Read መ/ቅዱስ ትግርኛ, Tigrigna Bible, 1997 ኦሪት ዘጸአት 12 Bible Online

ኦሪት ዘጸአት 12 - መ/ቅዱስ ትግርኛ, Tigrigna Bible, 1997 bible

ኦሪት ዘጸአት 12

¹እግዚኣብሄር ድማ ንሙሴንን ናሮንን ኣብ ምድሪ ግብጺ ኸምዚ ኢሉ ተዛረቦም።

²ኣብዛ ወርሒ እዚኣ ንኣኻትኩም መጀመርታ ኣዋርሕ ትኹን፡ ንሳ መጀምርታ ኣዋርሕ ዓመት ትኹንኩም።

³ንኹሉ ኣኸኢባ እስራኣኤል ከምዚ ኢልኩም ተዛረቡ፡ ኣብዛ ወርሒ እዚኣ ብዓስረይቲ መዓልቲ ነፍ ወከፍ ንቤት ኣቦ ሓደ ገንሸል ነንቤት ሓደ ገንሸል ይውሰድ።

⁴እቶም ስድራ ቤት ንሓደ ገንሸል ዚውሕዱ እንተ ኾኑ፡ ንሱን እቲ ቤቱን ዝቐረበ ጎረቤቱን ብቑጽሪ ነፍሳት ሓደ ይውሰድ። ነፍስ ወከፍ ከም ዚበልዕ መጠን ኣብቲ ገንሸል ቁጸሩ።

⁵ዓመት ዝገበረ፡ ጎደሎ ዜብሉ ተባዕታይ ገንሸ ይኹነልኩም። ካብ ኣባጊዕ ወይ ካብ ኣጣል ትወስዱ።

⁶ኣብዛ ወርሒ ኢዚኣ ኸኣ ኽሳዕ መበል ዓሰርተው ኣርባዕተ መዓልቲ ሓልውዎ። ሽዑ ኹሉ እቲ እኩብ ማሕበር እስራኤል ኪመሲ ኸሎ ይሕረዶ።

⁷ኣብታ ዚብልዓ ቤት ድማ፡ ካብቲ ደሙ ወሲዶም ንኽልቲኦም ቐዋሚ ልዳትን ነቲ ላዕላይ ልዳትን ይልከይዎ።

⁸ነቲ ስጋኡ ድማ በቲ ለይቲ እቲኣ ይብልዎ፡ ብሓዊ ጠቢሶም፡ ምስ ቅጫን ምስ መሪር ሓምልን ይብልዕዎ።

⁹ምስናይ ርእሱን ኣእጋሩን ናውቲ ኸብዱን ብሓዊ ይጠበስ ኣምበር፡ ካብቲ ዝሕላ ኾነ፡ ካብቲ ብማይ ዝበሰለ ኣይትብልዑ።

¹⁰ካብኡ ድማ ገለ እኳ ኽሳዕ ንግሆ ኣይተትርፉ። እቲ ኻብኡ ኽሳዕ ንግሆ ዝተረፈ ኸኣ ንሓዊ ኣንድድዎ።

¹¹ከምዚ ጌርኩም ድማ ከተብልዕዎ ኢኹም፡ ሓቛቕኹም ተዐጢቕኩም፡ እሳእንኩም ኣብ ኣእጋርኩም፡ ኣባትርኩም ከኣ ኣብ ኣእዳውኩም ሒዝኩም ቀልጢፍኩም ብልዕዎ። ንሱ ፋስጋ እግዚኣብሄር እዩ።

¹²በዛ ለይቲ እዚኣ ብምድሪ ግብጺ ኽሓልፍ እየ፡ ካብ ሰብ ክሳዕ እንሳሳ፡ ንኹሉ በኹሪ ሃገር ግብጺ ኽወቅዕ ኣብ ኩሎም ኩሎም ኣማልኽቲ ግብጺ ኸኣ ፍርድታት ክገብር እየ። ኣነ እግዚኣብሄር እየ።

¹³ንምድሪ ግብጺ ምስ ዝወቅዕ ድማ፡ ኣብተንን ዘሎኹምወን ኣባይቲ እቲ ደም ምልክት ይኹንኩም፡ ነቲ ደም ርእየ ኽሓልፈኩም እየ። እቲ ዚጥፍእ መዓትውን ኣባኻትኩም ኣይከውንን።

¹⁴እዛ መዓልቲ እዚኣ ድማ ንመዘከርታ ትኹነልኩም፡ ንእግዚኣብሄር ከኣ ተብልዕዋ። ሕጊ ዘለኣለም ጌርኩም ንውሉድ ወለዶ ኣብልዕዋ።

¹⁵ሾብዓተ መዓልቲ ቕጫ ትበልዑ። ካብታ ቐዳመይቲ መዓልቲ ክሳዕ እታ ሳብዐይቲ መዓልቲ ብኹዑ ዝበልዔ ዘበለ፡ እታ ነፍሲ እቲኣ ኻብ እስራኤል ክትቁረጽ እያ እሞ፡ በታ ቐዳመይቲ መዓልቲ ነቲ ማይ ብሑቑ ካብ ኣባይትኹም ኣውጽኡ።

¹⁶በታ ቐዳመይቲ መዓልቲ ቅዱስ ኣኼባ፡ በታ ሳብዐይቲ መዓልቲ ድማ ቅዱስ ኣኼባ፡ በታ ይኹነልኩም። ብኣታተን ገለ ዕዩ ኣይገበር። እቲ ንነፍስ ወከፍ ዚበልዖ ንሱ ጥራይ ይተዐየየልኩም።

¹⁷ነዚ በዓል ቅጫ ሓልውዎ። በዛ መዓልቲ እዚኣ ብሰራዊትኩም ካብ ምድሪ ግብጺ ኣውጺኤዮ እየ እሞ፡ ነዛ መዓልቲ እዚኣ ንውሉድ ወለዶ ሕጊ ዘለኣለም ጌርኩም ሓልውዋ።

¹⁸ኣብታ ቐዳመይቲ ወርሒ ካብታ ወርሒ ድማ ንመበል ኦኣሰርተው ኣርባዕተ መዓልቲ ምሸት፡ ክሳዕ መበል ዕስራን ሓደን መዓልቲ ምሸት ኣብታ ወርሒ፡ ቕጫ ኽትበልዑ ኢኹም።

¹⁹ወሰንተኛ እንተ ኾነ፡ ወይ ወዲ ዓዲ ብኹዕ ዝበልዔ ዘበለ፡ እታ ነፍሲ እቲኣ ኻብ ኣኼባ እስራኤል ኣብ ኣባይትኹም ማይ ብሑቑ ኣይረኸብ።

²⁰ገለ እኳ ብኹዕ ኣይትብልዑ፡ ኣብ ኩሉ እትነብርዎ ቕጫ ብልዑ።

²¹ሙሴ ድማ ንኹሎም ዓበይቲ እስራኤል ጸዊዑ በሎም፡ ነንማይ ቤትኩም ገንሸል ሓሪኹም ውሰዱ እሞ ፋሲጋ ሕረዱ።

²²ዕትርቲ ስምዕዛ ውሰዱ፡ ኣብቲ ኣብ ጭሔሎ ዘሎ ደም ከኣ ጥምዕዎ፡ ነቲ ላዕላይ ልዳትን ንኽልቲኡ ቀዋሚ ልዳትን በቲ ኣብ ጭሔሎ ዝለኦ ደም ልኸይዎ። ክሳዕ ብጊሓት ድማ ኻባኻትኩም ሓደ ሰብ እኳ ኣብ ኣፍ ቤቱ ኣይውጻእ።

²³እግዚኣብሄር ንግብጻውያን ኪወቅዕ ኪሓልፍ እዩ እሞ፡ ነቲ ደም ኣብ ላዕላይ ልዳትን ኣብ ክልቲኡ ቀዋሚ ልዳትን ምስ ረኣየ፡ እግዚኣብሄር ነታ ደገ ኺሐልፉ እዩ፡ ነቲ ዜጥፍእ ድማ ናብ ቤትኩም ኣትዩ ኺወቕዓኩም ኣይሕድጎን።

²⁴ኣዚ ነገርዚ ንኣኻን ንደቅኽን ሕጊ ዘለኣለም ጌርኩም ሐልውዎ።

²⁵ኪኸውን ከኣ እዩ፡ ናብታ እግዚኣብሄር ዚህበኩም ምድሪ ምስ ኣቶኹም፡ ከምቲ እተዛረቦ፡ ነዚ ኣገልግሎት እዚ ሓልው።

²⁶ንስኻትኩም ከኣ፡ እዚ ነቲ ግብጻውያን ኪወቅዕ ከሎ፡ ኣብ ግብጺ ኣባይቲ ደቂ እስራኤል ዝሐለፈ፡ ኣባይትና ድማ ዘድሐነ እግዚኣብሄር መስዋእቲ ፋስጋ እዩ፡ ትብሉ። እቲ ህዝቢ ኸኣ ፍግም ኢሉ ሰገደ።

²⁷ደቂ እስራኤል ድማ ከይዶም ከምኡ ገበሩ። ከምቲ እግዚኣብሄር ንሙሴን ንኣሮንን ዝኣዘዞም ገበሩ።

²⁸ደቂ እስራኤል ድማ ከይዶም ከምኡ ገበሩ። ከምቲ እግዚኣብሄር ንሙሴን ንኣሮንን ዝኣዘዞም ገበሩ።

²⁹ፍርቂ ለይቲ ምስ ኮነ እግዚኣብሄር ንኹሉ በኹሪ ሃገር ግብጺ፡ ካብቲ ኣብ ዝፋንይ ዚቕመጥ በኹሪ ፈርኦን ክሳዕ በኹሪ ኣቲ ኣብ ቤት ማእሰርቲ ዘሎ እሱር፡ ንኹሉ በኹሪ እንስሳ ድማ ቐተለ።

³⁰ሽዑ ፈርኦን፡ ንሱን ኩሎም ገላውኡን ኩሎም ግብጻውያንን ብለይቲ ተንስኡ። ምውት ዜብላ ቤት ኣይነበረትን እሞ፡ ኣብ ግብጺ ብርቱዕ ዋይዋይታ ኾነ።

³¹ንሙሴን ንኣሮንን ብለይቲ ጸዊዑ ድማ፡ ንስኻትኩም ደቂ እስራኤልን ተንስኡ እሞ ካብ ማእከል ህዝበይ ውጹ። ከምቲ ዝበልኩምዎ ኺዱ፡ ንእግዚኣብሄር ኣገልግሉ።

³²ከምቲ ዝበልኩምዎ ድማ ኣባጊዕኩም ኣሓኹምን ውሰዱ። ኪዱ እሞ ንኣይ ከኣ መርቑኒ፡ በለ።

³³እቶም ግብጻውያን ድማ፡ ኹልና ኽንመውት ኢና፡ ኢሎም ነቶም ህዝቢ ኻብታ ሃገር ቀልጢፎም ኬውጽእዎም ሀወኽዎም።

³⁴እቶም ህዝቢ ድማ ነቲ ብሒቖም ገና ኸይበኹዔ ወሰድዎ፡ ነቲ መልወሲኦም ከኣ ብኽዳውንቶም ጠቕሊሎም ኣብ መንኩቦም ጸርዎ።

³⁵ደቂ እስራኤል ከኣኣ ከምቲ ሙሴ ዝበሎም ገበሩ። ካብ ግብጻዋያን ኣቓሑ ብሩርን ኣቓሑ ወርቅን ክዳውንትን ለመኑ።

³⁶እግዚኣብሄር ድማ ነቶም ህዝቢ ዝደለይዎ ኹሉ ኺህብዎም ኣብ ቅድሚ ሰብ ግብጺ ሞጎስ ሀቦም። ንሰብ ግብጺ ኸኣኣ ገፈፍዎም።

³⁷ደቂ እስራኤል ድማ ብዘይ ቑልዑ ሸድሹተ ሚእቲ ሽሕ ዚኣክል ኣጋር ካብ ራዕምሴስ ናብ ሱኮት ተጓዕዙ።

³⁸ምስኦም ድማ ብዙሕ ሕውስዋስ ህዝብን ኣባጊዕን ኣሓን፡ ኣዝየን ብዙሓት ማል ደየበ።

³⁹ኣቲ ካብ ግብጺ ዘውጽእዎ ብሑቑ ኣይበኹዔን ነበረ እሞ፡ ካብኡ ቅጫታት ሰንከቱ። ካብ ግብጺ ስለ ኣተሰጉ፡ ኪድንጉዩ ኣይከኣሉን እሞ፡ ስንቆም ኣየዳለውን ነበሩ።

⁴⁰ደቂ እስራኤል ኣብ ግብጺ ተቐሚጦም ዝነበሩ ኣርባዕተ ሚእትን ሰላሳን ዓመት ኣዩ።

⁴¹ኮነ ኸኣ፡ ኣብ መወዳእታ እተን ኣርባዕተ ሚእትን ሰላሳን ዓመት፡ በታ መዓልቲ ኣቲኣ ኾነ፡ ኹሎም ሰራዊት ኣግዚኣብሄር ካብ ምድሪ ግብጺ ወጹ።

⁴²እዛ ለይቲ እዚኣ፡ ብእኣ ብብኹሎም ደቂ እስራኣኤል ንውሉድ ወለዶኦም ፍጹም ንእግዚኣብሄር እተሓለውት እያ።

⁴³እግዚኣብሄር ድማ ንሙሴን ንኣሮንን በሎም፡ ሕጊ ፋሲጋ እዚ እዩ፡ ጓና ዘበለ ኻብኡ ኣይብላዕ።

⁴⁴ብገንዘብ እተዐደገ ባርያ ግና፡ ምስ ገዘርካዮ፡ ካባኡ ይብላዕ።

⁴⁵ስደተኛን በዓል ዓስብን ካብኡ ኣይብሎኡ።

⁴⁶ኣብ ሓንቲ ቤት ይብላዕ፡ ካብቲ ስጋ ገለ እኳ ኻብ ንግዳም ኣይተውጽእ፡ ዓድሚ ድማ ኣይትስበሩ።

⁴⁷ኩሉ ኣኼባ እስራኤል ነዚ ይግበሮ።

⁴⁸ጓና ምሳኻ እንተ ተቐመጠ እሞ ንእግዚኣብሄር ፋሲጋ ኺገብር እንተ ደለየ፡ ምስኡ ዘሎ ተባዕታይ ዘበለ ኹሉ ይገዘር፡ ሽዕ ኺገብር ይቕረብ፡ ከም ወዲ ዓዲ ኸኣ ይኹን። ዝይግዙር ዘበለ ግና ካብኡ ኣይብላዕ።

⁴⁹ንወዲ ዓድን ኣብ መንጎኹም ንዚነብር ጓናን ሓደ ሕጊ ይኹን።

⁵⁰ኩሎም ደቂ እስራኤል ድማ እዚ ገብሩ። ከምቲ እግዚኣብሄር ንሙሴን ንኣሮንን ዝኣዘዞም፡ ከምኡ ገበሩ።

⁵¹ኮነ ኸኣ፡ ንእግዚኣብሄር በታ መዓልቲ እቲኣ ንደቂ እስራኤል በብሰራዊቶም ካብ ምድሪ ግብጺ ኣውጽኤ።