Read መ/ቅዱስ ትግርኛ, Tigrigna Bible, 1997 ኦሪት ዘጸአት 17 Bible Online

ኦሪት ዘጸአት 17 - መ/ቅዱስ ትግርኛ, Tigrigna Bible, 1997 bible

ኦሪት ዘጸአት 17

¹ኩሉ እቲ ኣኼባ ደቂ እስራኤል ካብ በረኻ ሲን ነቐለ። ከም ትእዛዝ እግዚኣብሄር ድማ ካብ ሰፈር እናተጓዕዙ ኣብ ረፊዲም ሰፈሩ። እቲ ህዝቢ ኸኣ ዚሰትዮ ማይ ኣይነበሮን።

²እቶም ህዝቢ ድማ፡ እንሰትዮ ማይ ሀቡና ኢሎም ምስ ሙሴ ተቛየቑ፡ ስለምንታይከ ንእግዚኣብሄር ትፍትኑ፡ በሎም።

³እቶም ህዝቢ ድማ ኣብኡ ማይ ጸሚኦም ንሙሴ፡ ስለምናትይ ኢኻ፡ ንሕናን ደቅናን ማልናን ብጽምኢ ኽንመውት ካብ ግብጺ ዘደየብካና፡ ኢሎም ኣጉረምረሙሉ።

⁴ሙሴ ድማ፡ ነዚ ህዝብዚ እንታይ ክገብሮ እየ፡ ብዳርባ ኣምኒ ኪቐትለኒ ቕሩብ ተሪፍዎም ኣሎ፡ ኢሉ ናብ እግዚኣብሄር ኣእወየ።

⁵እግዚኣብሄር ድማ ንሙሴ፡ ናብ ቅድሚ ህዝቢ ሕለፍ እሞ፡ ካብ ዓበይቲ እስራኤል ከኣ ምሳኻ ውሰድ፡ እታ ነታ ርባ ዝወቓዕካላ በትርኻ ድማ ኣብ ኢድካ ሒዝካ ኺድ።

⁶እንሆ ኣነ ኣብኡ ኣብ ቅድሜኻ ኣብ ልዕሊ ኸውሒ ሆሬብ ደብ ክብል እየ። ነቲ ኸውሒ ክትወቕዖ ኢኻ፡ ነቶም ህዝቢ ዜስተ ማይ ድማ ካብኡ ኺወጽእ እዩ፡ በሎ። ሙሴ ድማ ኣብ ቅድሚ እቶም ዓበይቲ እስራኤል ከምኡ ገበረ።

⁷ብዛዕባ እቲ ቛየቛ ደቂ እስራኤል፡ ንእግዚኣብሄር፡ ድማ፡ እግዚኣብሄርሲ ኣብ ማእከልናዶ ኣሎ ወይ ኣይፋሉን፡ ኢሎም ስለ ዝፈተንዎ፡ ስም እታ ቦታ ማሳን መሪበን ኣውጽኡላ።

⁸ሽዑ ኣማሊቅ መጺኡ፡ ምስ እስራኤል ኣብ ረፊዲም ተዋጋኤ።

⁹ሙሴ ድማ ንእያሱ፡ ሰባት ሕረየልና እሞ፡ ወጺእካ ምስ ኣማሊቅ ተዋጋእ። ኣነ ጽባሕ በትሪ ኣምላኽ ኣብ ኢደይ ሒዘ ኣብ ርእሲ ኣቲ ኹርባ ደው ክብል እየ በሎ።

¹⁰ኢያሱ ኸኣ ከምቲ ሙሴ ዝበሎ ገበረ፡ ምስ ኣማሊቅ ከኣ ተዋግኤ። ሙሴን ኣሮንን ሁርን ድማ ናብ ርእሲ እቲ ኹርባ ደየቡ።

¹¹ኮነ ኸኣ፡ ሙሴ ኢዱ ምስ ዜልዕል፡ እስራኤል ይስዕር ነበረ።

¹²ኣእዳው ሙሴ ኸኣ ረብረባ እሞ እምኒ ወሲዶም ብ ትሕቲኡ ኣንበሩ፡ ንሱውን ኣብ ልዕሊኡ ተቐመጠ። ኣሮንን ሁርን ከኣ ሓደ በዚ ሐደ በቲ ኾይኖም ኣእዳው ይድግፉ ነበሩ። ኣእዳው ኸኣ ጸሓይ ክሳዕ ኣትዐርብ ጸንዓ።

¹³እያሱ ድማ ንኣማሊቅን ንህዝቡን ብስሕለት ሴፍ ቀርደዶም።

¹⁴እግዚኣብሄር ድማ ንሙሴ፡ ንዝኽሪ ኣማሊቅ ካብ ትሕቲ ሰማይ ፈጺሙ ኽድምስሶ እየ እሞ፡ እዚ ንመዘከርታ ኣብ መጽሓፍ ጽሐፎ፡ ንእያሱውን ኣብ እዝኑ ኣስምዓዮ በሎ።

¹⁵ኢድ ናብ ዝፋን እግዚኣብሄር ተላዒላ ኣላ እሞ፡ ውግእ እግዚኣብሄር ምስ ኣማሊቅ ካብ ወለዶ ንወለዶ እዩ፡ ድማ በለ።

¹⁶ኢድ ናብ ዝፋን እግዚኣብሄር ተላዒላ ኣላ እሞ፡ ውግእ እግዚኣብሄር ምስ ኣማሊቅ ካብ ወለዶ ንወለዶ እዩ፡ ድማ በለ።