Read መ/ቅዱስ ትግርኛ, Tigrigna Bible, 1997 መጽሓፍ ኣስቴር 6 Bible Online

መጽሓፍ ኣስቴር 6 - መ/ቅዱስ ትግርኛ, Tigrigna Bible, 1997 bible

መጽሓፍ ኣስቴር 6

¹እቲ ንጉስ በታ ለይቲ እቲኣ ድቃስ ዜልቦ ሓደረ፡ እቲ መጽሓፍ ዜና መዋእል መዘከርታ ኼምጽኣሉ ኸአ ኣዘዘ። ኣብ ቅድሚ እቲ ንጉስ ከአ ተነብበ።

²እቶም ክልተ ናይ ንጉስ ስሉባት ኣጋፈርቲ ሕልፍኚ፡ ቢግታናን ተረሽን፡ ኢዶም ኣብ ንጉስ ኣሓሽዌሮስ ኪዝርግሑ ኸም ዝሐሰቡ፡ ማርዶካይ ከአ ከም ዝነገሮ ተጽሒፉ ተረኸበ።

³ሽዑ ንጉስ፡ ንማርዶካይ ብዛዕባ እዚ ኸመይ ዝበለ ኽብረትን ዕቤትን ተገብረሉ፡ በለ። እቶም ዜገልግልዎ ዝነበሩ ገላው ንጉስ ድማ፡ ገለ ነገር እኳ ኣይተገብረሉን፡ በሉ።

⁴እቲ ንጉስ ከአ፡ ኣብ መካበብያ መን ኣሎ፡ በለ። ሃማን ንማርዶካይ ኣብቲ ንእኡ ዘዳለወሉ ጉንዲ ኺሰቕልዎ፡ ንንጉስ ኪነግር ኢሉ፡ ናብቲ ወጻኢ መካበብያ ቤት ንጉስ ኣትዩ ነበረ።

⁵እቶም ገላው ንጉስ ድማ፡ እንሆ፡ ሃማን ኣብ መካበብያ ደው ኢሉ ኣሎ፡ ብልዎ። ንጉስ ከአ፡ ይእቶ በለ።

⁶ሃማን ድማ ኣተወ። ንጉስ ከአ፡ ንጉስ ኬኽብሮ ንዝደለዮ ሰብ እንታይ ኺገብረሉ ይግባ፡ በለ። ሃማን ድማ ብልቡ፡ ንጉስ ካብ ንኣይ ንመን ኬኽብር ምፈተወ፡ ኢሉ ሐሰበ።

⁷ሃማን ድማ ንንጉስ፡ ንጉስ ኬኽብሮ ንዝፈተዎ ሰብስ፡

⁸ንጉስ ዚኽደኖ ልብስ መንግስቲ፡ ንጉስ ዚውጥሖ ፈረስ የምጽኡሉ፡ ኣብ ርእሱ ድማ ዘውዲ ንጉስ ይድፍኡሉ።

⁹እቲ ኽዳንን እቲ ፈረስን ከአ ኣብ ኢድ ሓደ ኻብቶም ክቡራት ሹማምቲ ንጉስ ይወሀብ እሞ፡ ነቲ ንጉስ ኬኽብሮ ዚደሊ ሰብ ድማ ይኽደንዎ፡ ኣብ ፈረስ ኣወጢሖምውን ብአደባባይ እታ ኸተማ የሕልፍዎ፡ ኣብ ቅድሚኡ ኸአ፡ ነቲ ንጉስ ኬኽብሮ ዝደለዮ ሰብ ከምዚ ይግበረሉ፡ ኢሎም ኣዋጅ ኣወጁ በሉ።

¹⁰ሽዑ ንጉስ ንሃማን፡ ቀልጢፍካ ልብስን ፈረስን ውሰድ፡ ነቲ ኣብ ደገ ንጉስ ኮፍ ኢሉ ዘሎ ኣይሁዳዊ ንማርዶካይ ከምቲ እተዛረብካዮ ኸምኡ ገብረሉ። ካብዚ ዝበልካዮ ሓደ እኳ ኣይጎደል፡ በለ።

¹¹ሃማን ድማ እቲ ኽዳንን እቲ ፈረስን ወሰደ። ንማርዶካይ ድማ ኸደኖ፡ ናብ ፈረስውን ኣወጥሖ፡ ኣብ ኣደባባይ እታ ኸተኣ ድማ ኣብ ቅድሚኡ፡ ንጉስ ኬኽብሮ ንዝደለየ ሰብ ከምዚ ይግበረሉ፡ እናበለ ኣዋጅ ነገረ።

¹²ማርዶካይ ድማ ናብ ደገ ንጉስ ተመልሰ፡ ሃማን ግና ጉህዩ ርእሱ ተጎልቢቡ ቐልጢፉ ናብ ቤቱ ኸደ።

¹³ሃማን ከአ እቲ ዝወረዶ ኹሉ ንዘረሽ ሰበይቱን ንኹሎም ፈተውቱን ኣዘንተወሎም። እቶም ጠቢባኑን ዘረሽ ሰበይቱን ድማ፡ ማርዶካይ እቲ ኣብ ቅድሚኡ ኽትወድቕ ጀሚርካ ዘሎኻ፡ ካብ ዘርኢ ኣይሁድ እንተ ደአ ኾይኑ፡ ፈጺምካ ኣብ ቅድሚኡ ኽትወድቕ ኢኻ እምበር፡ ንእኡስ ገለ ኽትገብሮ ኣይትኽእልን ኢኻ በልዎ።

¹⁴ገና ንሳቶም ምስኡ ኺዛረቡ ኸለው፡ እቶም ናይ ንጉስ ስሉባት መጹ፡ ንሃማን ናብቲ ኣስቴር ዘዳለወቶ ምሳሕ ኬምጽእዎ ሀወኽዎ።