳው ሒዛ ነበረት፡ ስሙ ድማ ያእቆብ ተባህለ። ንሳ ኽትወልደሎም ከላ ኽኣ፡ ይስሃቅ ወሲ ሰሳ ዓመት ኮይኑ ነበረ።

²⁷እቶም ቖልዑ ድማ ዐበዩ፡ ኤሳው ሃድን ዚፈልጥ ሰብኣይ መሮር ኮነ። ያቆብ ከኣ ኣብ ድንኳን ዚነብር ህዱእ ሰብኣይ ኮነ።

²⁸ይስሃቅ ስጋ ሃድን መቂርዎ ነበረ እሞ፡ ንኤሳው ይፈቱ ነበረ። ርብቃ ግና ንያእቆብ ትፈቱ ነበረት።

²⁹ያእቆብ ጸብሒ ኽሰርሕ ከሎ፡ ኤሳው ደኺሙ ኻብ መሮር ኣተወ።

³⁰ሽዑ ኤሳው ንያእቆብ ደኺመ እየ እሞ በጃኻ ካብዚ ቐይሕ ጸብሒ ኣብልዓኒ በሎ። ስለዚ ስሙ ኤዶም ተባህለ።

³¹ያእቆብ ከኣ ሎሙ ብኹርናኻ ሽጠለይ በሎ።

³²ኤሳው ድማ እንሆ ኣነ ኽመውት ኢለ ኣሎኹ፡ እዛ ብኹርናኸ ንምንታየይ እያ፡ በለ።

³³ያእቆብ ከኣ” ሎሚ ምሓለለይ፡ በለ እሞ መሓለሉ፡ ብኹርንኡውን ንያእቆብ ሸጠሉ።

³⁴ያእቆብ ድማ ንኤሳው እንጌራን ጸብሒ ብርስንን ገይሩ ሀቦ። ንሱ ድማ በሊዑን ሰትዩን ተንስኤ ከደውን። ኤሳው ብኹርንኡ ኸምዚ ገይሩ ነዐቓ።