Read መ/ቅዱስ ትግርኛ, Tigrigna Bible, 1997 ኦሪት ዘጸአት 30 Bible Online

ኦሪት ዘጸአት 30 - መ/ቅዱስ ትግርኛ, Tigrigna Bible, 1997 bible

ኦሪት ዘጸአት 30

¹ዕጣን እትዐጥነሉ መሰውኢ ኸኣ ግበር፡ ካብ ዕጨይቲ ሽጢም ግበር።

²ምንዋሑ ሓደ እመት ምግፋሑ ኸኣ ሓደ እመት፡ ኣርባዕተ መኣዝኑ ማዕረ፡ ምብራኹ ድማ ክልተ እመት ይኹን። ኣቕርንቱ ኸኣ ምስኡ ብሕደ እተገብረ ይኹን።

³ላዕላዩን ጎባታቱን ብዙርያኡ ኣቕርንቱን ድማ ብጽሩይ ወርቂ ለብጦ። ካብ ወርቂ ጌርካ ድማ ብኽልተ ጎባኡ ኣብ ትሕቲ እቲ ኣኽሊል ገብሮ፡ ብእኡ ኺጽወርሲ እቲ መሰላታት ኣብኡ ኺእቱ፡ ኣብ ክልተ ወገኑ ግበሮ።

⁴እቲ መሰላታት ድማ ካብ ዕጨይቲ ሽጢም ግበሮ፡ ብወርቂ ኸኣ ለብጦ።

⁵እቲ መሰላታት ድማ ካብ ዕጨይቲ ሽጢም ግበሮ፡ ብወርቂ ኸኣ ለብጦ።

⁶ነቲ ኣብ ቅድሚ ታቦት ምስክር ዘሎ መጋረጃ፡ ኣብ ቅድሚኡ፡ ነቲ ኣነ ኣብኡ ምሳኻ ዝራኸበሉ፡ ኣብ ልዕሊ ምስክር ዘሎ መኽደን መተዓረቒ፡ ኣብ ቅድሚኡ ገብሮ።

⁷ኣብኡ ኣሮን ጥዑም ዝጨናኡ ዕጣን ይዕጠን። ንግሆ ንግሆ ቐነድል ኪዳሉ ኸሎ፡ ዕጣን ይዕጠን።

⁸ኣጋ ምሸት ድማ ኣሮን ቀነድል ኬብርህ ከሎ፡ ናይ ወርትግ ዕጣን ንውሉድ ወለዶኹም ኣብ ቅድሚ እግዚኣብሄር ይዕጠን።

⁹ጋሻ ዕጣን ኮነ፡ ዚሓርር መስዋእቲ ኾነ ወይ መስዋእቲ ብልዒ ኣይትቕርቡሉ። መስዋእቲ መስተ ኸኣ ኣብ ልዕሊኡ ኣይትኽዐው።

¹⁰ኣብቲ ኣቕርንቱ ድማ ኣሮን ኣብ ዓመት ሓንሳእ የተዐርቕ። ንውሉስ ወለደኹም ብደም መስዋእቲ ናይ ምትዕራቕ ሓጢኣት ኣብ ዓመት ሓንሳእ የተዐርቕ። ንሱ ንእግዚኣብሄር ቅዱስ ቅዱሳት እዩ።

¹¹እግዚኣብሄር ድማ ንሙሴ ኸምዚ ኢሉ ተዛረቦ።

¹²ንደቂ እስራኤል ምስ እትቛጽሮም ምስ ተቖጽሩ፡ በቲ ምቑጻሮም ሕማም ከይኮኖም፡ ነፍ ወከፍ በጃ ነፍሱ ንእግዚኣብሄር ይሀብ።

¹³ነፍስ ወከፍ ኣብቶም ቑጹራት ዝሓለፈ፡ በቲ ሲቃል መቕደስ ፈረቓ ሲቃል ይሀብ። ሲቃል ድማ ዕስራ ጌራ እዩ እሞ፡ ፈረቓ ሲቃል መባእ ንእግዚኣብሄር ይኹን።

¹⁴ነፍስ ወከፍ ኣብቶም ቁጹራት ዝሐለፈ፡ ወዲ ዕስራ ዓመት ካባኡ ንላዕሊውን እቲ መባእ ንእግዚኣብሄር ይሀብ።

¹⁵እቲ በጃ ነፍስኹም ንእግዚኣብሄር መባእ ክትህቡ ኢኹም፡ ሃብታም ካብ ፈረቓ ሲቃል ኣየብዝሕ፡ ድኻ ኸኣ ኣየውሕድ።

¹⁶እቲ ገንዘብ መተዓረቒ ድማ፡ ንመተዓረቒ ነፍስኹም፡ ንደቂ እስራኤል ኣብ ቅድሚ እግዚኣብሄር ንመዘከሪ ኪኸውን፡ ካብ ደቂ እስራኤል ወሲድካ ንኣገልግሎት ድንኳን ምርኻብ ግበሮ።

¹⁷እግዚኣብሄር ድማ ንሙሴ ኸምዚ ኢሉ ተዛረቦ፡

¹⁸ንመሕጸቢ ዚኸውን ገበራ ድማ ካብ ኣስራዚ ኣጋሮኡ ኸኣ ካብ ኣስራዚ ግበሮ። ኣብ መንጎ ድንኳን ምርኻብ መሰውእን ኣንብሮ ኣሞ፡ ማይ ግበረሉ።

¹⁹ኣሮንን ደቁን ድማ ኣእዳዎም ኣእጋሮምን ብእኡ ይተሓጸቡ።

²⁰ናብ ድንኳን ምርኻብ ኪኣትው ኸለው፡ ወይ ንእግዚኣብሄር መስዋኣቲ ሓዊ ብምንዳድ ኬገልግሉ ናብ መሰውኢ ምስ ዚቐርቡ፡ ምእንቲ ኸይትሞቱስ ምስይ ይተሓጸቡ።

²¹ምእንቲ ኸይሞቱ ኣእዳዎምን ኣእጋሮምን ይተሓጸቡ። እዚ ኸኣ ንኣታቶም ንእኡን፡ ንውሉድ ወለዶኦም ስርዓት ዘለኣለም ይኹን።

²²እግዚኣብሄር ድማ ንሙሴ ኸምዚ ኢሉ ተዛረቦ።

²³ካብ ዝበለጸ ጥዑም ጨና ንኣኻ ውሰድ፡ ሓሙሽተ ሚእቲ ሲቃል ዚነጥብ ከርበ ፈረቓኡ ኸኣ ማለት ክልተ ሚእትን ሓምሳን ሲቃል፡ ካብ ጥዑም ዝጨናኡ ቓርፋ ካብ ጥዑም ዝጨናኡ ቓንጫ ዶሪራ ድማ ክልተ ሚእትን ሓምሳን ሲቃል።

²⁴ሓሙሽተ ሚእቲ ሲቃል ብሲቃል መቕደስ ከኣ ካብ ሳናመኪ፡ ሓደ ሂን ዘይቲ ኣውልዕ ድማ።

²⁵ንእኡ ኸም ብብልሓት ገባር ቅብኢ እተገብረ ቕብኢ፡ ቅዱስ ዘይቲ ቕብኣት ግበሮ። ንሱ ቅዱስ ዝየቲ ቕብኣት ይኹን።

²⁶ብእኡ ድማ ነቲ ድንኳን ምርኻብን ንታቦት ምስክርን ቅባእ፡

²⁷ነቲ ሰንደቕ ኩሉ ኣቓሑኡን ንቐዋሚ ቐንዴልን ኩሉ ኣቓሑኡን ነመሰውኢ ዕጣን ከኣ፡

²⁸ንመሰውኢ ምሕራርን ኩሉ ኣቃሓኡን፡ ነቲ ገብራት ኣጋሮኡን ቅባእ።

²⁹ቅዱስ ቅዱሳን ኪኸውን ድማ ቀድሶ። ዚትንክዮ ዘበለ ኹሉ ኸኣኣ ይቕደስ።

³⁰ንኣሮንን ንደቁን ድማ ካህናት ኪኾኑኒ ቅብኣዮምን ቀድሶምን።

³¹ንደቂ እስራኤል ከኣ ከምዚ ኢልካ ተዛረቦም፡ እዚ ንውሉድ ወለዶኹም ዘይቲ ቅዱስ ቅብኢ ይኩነለይ።

³²ኣብ ስጋ ሰብ ኣይኩዖ፡ ካላውን ከምቲ ኣገባብራኡ ኣይትግበሩ። ንሱ ቅዱስ እዩ እሞ። ንኣኻትኩም ከኣ ቅዱስ ይኹን።

³³እቲ ኸምኡ ዝበለ ቕብኢ ዝገበረን፡ እቲ ካብኡ ንኻልእ ሰብ ዝለኸየን ንሱ ኻብ ህዝቡ ይመንቆስ።

³⁴እግዚኣብሄር ድማ ንሙሴ በሎ፡ ጥዑም ጨናታት፡ ከርበን ሸኸለትን ከለበናን፡ ጥዑም ጨናታት ምስ ጽሩይ ዕጣንን በብዓይነቱ ማዕረ ማዕረ ኸም ዚኸውን ጌርካ ውሰድ።

³⁵ንእኡ ድማ ከም ብብልሓት እቶም ገበርቲ ቕባኢ ጨው ዝኣተዎ ጽሩይ ቅዱስ ቅባኢ ዕጣን ገብሮ።

³⁶ካብኡ ኣድኪምካ ጉዳእ እሞ፡ ኣብቲ ኣነ ምሳኻ ዝራኸበሉ ኣብ ድንኳን ምርኻብ ኣብ ቅድሚ ምስክር ኣንብሮ። ንኣኻትኩም ቅዱስ ቅዱሳን ይኹን።

³⁷እቲ በዚ ኣገባብራኣኡ እትገብሮ ዕጣን ንኣኻትኩም ኣይትግበሩ። ንእግዚኣብሄር እተቐደሰ ይኹነልካ።

³⁸ዝኾነ ይኹን ኪዕጠኖ ኢሉ ኸምኡ ዝበለ ዚገብር፡ ካብ ህዝቡ ይመንቆስ።