Read መ/ቅዱስ ትግርኛ, Tigrigna Bible, 1997 ኦሪት ዘጸአት 15 Bible Online

ኦሪት ዘጸአት 15 - መ/ቅዱስ ትግርኛ, Tigrigna Bible, 1997 bible

ኦሪት ዘጸአት 15

¹ሽዑ ሙሴን ደቂ እስራኤል እዚ መዝሙር እዚ ንእግዚኣብሄር ከምዚ ኢሎም ዘመሩሉ፡ ንሱን ኣዝዩ ኽብ ኢሉ እዩ እሞ፡ ንእግዚኣብሄር እዝምር ኣሎኹ። ንፈረስን ፈረሰኛን ናብ ሃሕሪ ደርበዮም።

²እግዚኣብሄር ሓይለይ መዝሙረይን እዩ። ምድሓነይ ከኣ ኮነኒ እዚ ኣምላኸይ እዩ እሞ፡ ከኽብሮ እየ። ኣምላኽ ኣቦይ እዩ እሞ ክብ ከብሎ እየ።

³እግዚኣብሄር ተዋጋኢ እዩ፡ስሙ እግዚኣብሄር እዩ።

⁴ሰረገላታት ፈርኦንን ሰራዊቱን ናብ ባሕሪ ደርበዮም፡ እቶም ሕሩያት ሓለቓታቱ ኣብ ባሕሪ ኤርትራ ጠሓሉ።

⁵መዓሙቑ ከደኖም፡ ከም እምኒ ናብ ታሕቲ ወረዱ።

⁶ጐይታይ የማነይትኻ ብሓይላ ኸበረት፡ ጐይታይ፡ የማነይትኻ ንጸላኢ ቐጥቀጠቶ።

⁷ብዕቤት ግርማኻ ንዝተንስኡኻ ጨፍለቕካዮም፡ ቑጥዓኻ ሰደድካ፡ ከም ሓሰር በልዓቶም።

⁸ብትንፋስ ኣፍንጫኻ ማያት ተኾመሩ። ወሓዝቲ ኸኣ ከም ኩምራ ደው በሉ፡ ማያት መዓሙቕ ድማ ኣብ ማእከል ባህሪ ረግኡ።

⁹እቲ ጸላኢ ኸኣ፡ ገስጊሰ ኸርክቦም እየ፡ ምርኮ ኺመቅል እየ። ነፍሰይ ከኣ ብእኦም ትጸግብ፡ ሴፈይ እመልሕ፡ ኢደይ ድማ ተጥፍኦም በለ

¹⁰ብንፋስካ ኣንፈስካ፡ ባሕሪ ድማ ኣጎልበቦም። ከም ዓረር ኣብ ብርቱዕ ማያት ጠሓሉ።

¹¹ዎ እግዚሄር ኣብ መንጎ ኣማልኽቲ ከማኻ ዝበለ መን እዩ፡ ብምስጋና ኣተፈራህካ፡ ገበር ታኣምራት፡ ብቕድስናኻ ኸማኻ ዝኸበረ መን እዩ፡

¹²የመነይትኻ ዘርጋሕካ፡ ምድሪ ወሐጠቶም።

¹³ነቲ እተበጆኻዮ ህዝቢ ብምሕረትካ መራሕካ። ብሓይልኻ ናብ ቅዱስ ማሕደርካ መራሕካዮም።

¹⁴ህዝብታት ሰሚዖም ተምበድበዱ፡ ኣብ ፍልስጤኤም ዚነብሩ ጭንቀት ሓዞም።

¹⁵ሽዑ ሓላቑ ኤዶም ተሸበሩ፡ ነቶም ሓያላት ሞኣብ ራዕዲ ሒዞም። ኣብ ከነኣን ዚነብሩ ኹሎም መኸኹ።

¹⁶ዎ እግዚኣብሄር፡ ህዝብኻ ኽሳዕ ዚሓልፍ፡ እቲ ዘጥሬኻዮ ህዝቢ ኽሳዕ ዚሓልፍ፡ ስምባድን ፍርሃትን ወደቆም፡ ብሓይሊ ቕልጽምካ ኸኣኣ ከም እምኒ ትም ይብሉ።

¹⁷ዎ እግዚኣብሄር ናብታ ንማሕደርካ ዝገበርካያ ቦታ፡ ጐይታይ፡ ናብቲ ኣእዳውካ ዘዳለዋኦ መቕደስ፡ ኣብ ከረን ርስትኻ ተእትዎምን ትተኽሎምን፡

¹⁸እግዚኣብሄር ንወርትግ፡ ንዘለኣለም ይነግስ።

¹⁹ኣፍራስ ፈርኦን ምስ ሰረገላታቱን ፈረሰኛታቱን ናብ ባሕሪ ኣተው፡ እዝጋኢብሄር ድማ ነቲ ማያት ባሓሪ ናብ ልዕሊኦም መለሶ፡ ደቂ እስራኣኤል ግና ብማኣከል ባሕሪ ብንቑጽ ሐለፉ።

²⁰ነብዩት ማርያም ሓብቲ ኣሮን ከኣ ከበሮ ብኢዳ ወሰደት፡ ኩለን ኣንስቲ ድማ ብኸበሮን ብሳዕስዒትን ደድሕሪኣ ወጻ።

²¹ሚርያም ከኣ መለስትሎም፡ ንሱ ኣዝዩ ክብ ዝበለ እዩ፡ ንፈረስን ንፈረሰኛታትን ናብ ባሕሪ ደርብዩ እዩ እሞ፡ ንእግዚኣብሄር ዘምሩሉ።

²²ሙሴ ድማ ንእስራኤል ካብ ባሕሪ ኤርትራ ኣንቀሎም፡ ናብ በረኻ ሹር ወጹ። ሰለስተ መዓልቲ በረኻ ኸዱ፡ ማይ ከኣ ኣይረኸቡን።

²³ናብ ማራ ድማ መጹ፡ ማይ ማራ መሪር ነበረ እሞ፡ ኪሰትይዎ ኣይከኣሉን። ብዛዕባዚ ስማ ማራ ተባህለት።

²⁴እቶም ህዝቢ ኸኣኣ ንሙሴ እንታይ ክንሰቲ ኢና፡ ኢሎም ኣጉረምረሙሉ።

²⁵ንሱ ኸኣ ናብ እግዚኣብሄር ተማህለለ። እግዚኣብሄር ድማ ሓንቲ ኦም ኣርእዩ፡ ናብቲ ማይ ደርበያ፡ እቲ ማይ ከኣ መቀረ። ኣባኡ ሕግን ስርዓትን ገበረሎም፡ ኣብኡ ኸኣ ፈተኖም

²⁶በለ ድማ፡ ድምጺ እግዚኣብሄር ኣምላኽካ ተጠንቂቕካ እንተ ገብርካ፡ ንትእዛዛቱውን ጽን ኣንተ በልካ፡ ኩሉ ሕጋጋቱ ድማ ኣንተ ሓሎኻ፡ ኣነ እግዚኣብሄር ፈዋሲኻ እየ እሞ፡ እቲ ናብ ግብጻውያን ዝሰደድክዎ ሓማም ኣይትሰደልካን እየ።

²⁷ናብ ኤሊም ድማ ወጹ፡ ኣብኣ ዓሰርተው ክልተ ዓይኒ ማይን ሰብዓ ኦም ተምርን ነበረ። ኣብኣ ኸኣ ኣብ ጥቓ ማይ ሰፈሩ።