Read መ/ቅዱስ ትግርኛ, Tigrigna Bible, 1997 ኦሪት ዘጸአት 16 Bible Online

ኦሪት ዘጸአት 16 - መ/ቅዱስ ትግርኛ, Tigrigna Bible, 1997 bible

ኦሪት ዘጸአት 16

¹ኩሎም ኣኼባ ደቂ እስራኤል ድማ ካብ ኤሊም ነቒሎም፡ ካብ ምድሪ ግብጺ ምስ ወጹ፡ ኣብ ካልኣይቲ ወርሒ፡ ኣብ መበል ዓሰርተው ሓሙሽተ መዓልቲ፡ ኣብ መንጎ ኤልምን ሲናን ናብ ዘላ በረኻ ሲን መጹ።

²ኩሎም ኣኬባ ደቂ እሰራኤል ድማ ኣብቲ በረኻ ንሙሴን ኣሮንን ኣጉረምረሙሎም።

³ደቂ እስራኤል ከኣ፡ እቲ ኣብ ጥቃ ቑራዕ ስጋ ኾፍ ኢልና እንጌራ ኽሳዕ ኣንጸግብ ክንበልዕ ከሎና፡ ብኢድ እግዚኣብሄር ኣብ ምድሪ ግብጺ እንተ ንመውት መንምሀበና። ንስኻቱም ነዚ ኹሉ ኣኺባ ብጥሜት ክትቀትሉ ናብ በረኻ ኣውጻእኩምና በልዎም።

⁴ሽዑ እግዚኣብሄር ንሙሴ በሎ፡ እንሆ፡ ኣነ ኻብ ሰማይ እንጌራ ኽዝንመልኩም እየ። እቶም ህዝቢ ብሕገይ ዚኸዱ እንተ ኾኑ፡ ወይስ እንተ ዘይኮኑ፡ ምእንቲ ኽፍትኖምሲ እናወጹ ነንመዓልቱ ዜድሊ ይእረዩ።

⁵ኪኸውን ድማ እዩ፡ ብሳድሰይቲ መዓልቲ ኼዳልው ዘምጽእዎ ነቲ ነንመዓልቲ ዚርእይዎ ኻዕበቱ ይኹን።

⁶ሙሴን ኣሮንን ድማ ንኹሎም ደቂ እስራኤል እግዚኣብሄር ካብ ምድሪ ግብጺ ኸም ዘውጽኣኩም፡ ምሽት ክትፈልጡ ኢኹም።

⁷ብጊሓት ከኣ ክብሪ እግዚኣብሄር ክትሪኡ ኢኹም። እቲ ንእግዚኣብሄር ምጉሩምራምኩም ሰሚዕዎ እዩ እሞ፡ ንኣና እተጉረምርሙልናስ፡ ንሕና እንታይ ኢና በልዎም።

⁸ሙሴ ድማ እዚ እግዚኣብሄር ምሸት ስጋ ንምብላዕ ብጊሓት ከኣ እንጌራ ንምጽጋብ ንኣኻትኩም ብምሃቡ እዩ ዝኸውን። እግዚኣብሄር እቲ ዘጉረምረምኩምሉ ምጉርምራም ሰሚዕዎ እዩ እሞ ንሕና እንታይ ኢና፡ ንእግዚኣብሄር ኢኹም እምበር፡ ንኣና ኣይኮንኩምን ዘጉረምረምኩምልና በለ።

⁹ሙሴ ድማ ንኣሮን፡ ንኹሉ ኣኼባ ደቂ እስራኤል፡ ምጉርምራምኩም ሰሚዑ እዩ እሞ፡ ኣብ ቅድሚ እግዚኣብሄር ቅረቡ በሎም በሎ።

¹⁰ኮነ ኸኣ፡ ኣሮን ንብዘሎ ኣኼባ ደቂ እስራኤል ምስ ተዛረበ፡ ንሳቶም ንበረኻ ገጾም ጠመቱ፡ እንሆ ኸኣ፡ ክብሪ እግዚኣብሄር ብደበና ተራእየ።

¹¹እግዚኣብሄር ድማ ንሙሴ ኸምዚ ኢሉ ተዛረቦ፡

¹²ምጉርምራም ደቂ እራስኤል ሰሚዔ እየ እሞ፡ ምሸት ስጋ ኽትበልዑ ኢኹም፡ ብጊሓት ከኣ እንጌራ ኽትጸግቡ ኢኹም። ኣነ እግዚኣብሄር ኣምላኽኩም ምኳነይ ክትፈልጡ ኢኹም፡ ኢልካ ተዛረቦም።

¹³ኮነ ኸኣ፡ ንምሸቱ ብርኒጎታት ተላዒለን ነቲ ሰፈር ከደናኦ። ብጊሓት ድማ ኣብ ዙርያ እቲ ሰፈር ዛዕዝዓ ወዲቑ ነበረ።

¹⁴እቲ ዛዕዝዓ ምስ ዘፈፈ ኸኣ፡ እንሆ፡ ገጽ ኣቲ በረኻ ገለ ደቂቕ ከቢብ፡ ከም ኣሳሕይታ ዝምድቃቑ ኣብ ምድሪ ነበረ።

¹⁵ደቂ እስራኤል ድማ እዚ ምስ ረኣዩ፡ እንታይ ምዃኑ ኣይፈለጡን ኣሞ፡ እዚ እንታይ ኣዩ፡ ኢሎም ንሓድሕዶም ተሓታተቱ። ሙሴ ኸኣ እዚ እግዚኣብሄር ክትበልዕዎ ዝሀበኩም እንጌራ ኣዩ።

¹⁶እቲ እግዚኣብሄር ዝኣዘዞ ነገር ድማ እዚ እዩ፡ ነፍስ ወከፍ ንብልዑ ዚኣክል ካብኡ ይኣከብ። ከም ፍቕዲ ነፍሳትኩም ንነፍሲ ወከፍ ሓደ ጎመር፡ ነፍሲ ወከፍ ነቶም ኣብ ድንኳኑ ዘለው ይውሰደሎም፡ በሎም።

¹⁷ደቂ እስራኤል ድማ ከምኡ ገብሩ። ሓደ ብዙሕ ሓደ ኸኣ ሒደት ዝኣከበ ኣየትረፈ፡ እቲ ሒደት ዝኣከበ ኸኣ ኣየጉደለ። ነፍስ ወከፍ እቲ ብልዑ ዚኣኽሎ ኣከበ።

¹⁸ሙሴ ድማ፡ ሓደ እኳ ኻብኡ ገለ ኽሳዕ ንብጽሒቱ ኣየትርፍ በሎም።

¹⁹ሙሴ ድማ፡ ሓደ እኳ ኻብኡ ገለ ኽሳዕ ንብጽሒቱ ኣየትርፍ በሎም።

²⁰ንሙሴ ግና ኣይሰምዕዎን እሞ፡ ገለ ሰባት ካባኡ ኽሳዕ ንጽብሒቱ ኣትረፉ፡ ንሱ ኸኣ ሕሰኸ፡ በድበደ ድማ። ሙሴ ኸኣ ብኣታቶም ተናደደ።

²¹ነፍሲ ወከፍ ንግሆ ንግሆ ኻብኡ መጠን ብልዑ ዚኣክል ይእክብ ነበረ። ጸሓይ ምስ ሞቐት ግና መኸኸ።

²²ኾነ ኸኣ፡ በታ ሳድሰይቲ መዓልቲ ኻብቲ እንጌራ ኻዕበት ኣከቡ፡ ክልተ ጎመር ንሓደ። ኩሎም ሓላቑ እቲ ኣኼባ ድማ መጺኦም ንሙሴ ነገርዎ።

²³ንሱ ኸኣ፡ እዚ እቲ እግዚኣብሄር ቅድስቲ ሰነበት እያ፡ እትስንክተዎ ሰንክቱ፡ እተፍልሕዎውን ኣፍልሑ። እቲ ዝተረፈ ኹሉ ኸኣ ኣንብርዎ፡ ክሳዕ ጽባሕ ይተሐለወልኩም በሎም።

²⁴ከምቲ ሙሴ ዝኣዘዞም ከኣ ንጽባሕ ኣንበርዎ፡ ንሱ ኣይበድበድን ኣይሕሰኸን ድማ።

²⁵ሙሴ ኸኣ ሎሚ ናይ እግዚኣብሄር ሰነበት እያ፡ ሎሚ ኣብ መሮር ኣይትረኽቡን ኢኹም እሞ፡ ሎሚ ብልዕዎ።

²⁶ሹዱሽተ መዓልቲ ኣከቡ፡ እታ ሳብዐይቲ መዓልቲ ግና ሰንበት እያ፡ ብእእ ኣይርከብን እዩ፡ በለ።

²⁷ኮነ ድማ፡ ካብቶም ህዝቢ በታ ሳብዐይቲ መዓልቲ ኺእከቡ ወጹ፡ ኣይረኸቡን ከኣ።

²⁸እግዚኣብሄር ድማ ንሙሴ ክሳዕ መኣዝ ኢኹም ትእዛዛተይ ሓጋጋተይን ምሕላው እትኣብዩ፡

²⁹ርአዩ፡ ኣግዚኣብሄር ሰንበት ሂብኩም እዩ እሞ፡ ስለዚ በታ ሳድሰይቲ መዓልቲ ንኽልተ መዓልቲ ዚኸውን እንጌራ ይህበኩም ኣሎ። ነፍሲ ወከፍ ኣብ ዘዘለዎ ይቀመጥ። በታ ሳብዐይቲ መዓልቲ ሓደ እኳ ኻብ ስፍርኡ ኣይውጻእ በሎ።

³⁰እቲ ህዝቢ ኸኣ በታ ሳብዐይቲ መዓልቲ ዐረፈ።

³¹ቤት እስራኤል ድማ ስሙ ማና በልዎ። ፍረ ጻቅዳ ይመስል ነበረ፡ ጻዕዳ ኸኣ ነበረ፡ ምጥዓሙውን ከም ሕምባሻ ምስ መዓር ነበረ።

³²ሙሴ ድማ በለ፡ እግዚኣብሄርሲ፡ እቲ ኻብ ምድሪ ግብጺ ኸውጽኣኩም ከሎኹ ኣብ በረኻ ዝመገብኩኹም እንጌራ ምእንቲ ኺርእዩስ፡ ካብኡ ሓደ ጎመር ምልኡ፡ ንውሉድ ወለዶኹም ከኣ ይተዐቑር፡ ኢሉ እዚ ነገርዚ ኣዘዘ።

³³ሙሴ ድማ ንኣሮን ኣቕሓ ኣምጻእካ ናብኡ ሓደ ጎመር ምሉእ ማና ኣእቱ፡ ንውሉድ ውለዶኹም ኪዕቑር ከኣ ኣብ ቅድሚ እግዚኣብሄር ኣንብሮ በሎ።

³⁴ኣሮን ከኣ ከምቲ እግዚኣብሄር ንሙሴ ዝኣዘዞ፡ ኪዕቁር ኣብ ቅድሚ እቲ ምስክር ኣንበሮ።

³⁵ደቂ እስራኤል፡ ናብ ዓዲ ሃገረ ሰብ ክሳዕ ዚኣትው፡ ኣርብዓ ዓመት ማና በልዑ። ናብ ወሰን ሀግር ከነኣን ክሳዕ ዚበጽሑ፡ ማና በልዑ።

³⁶ጎመር ግና ዓስራይ ኣፍ ኤፋ እዩ።