Read መ/ቅዱስ ትግርኛ, Tigrigna Bible, 1997 ኦሪት ዘጸአት 27 Bible Online

ኦሪት ዘጸአት 27 - መ/ቅዱስ ትግርኛ, Tigrigna Bible, 1997 bible

ኦሪት ዘጸአት 27

¹መሰውኢ ድማ ካብ ዕጨይቲ ሸጢም ሓሙሽተ ኣመት ዝምንዋሑ፡ ሓሙሽተ እመት ዝምግፋሑ ገብር። እቲ መሰውኢ ኣርባዕቲኡ መኣዝኑ ማዕረ፡ ምብራኹ ድማ ሰለስተ እመት ይኹን።

²ኣቕርንቱ ኸኣ ኣብ ኣርባዕተ መኣዝኑ ግበረሉ፡ እቲ ኣቕርንቱ ምስኡ ብሓደ እተገብረ ይኹን፡ ብስራዚ ኸኣ ለብጦ።

³ንሐሙኹስቱ ዚኸውን ቁራዕን መጽሓርያኡን ጭሔሎኡን መውግእ ስጋኡን ምድጃኡን ግበር፡ እዚ ኹሉ ኣቓሑኡ ኻብ ኣስራዚ ገብሮ።

⁴ካብ ኣስራዚ ኸም መንፊት ዝበለ መጋረዲ ገብረሉ፡ ነቲ መንፊት ከኣ ኣብ ኣርባዕተ መኣዝኑ ኣርባዕተ ቐለቤት ኣስራዚ ግበረሉ።

⁵ንእኡ ድማ ኣብ ትሕቲ ኣርከን መሰውኢ ገብሮ፡ እቲ መንፊት ካብ ታሕቲ ኽሳኦ ፈረቓ መሰውኢ ይብጻሕ።

⁶ነቲ መሰውኢ ድማ መሰላታት ግበረሉ፡ ካብ ዕጨይቲ ሽጢም መሰላታት ጌርካ ብስራዚ ለብጦ።

⁷እቲ መሰውኢ ምስ ዚጽወር እቲ መሰላታት ከኣ ብኽልተ ሸነኹ ኪኸውን፡ ናብቲ ቐላብቲ ይእቶ።

⁸ጓንጋ ጌርካ ኻብ ሉሕ ገብሮ። ከምቲ ኣብ ከረን እተራኣየካ ኸምኡ ይግበርዎ።

⁹ነቲ ማሕደር ኣጸድ ገብረሉ። ነቲ ኣጸድ ብሸነኽ ደቡብ ነቲ ሓደ ወገኑ ብተፋሕሰ ልሕጺ እንጣጢዕ ሚእቲ እመት ዝምንዋሑ መጋረጃታት ገብር።

¹⁰ኣዕኑዱ ድማ ዕስራ፡ ኣእጋሩውን ካብ ኣስራዚ ዕስራ፡ ናይቲ ኣዕኑድ መሰቓቐልን ኣዛንጉን ከኣ ካብ ብሩር ይኹን።

¹¹ከምኡ ድማ በቲ ነዊሕ ሸነኽ ጥሜት ሚእቲ ኣመት ዝምንዋሑ መጋረጃታት፡ ኣዕኑዱ ኸኣ ዕስራ፡ ኣእጋሩውን ካብ ኣስራዚ ዕስራ፡ ናይቲ ኣዕኑድ መሰቓቐልን ኣዛንጉን ከኣ ካብ ብሩር ይኹን።

¹²ብወርዱ ነቲ ኣጸድ ብሸነኽ ምዕራብ ድማ ሓምሳ እመት ዝምንዋሑ መጋረጃታት ኣዕኑዱ ኸኣ ዓሰርተ ኣእጋሩውን ዓሰርተ ይኹን።

¹³ምግፋሕ እቲ ኣጸድ ብቕድሚት ብሸነኽ ምብራቕ ድማ ሓምሳ እመት ይኹን።

¹⁴ናይቲ ሓደ ሸነኽ መጋረጃኣታት ዓሰርተው ሓሙሽተ እመት፡ ኣዕኑዱ ስለስተ፡ ኣእጋሩ ኸኣ ስለስተ ይኹን።

¹⁵ንኣፍ እቲ ኣጸድ ድማ ካብ ሰማያውን ሕብሪ ደምን ጽሩይ ቀይሕን እተፋሕሰ ልሕጺ ኣንጣጢዕን ብምጥላፍ ኣተዐየ ዕስራ እመት መጋረጃ፡ ኣዕኑዱ ኣርባዕተ፡ ኣእጋሩ ኸኣ ኣርባዕተ ይኹን።

¹⁶ንኣፍ እቲ ኣጸድ ድማ ካብ ሰማያውን ሕብሪ ደምን ጽሩይ ቀይሕን እተፋሕሰ ልሕጺ ኣንጣጢዕን ብምጥላፍ ኣተዐየ ዕስራ እመት መጋረጃ፡ ኣዕኑዱ ኣርባዕተ፡ ኣእጋሩ ኸኣ ኣርባዕተ ይኹን።

¹⁷ነቲ ኣብ ዙርያ ኣጸድ ዝለኦ ኹሉ ኣዕኑድ ኣዛንግ ብሩርን መሰቓቐሊ ብሩርን ይገብሮ፡ ኣእጋሩ ኸኣ ካብ ኣስራዚ ይኹን።

¹⁸ምንዋሕ እቲ ኣጸድ ሚእቲ እመት፡ ምግፋሑ ኸኣ ብኽልቲኡ ሸነኽ ሓምሳ እመት፡ ቁመቱ ድማ ሓሙሽተ እመት ይኹን፡ ካብ እተፋሕሰ ልሕጺ እንጣጢዕ ኣእጋሩ ኸኣ ካብ ኣስራዚ ይኹን።

¹⁹ኩሉ ኣቓሑ እቲ ማሕደርን ንመተዓያዩኡ ዚኸውን ኩሉን ኹሉ ሸኻውልቱን ኩሉ ሸኻውልቲ ኣጸድን ካብ ኣስራዚ ይኹን።

²⁰ንስኻ ድማ እቲ መብራህትታት ወርትግ ምእንቲ ኺበርህሲ፡ ካብ እተጎድኤ ኣውልዕ ንመብራህቲ ዚኸውን ጽሩይ ዘይቲ ኸምጽኣልካ፡ ንደቂ እስራኤል ኣዝዞም።

²¹ኣብቲ ድንኳን ምርኻብ ብወጻኢ እቲ ኣብ ቅድሚ ምስክር ዘሎ መጋረጃ፡ ኣሮንን ደቁን ካብ ምሸት ክሳዕ ብጊሓት፡ ኣብ ቅድሚ እግዚኣብሄር የዳልውዎ። ኣብ ደቂ እስራኤል ከኣ ንውሉድ ወለዶኦም ሕጊ ዘለኣለም ይኹን።