Read መ/ቅዱስ ትግርኛ, Tigrigna Bible, 1997 ኦሪት ዘጸአት 22 Bible Online

ኦሪት ዘጸአት 22 - መ/ቅዱስ ትግርኛ, Tigrigna Bible, 1997 bible

ኦሪት ዘጸአት 22

¹ሰብ ወይ በጊዕ ሰሪቑ እንተ ሓረደ ወይ እንተ ሸጦ፡ ኣብ ክንዲ ብዕራይ ሓሙሽተ ብዕራይ፡ ኣብ ክንዲ በጊዕ ድማ ኣርባዕተ በጊዕ ይኽሐስ።

²ሰራቒ ጥሒሱ ኺኣቱ ኸሎ እንተ ተረኸበ፡ ወቒዖምዎ ኸኣ እንተ ሞተ ዕዳ ደም የብሉን።

³ጸሓይ እንተ በረቐቶ ግና፡ ዕዳ ደም ኣለዎ። እቲ ሰራቒ ኸኣ ዘሰረቖ ይምለስ። ገንዘብ እንተ ሰአነ ግና፡ ኣብ ክንዲ እቲ ዝሰረቖ ይሽየጥ።

⁴እቲ ዝሰረቖ ብዕራይ ኮነ ወይ ኣድጊ ወይ በጊዕ፡ ኣብ ኢዱ ብህይወቱ እንተ ተረኸበ፡ ካዕበት ገይሩ ይኽፈል።

⁵ሰብ ግራት ወይ ኣታኽልቲ ወይኒ እንተ ኣብልዔ፡ ማሉ ፈንዩ ናብ ግራት ካልእ ይብላዕ ኣንተ ሓደጎ፡ ካብ ግራቱ እታ ዝበለጸት፡ ካብ ኣታኽልቲ ወይኑ ኸኣ እታ ዝበለጸት ይኽሓሶ።

⁶ሓዊ ወጺኡ ሓጹር እንተ ረኸበ፡ እሞ ቅሚጦ ወይ ዘይጹድ ወይ ግራት እንተ በልዔ፡ እቲ ሓዊ ዘንደደ ኻሕሳ ይኽሓሶ።

⁷ሰብ፡ ገንዘብ ወይ ኣቕሓ ኣብ ጎረቤቱ ኽሕለወሉ ሕድሪ እንተ ሀቦ እሞ ካብ ቤት እቲ ሰብ እንተ ተሰርቀ፡ እቲ ሰራቒ ኸኣ እንተ ተረኸበ ካዕበት ገይሩ ይኽሓሶ።

⁸እቲ ሰራቒ ኣንተ ዘይተረኸበ፡ እቲ በዓል ቤት ናብ ቅድሚ ኣምላኽ ይቕረብ፡ ኢዱ ናብ ገንዘብ ብጻዩ ኸም ዘይዘርግሔ ይምሐል።

⁹ብዝኾነ ነገር እንተ ኸሰሰ፡ ብዛዕባ ብዕራይ ኮነ፡ ኣድጊ ኾነ፡ በጊዕ ኮነ፡ ክዳን ኮነ ወይ ማንም ዝጠፍኤ ኣቕሓ፡ እቲ ሓደ፡ እዚ እዩ፡ እንተ በለ፡ ነገር ክልቲኦም ናብ ቅድሚ ኣምላኽ ይምጻእ። ኣቲ ኣምላኽ ዝፈደዮ ንብጻዩ ኻዕበት ይኽሓሶ።

¹⁰ሰብ ኪሕልወሉ ኢሉ፡ ኣድጊ ወይ ብዕራይ ወይ በጊዕ ወይ ዝኾነ እንስሳ፡ ሕድሪ እንተ ሀቦ፡ ንሱ ኸኣ ኣንተ ሞተ፡ ወይ እንተ ተሰብረ፡ ወይ ዝረኣዮ ዜልቦ እንተ ተዘምተ፡

¹¹ናብ ገንዘብ ብጻዩ ኢዱ ኸም ዘይዝርግሔ ኣብ መንጎ ኽልቲኦም ማሕላ እግዚኣብሄር ይኹን። እቲ ዋናኡ ድማ ማሕላ ይቀበል፡ እቲ ኸኣ ኣይኽሓስ።

¹²ካብኡ ኣንተ ተሰርቀ ግና፡ ነቲ ዋናኡ ይተከኣሉ።

¹³ኣራዊት እንተ በትብቶ ኸኣ፡ ነቲ እተበትበተ ንምስክር ኪኾኖ የምጽኣዮ፡ ተኽላ ግና ኣይሀብ።

¹⁴ሰብ ካብ ብጻዩ ገለ እንተ ለመነ፡ ዋናኡ ኸየሎ ኸኣ እንተ ተሰብረ ወይ እንተ ሞተ፡ ካሕሳ ይኽሓሶ።

¹⁵ኣቲ ዋና ምስኡ እንተ ነበረ ግና ኣይኽሓስ፡ ተኻርዩ እንተ ኾነ፡ ብኽራይ ኣትዩ እዩ።

¹⁶ሰብ ዘይተሓጽየት ጓል እንተ ኣስሐተ፡ እሞ ምስኣ እንተ ደቀሰ፡ ሰበይቱ ኽትከውን ገዝቢ የግዝማ።

¹⁷ኣቦኣ ኣይህበካን፡ ኢሉ እንተ ኸልኦ፡ ከም ገዝሚ ኣዋልድ ገንዘብ ይኽፈል።

¹⁸ንጠንቋሊት ብህይወት ኣይትሕደጋ።

¹⁹ምስ እንሳሳ ዝድቅስ ኩሉ ሞት ይሙት።

²⁰ብጀካ ንእግዚኣብሄር ጥራይ፡ ንኻልኦት ኣማልኽቲ ዚስውእ ይጽነት።

²¹ንስኻትኩም ከኣ ኣብ ምድሪ ግብጺ ስደተኛታት ኔርኩም ኢኹም እሞ፡ ንስደተኛ ኣይትዐምጾ ወይ ኣይትጽቀጦ።

²²ንመበለታትን ንዘኽታማትን ዘበሉ ኣይትግፍዕዎም።

²³እንተ ገፋዕካዮም፡ እሞ ኣባይ እንተ ጠርዑ ጥርዓኖም ኣጸቢቐ ኽሰምዕ እየ።

²⁴ኩራይ ይነድድ እሞ፡ ብሴፍ እቐትለኩም። ሽዑ ኣንስትኹም መበለታት፡ ደቅኹም ከኣ ዘኽታማት ይኾኑ።

²⁵ካብ ህዝበይ ምሳኽ ንዝነበር ድኻ ገንዘብ እንተ ኣለቃሕካ፡ ከም በዓል ሓረጣ ኣይትኹኖ፡ ሓረጣውን ኣይትጽዐኖ።

²⁶ክሳን ብጻይካ ታሕዚ ኣንተ ሓዝካ ጸሓይ ከይዐረበት ምለሰሉ።

²⁷እቲ ስጋኡ ዚኸድነሉ ኽዳኑ፡ ንሱ ጥራይ እዩ እሞ፡ ብምንታይ ኪድቅስ፡ ኪኸውን ድማ እዩ ኣነ መሓሪ እየ እሞ፡ እንተ ጠርዓለይ ክሰምዖ እየ።

²⁸ንኣምላኽ ኣይጽረፉ፡ ንመስፍን ህዝብኻ ድማ ኣይትርገም።

²⁹ካብ ምልኣት ሪቕካን ካብ መጽሙቕ ወይንኻን ንምቕራብ ኣይትደንጉዩ። ካብ ኣወዳትካ እቲ በኹሪ ንኣይ ሀበኒ።

³⁰ካብ ኣብርዑካን ካብ ኣባጊኻን ድማ ከምኡ ግበር። ሾብዓተ መዓልቲ ምስ ኣዲኡ ይጽናሕ፡ በታ ሳምነይቲ መዓልቲ ንኣይ ትህበኒ።

³¹ቅዱሳት ሰባት ትኾነኒ። ኣብ መሮር ኣራዊት ዝሓዞ ስጋ ኣይትብልዑ፡ ነኽላባት ደርብይዎ።