Read መ/ቅዱስ ትግርኛ, Tigrigna Bible, 1997 ኦሪት ዘጸአት 33 Bible Online

ኦሪት ዘጸአት 33 - መ/ቅዱስ ትግርኛ, Tigrigna Bible, 1997 bible

ኦሪት ዘጸአት 33

¹እግዚኣብሄር ድማ ንሙሴ፡ ንስኻን እዚ ኻብ ምድሪ ግብጺ ዘደየብካዮ ህዝብን ካብዚ ኺዱ እሞ፡ ናብታ ንዘርእኻ ኽህቦ እየ ኢለ፡ ንኣብርሃምን ንይስሃቅን ንያእቆብን ዝመሓልኩሎም ምድሪ ደይብ።

²ቀቅድሜኻ ድማ መልኣኽ ክሰድድ እየ እሞ ንኸነኣናውያንን ንኣሞራውያንን ንሔታውያንን ክሰጎም እየ።

³ንሱ ናብታ ጸባን መዓርን እተውሕዝ ምድሪ ኼእትወካ እዩ። ንስኻ ተሪር ክሳድ ህዝቢ ኢኻ እሞ፡ ኣብ መገሲ ምእንቲ ኸየጥፍኣካስ፡ ኣብ ማእከልካ ኣይድይብን እየ፡ በሎ።

⁴እቶም ህዝቢ እዚ ኽፉእ ነገርዚ ምስ ሰምዑ፡ ጉሀዩ እሞ ሓደ እኳ ስልማቱ ኣይተሰለመን።

⁵እግዚኣብሄር ድማ ንሙሴ በሎ፡ ንደቂ እስራኤል፡ ንስኻትኩም ተረርቲ ኽሳብ ህዝቢ ኢኹም። ኣነ ቅጽበት ዓይኒ ኣብ ማእከልካ እንተ ዝድይብ፡ ምወዳእኩኻ ነይረ፡ ሕጂ ኸኣ ንኣኻ እንታይ ከም ዝገብረካ ምእንቲ ኺፈልጥ፡ ስልማትካ ኻባኻ ቐንጥት በሎም።

⁶ደቂ እስራኤል ድማ ካብ ከረን ሆሬብ ንነጀው ስልማቶም ቀንጠጡ።

⁷ሙሴ ድማ ነቲ ድንኳን ወሲዱ፡ ኣብ ወጻኢ እቲ ሰፈር፡ ካብ ሰፈር ኣርሕቕ ኣቢሉ ተኸሎ። ድንኳን ምርኻብ ከኣ ኣውጽኣሉ። ኮነ ኸኣ፡ ንእግዚኣብሄር ዝደለየ ዘበለ ንወጻኣኢ ሰፈር ናብ ድንኳን ምርኻብ ይኸይድ ነበረ።

⁸ኮነ ድማ፡ ንሙሴ ናብ ድንኳን ምስ ዝወጽእ፡ ኩሉ እቲ ህዝቢ ተንሲኡ፡ ነፍስ ወከፍ ኣብ ኣፍ ድንኳኑ ደው በለ፡ ሙሴ ናብ ድንኳን ክሳዕ ዚአቱ፡ ደድሪኡ ይጥምቶ ነበረ።

⁹ኮነ ኸኣኣ፡ ሙሴ ናብ ድንኳን ምስ ኣተወ፡ እቲ ዓንዲ ደበና ወሪዱ፡ ኣብ ኣፍ ድንኳን ይቐውም ነበረ።

¹⁰ኩሉ ህዝቢ ድማ ነቲ ዓንዲ ደበና ኣብ ኣፍ ድንኳን ደው ኢሉ ረአዮ፡ ኩሉ እቲ ህዝቢ ተንስኤ እሞ፡ ነፍስ ወከፍ ኣብ ኣፍ ድንኳኑ ኾይኑ ይሰግድ ነበረ።

¹¹ሰብ ምስ ፈታዊኡ ኸም ዝዛረብ፡ እግዚኣብሄር ድማ ምስ ሙሴ ገጽ ንገጽ ተዛረበ። ሙሴ ኸኣ ናብ ሰፈር ተመልሰ። እቲ ጎበዝ ግልያኣኡ፡ እያሱ ወዲ ነዊ ግና ካብቲ ድንኳን ኣይፍለን ነበረ።

¹²ሙሴ ድማ ንእግዚኣብሄር፡ እንሆ ንስኻ ነዚ ህዝቢ እዚ ኣደይቦ፡ ትብለኒ ኣለኻ። ምሳይ ንመን ከም እትሰድድ ከኣ፡ ንስኻ ኣየፍለጥካንን ። ንስኻ ግና፡ ብስምካ እፈልጠካ ኣሎኻ፡ ኣብ ዓይነይ ድማ ሞገስ ረኺብካ ኣሎኻ በልካኒ።

¹³እምበኣር ኣብ ዓይንኻ ሞጎስ እንተ ደኣ ረኺበስ፡ ምእንቲ ኣብ ዓንኻ ሞጎስ ክረክብ በጃካ መገድኻ ኣፍልጠኒ። እዚ ህዝቢዚ ኸኣኣ ህዝብኻ ኸም ዝኾነ ርኤ በሎ።

¹⁴እግዚኣብሄር ድማ ገጸይ ምሳኻ ይኸይድ፡ ከዕርፈካ ኸኣ እየ በሎ።

¹⁵ገጽካ ምሳና ዘይኸይድ ኣንተ ኾይኑስ ካብዚ ኣይተደይበና።

¹⁶ኣነን ህዝብኻን ድማ ኣብ ገጽ ምድሪ ኻብ ዘለው ኹሎም ህዝብታት ከም እንፍለ ደኣ፡ ብምንታይ ይፍለጥ፡ ንስኻ ምሳይ ብምኻድካሶ ኣይኮነን፡ በሎ።

¹⁷እግዚኣብሄር ድማ ንሙሴ፡ ኣብ ዓይነይ ጸጋ ረኺብካ፡ ብስምካ ኸኣ ፈሊጠካ እየ እሞ፡ እዚ ዝበልካዮ ነገር ክገብሮ ኣየ፡ በሎ።

¹⁸ንሱ ድማ፡ እምበኣር በጃኻ፡ ክብርኻ ኣርእየኒ፡ በለ።

¹⁹ንሱ ኸኣ፡ ኩሉ ለውሃተይ ኣብ ቅድሜኻ ክእውጅ እየ። ነቲ ኽምጉሶ ዝደሌኹ ኽምጉሶ እየ፡ ነቲ ዝምሕሮ ዝደሌኹ ድማ ክምሕርቶ ኣየ በለ።

²⁰ሰብ ርእዮኒ ብህይወት ኣይነብርን እዩ እሞ፡ ገጸይ ክትርኢ ኣይትኽእልን ኢኻ፡ ድማ በለ።

²¹እግዚኣብሄር ድማ እንሆ፡ ኣብዚ ጥቓይ ቦታ ኣሎ፡ ኣብቲ ኸውሒ ደው ክትብል ኢኻ።

²²ኪኸውን ድማ እዩ፡ ክብረይ ኪሓልፍ ከሎ ኣብ ጭዳዱ ከውሒ እገብረካ ኣነ ኽሳኦ ዝሓልፍ ከኣ፡ ቢደይ ክኸውለካ እየ።

²³ኢደይ ድማ ኤልዕል እሞ ብድሕረይ ትርእየኒ ገጸይ ግና ኣይርኤን ኣዩ በለኦ።