Read መ/ቅዱስ ትግርኛ, Tigrigna Bible, 1997 ኦሪት ዘፍጥረት 41 Bible Online

ኦሪት ዘፍጥረት 41 - መ/ቅዱስ ትግርኛ, Tigrigna Bible, 1997 bible

ኦሪት ዘፍጥረት 41

¹ኮነ ድማ፡ ድሕሪ ኽልተ ዓመት ፈርኦን ሐለመ፡ እንሆ ኸኣኣ ኣብ ገምገም ርባ ደው ኢሉ ነብረ።

²እንሆ ድማ ሾብዓተ ንምርኣየን ጽቡቓት፡ ስጋኤን ከኣ ስቡሓት ኣሓ ኻብቲ ርባ ወጺኤን ኣብቲ ሰልሰላ ኺበልዓ ረአየ።።

³ደድሕሪኤን ድማ እንሆ፡ ካልኦት ሾብዓተ ንምርኣየን ክፉኣትን ስጋኤን ከኣ ዓባሩ ኣሓ ኻብቲ ርባ ወጺኤን ኣብ ጥቓ እተን ቀዳሞት ኣብ ገምገም ርባ ደው በላ።

⁴እተን ንምርኣየን ክፉኣት ስጋኤን ከኣ ዓባሩ ኣሓ ነተን ሾብዓተ ንምርኣየን ጽቡቓትን ስቡሓትን ኣሓ ወሓጥኤን። ፈርኦን ድማ ተበራበረ።

⁵ደቀሰ እሞ ካልኣይ ሳዕውን ሓለመ፡ እንሆ ኸኣ፡ ኣብ ሓንቲ ብርዒ ሾብዓተ ፍሩያትን ጽቡቓትን ሰዊት ወጻ።

⁶ድሕሪኤን ከኣ እንሆ ሾብዓተ ቐጠንቲ ብንፋስ ምብራቕ ዝሀጎጓ ሰዊት ወጻ።

⁷እተን ቀጠንቲ ሰዊት ድማ ነተን ሶብዓተ ፍሩያትን ምሉኣትን ሰዊት ወሐጥኤን። ፈርኦን ከኣ ተበራበረ፡ እንሆ ድማ ሕልሚ ነበረ።

⁸ኮነ ድማ፡ ምስ ወግሔ፡ መንፈሱ ኣዕለበጠ፡ ሽዑ ልኢኹ ንኹሎም ጠቢባን ግብጽን ንኹሎም ፈላጣትን ጸውዖም። ፈርኦን ከኣ ሕልሙ ነገሮም። ንፈርኦን ዚፈትሃሉ ግና ኣይነበረን።

⁹ሽዑ እቲ ሓለቓ ኣሰለፍቲ ሚስ ንፈራኦን ከምዚ ኢሉ ተዛረቦ፡ ኣነ ሎሚ ሓጢኣተይ ዘከርኩ።

¹⁰ፈርኦን ብገላውኡ ተቖጥዔ፡ ንኣይን ንሓለቓ ሰንከትቲ እንጌራን ከኣ ናብ ቤት ሓለቓ ዘብዔኛታት ኣእተወና።

¹¹ኣነን ንሱን ብሓንቲ ለይቲ ሕልሚ ሓለምና፡ በበይኑ ዝምፍታሑ ሓልሚ ሐለምና።

¹²ኣብኡ ድማ እብራዊ ጎበዝ ባርያ ሓለቓ ዘብዔኛታት ምሳና ነበረ። ንእኡ ነገርናዮ፡ ንሱ ኽኣ ሕልምታትና ፈትሓልና፡ ንነፍሲ ወከፍ ከከም ሕልሙ ፈትሖ።

¹³ኮነ ድማ ከምቲ ዝፈትሓልና ከምኡ ኾነ። ንኣና ናብ ኣሰላፍነተይ መለሰኒ፡ ነቲ ኸኣ ሰቐሎ።

¹⁴ሽዑ ፈርኦን ልኢኹ ንዮሴፍ ጸውዖ። ቀልጢፎም ድማ ካብ ቤት ማእሰርቲ ኣውጽእዎ። ንሱ ኸኣ ተላጽዩ ኽዳኑ ለዊጡ ኣብ ፈርኦን ኣተወ።

¹⁵ፈርኦን ድማ ንዮሴፍ ሓልሚ ሓሊመ፡ ዚፈትሖ ድማ የልቦን። ኣነ ሕልሚ ምስ ሰማዕካ ኸም እትፈትሖ፡ ብዛዕባኻ ኺዛረቡ ሰሚዔ፡ በሎ።

¹⁶ዮሴፍ ድማ ንፈርኦን እዚ ኣባይ ኣይኮነን፡ ኣምላኽ ድኣ ንፈርኦን ነገር ሰላም ኪመልሰሉ እዩ፡ ኢሉ መለሰ።

¹⁷ፈርኦን ድማ ንዮሴፍ ተዛረቦ፡ እንሆ ብሕልመይ ኣብ ገምገም ርባ ደው ኢለ ነበርኩ።

¹⁸እንሆ ኽኣ ሾብዓተ ስቡሓትን መልክዔና ከኣ ጽቡቓትን ኣሓ። ካብቲ ርባ ደይበን ኣብ ሰልሰላ ይበልዓ ነበራ።

¹⁹እንሆ ድማ ደድሕሪኤን ካልኣት ሾብዓተ” ከማታተን ዝምኽፋኤን ኣብ ኩላ ሃገር ግብጺ እኳ ዘይርኤኹ፡ ዝማሰናን ትርኢተን እዝየን ክፋኣትን ዓባሩን ኣሓ ወጻ።

²⁰እተን ዓባሩን ክፉኣትን ኣሓ ድማ ነተን ሾብዓተ ቐዳሞት ስቡሓት ኣሓ ወሐጥኤን።

²¹ኣብ ከብደን ድማ ኣተዋ። ኣብ ከብደን ከም ዝኣተዋ ኸኣ የተፈልጠን፡ ትርኢተን ከም ቀደመን ክፉኣትን ነበራ። ተበራበርኩ ድማ።

²²ብሕልመይ ከኣ እንሆ፡ ሶብዓተ ፍሩያትን ጽቡቓትን ሰዊት ኣብ ሓንቲ ብርዒ ኺወጻ ርኤኹ።

²³ድሕሪኤን ድማ እንሆ፡ ዓሸልን ቀጠንትን ብንፋስ ምብራቕ ዝህጎጓ ሾብዓተ ሰዊት ወጸ።

²⁴እተን ቀጠንቲ ሰዊት ድማ ነተን ሾብዓተ ጽቡቓት ሰዊት ወሓጥኤን። እዚ ነቶም ጠቢባን ነግርክዎም ዚፈትሓለይ ከኣ ኣይነበረን።

²⁵ዮሴፍ ድማ ንፈርኦን በሎ፡ ሕልሚ ፈርኦን ሓደ እዩ። ኣምላኽ ኪገብሮ ዘለዎ ንፈርኦን ኣግሀደሉ።

²⁶እተን ሾብዓተ ጽቡቓት ኣሓ ሾብዓተ ዓመት እየን፡ እተን ሾብዓተ ጽቡቓት ሰዊት ድማ ሾብዓተ ዓመት እየን። ሓልሙ ሓደ እዩ።

²⁷እተን ደድሕሪኤን ዝወጻ ሾብዓተ ዓባሩን ክፉኣትን ኣሓ ኸኣ ሾብዓተ ዓመት እየን። እተን ዓሸል ብንፋስ ምብራቕ ዝሀጎጓ ሾብዓተ ሰዊት ድማ ሾብዓተ ዓመት ጥሜት ኪኾና እየን።

²⁸እቲ ንፈርኦን ዝነገርክዎ እዚ እዩ፡ ኣምላኽ እቲ ኺገብሮ ዘለዎ ንፈርኦን ኣርኣዩ።

²⁹እንሆ፡ ኣብ ብዘላ ሃገር ግብጺ ብዙሕ ጽጋብ ዝኾነለይ ሾብዓተ ዓመት ኪመጻ እየን።

³⁰ብድሕሪኤን ከኣ ሾብዓተ ዓመት ጥሜት ኪመጻ እየን። ብእኤን እቲ ኹሉ ጽጋብ ኣብ ሃገር ግብጺ ኺርሳዕ እዩ። እቲ ጥሜት ከኣ ነታ ሀገር ኪውድኣ እዩ።

³¹ንሱ ኣዝዩ ኺብርትዕ እዩ እሞ፡ ካብቲ ድሕሪት ዚኸውን ጥሜት እተላዕለ እቲ ኣብታ ሃገር ዝነብረ ጽጋብ ኣይፍለጥን።

³²እቲ ፈርኦን ካልኣይ ሳዕ ደጊሙ ምሕላሙ እቲ ነግር ካብ ኣምላኽ ስለ እተቖርጸ እዩ፡ ኣምላኽ ከኣ ቀልጢፉ ኺገብሮ እዩ።

³³ሕጂ ድማ ፈርኦን ኣስተውዓልን ፈላጥን ሰብኣይ ይድለ እሞ፡ ኣብ ምድሪ ግብጺ ይሽሞ።

³⁴ፈርኦን ድማ በዘን ሾብዓተ ዓመት ጽጋብ ካብ ፍርያት ምድሪ ግብጺ ሓምሳይ ኣፍ ዜውጽኡ ኣዘዝቲ ኣብ ሃገር ይሽም።

³⁵ናይዘን ዝመጻ ዝለአዋ ዓመታት ጽጋብ ዝብላዕ ዝኾነ ኹሉ ይአክቡ። እቲ እኽሊ ድማ ንቐለብ ኪኸውን ኣብ ትሕቲ ኢድ ፈርኦን ኣብ ከተማያይ ይደለብ፡ ይሓልውዎ ኽኣ።

³⁶እቲ እኽሊ ድማ ኣብ ምድሪ ግብጺ ዚመጻ ሾብዓተ ጥሜት ነታ ሃገር ኪኸውን ይተዐቖር እታ ሃገር ከኣ ብጥሜት ኣይትጠፍእን።

³⁷እዚ ነግርዚ ድማ ኣብ ቅድሚ ፈርኦን ኣብ ቅድሚ ኹሎም ገላውኡን ጽቡቕ ኮነ።

³⁸ፈርኦን ከኣ ንገላውኡ፡ ከምዚ ዝበለ መንፈስ ኣምላኽ ዘለዎ ሰብኣይ ዶኾን ንረክብ፡ በሎም።

³⁹ፈርኦን ድማ ንዮሴፍ፡ ኣምላኽ እዚ ኹሉ ንኣኻ ኻብ ኣፍለጠካ ከማኻ ዝበለ ኣስተውዓልን ፈላጥን የልቦን።

⁴⁰ስንኻ ኣብ ልዕሊ ቤተይ ኩን ኩሉ ህዝብን ንቓልካ ይተኣዘዝ ኣነ ብዝፋነይ ጥራይ እየ ኻባኻ ዚዐቢ፡ በሎ።

⁴¹ፈርኦን ከኣ ንዮሴፍ ርኤ፡ ኣብ ልዕሊ ኹላ ሃገር ግብጺ ሸይመካ ኣሎኹ በሎ።

⁴²ፈርኦን ድማ ቀለቤቱ ኻብ ኢዱ ኣውጺኡ ናብ ኢድ ዮሴፍ ገብረሉ፡ ሻሽውን ከደኖ፡ ኣብ ክሳዱ ኸኣ ድሪ ወርቂ ገበረሉ።

⁴³ናብ ካላእይቲ ሰረገላኡ ድማ ኣወጥሖ፡ ቀቅድሚኡ ኸኣ ስገድ ኢሎም ጨደሩ። ኣብ ልዕሊ ኹላ ሃገር ግብጺውን ሸሞ።

⁴⁴ፈራኦን ድማ ንዮሴፍ፡ ኣነ ፈርኦን እየ፡ ኣብ ዝበላ ምድሪ ግብጺ ብዘይ ፍቓድካ ኢዱ ወይስ እግሩ ኣየልዕል፡ በሎ።

⁴⁵ፈርኦን ከኣ ንዮሴፍ ስሙ ጻፍናት ጳዕናሕ ኣውጻኣሉ። ኣስናት፡ ጓል ጴጡፌራዕ ካህን ኦን፡ ሰበይቲ ኽትኮኖ ሀቦ። ዮሴፍ ከኣ ናብ ምድሪ ግብጺ ወጸ።

⁴⁶ዮሴፍ እቲ ኣብ ቅድሚ ፈርኦን ንጉስ ግብጺ ደው ኪብል ከሎ፡ ወዲ ሰላሳ ዓመት ነበረ። ዮሴፍ ካብ ቅድሚ ፈርኦን ወጺኡ ናብ ብዘላ ምድሪ ግብጺ ዞረ።

⁴⁷እታ ምድሪ ዳ በተን ሾብዓተ ዓመት ጽጋብ ብዙሕ ሓፍሽ ሀበት።

⁴⁸ኣብ ምድሪ ግብጺ ዝነበረ ኹሉ ናይተን ሾብዓተ ዓመት እኽሊ ድማ ኣከበ፡ እቲ እኽሊ ቑጽሪ ዜብሉ ነበረ እሞ፡ ምቑጻር ክሳዕ ዚሓድጎ፡ ከም ሑጻ ባሕሪ ኣዝዩ ብዙሕ ኣከበ።

⁴⁹ገና ዓመት ጥሜት ከመጸት ከላ ኣሰናት ጋል ጳጢፌራዕ ካህን ኦን ዝወለድትሉ፡ ንዮሴፍ ክልተ ወዲ ተወልድሉ።

⁵⁰ገና ዓመት ጥሜት ከመጸት ከላ ኣሰናት ጋል ጳጢፌራዕ ካህን ኦን ዝወለድትሉ፡ ንዮሴፍ ክልተ ወዲ ተወልድሉ።

⁵¹ዮሴፍ ድማ ኣምላኽ ኩሉ መከራይን ኩሉ ቤት ኣቦይን ኣረሲዑኒ እዩ እሞ፡ ኢሉ ስም እቲ በኹሪ ምናሴ ኣውጽኣሉ።

⁵²ነቲ ኻልኣይ ድማ፡ እግዚኣብሄር ኣብ ምድሪ መከራይ ኣፍርዩኒ፡ ኢሉ ስሙ ኤፍሬም ኣውጽኣሉ።

⁵³እተን ኣብ ምድሪ ግብጺ ዝነበራ ሾብዓተ ዓመት ጽጋብ ከኣ ሐለፋ።

⁵⁴ከምቲ ዮሴፍ ዝበሎ ድማ፡ እተን ሾብዓተ ዓመት ጥሜት ኪኣትዋ ጀመራ። ኣብ ኩለን ሃገራት ከኣ ጥሜት ኮነ። ኣብ ብዘላ ምድሪ ግብጺ ግና እንጌራ ነበረ።

⁵⁵ኩላ ሃገር ግብጺ ምስ ጠመየት ድማ፡ እቲ ህዝቢ ብዛዕባ እንጌራ ናብ ፈራኦን ጠርዔ። ፈርኦን ከኣ ንኹሎም ግብጻውያን ናብ ዮሴፍ ኪዱ እሞ ንሱ ዚብለኩም ግበሩ በሎ።

⁵⁶ኣብ ልዕሊ ኹላ ምድሪ ድማ ጥሜት ኮነ። ዮሴፍ ከኣ ኩሉ ሪቕ ከፊቱ፡ ንግብጻውያን እኽሊ ሸጠሎም። እቲ ጥሜት ኣብ ኩላ ምድሪ ኣናበርትዔ ኸደ እሞ ካብ ኩለን ሃገራት እኽሊ ኺሽምቱ፡ ናብ ዮሴፍ ናብ ግብጺ ይመጹ ነበሩ።