Read መ/ቅዱስ ትግርኛ, Tigrigna Bible, 1997 መጽሓፍ ኢዮብ 24 Bible Online

መጽሓፍ ኢዮብ 24 - መ/ቅዱስ ትግርኛ, Tigrigna Bible, 1997 bible

መጽሓፍ ኢዮብ 24

¹ስለምንታይ እቲ ዂሉ ዚኽእል ነቲ ጊዜታት ዘይስውሮ፡ ስለምንታይ ደኣ እቶም ዚፈልጥዎ ንመዓልትታቱ ዘይርእይወን?

²ንዶብ የዝብልዎ፡ ንኸብቲ ዘሚቶም የውፍርወን።

³ንዘኽታማት ኣድጎም የሕድግዎም፡ ንብዕራይ መበለትውን ታሕዚ ይሕዝዎ፡

⁴ንድኻታት ካብ መገዲ ይደፍእዎም፡ እቶም ጥቑዓት ምድሪ ሐቢሮም ይሕብኡ።

⁵እንሆ፡ ከም ኣድጊ በረኻ ምግቢ እናደለዩ ናብ ውዕለቶም ይወጹ፡ በረኻውን ንደቆም ዚኸውን ምግቢ ይህቦም።

⁶ኣብ ግራት ቋርፎም ይእክቡ፡ ኣብ ወይኒ እቲ ረሲእ ይቕርሙ፡

⁷ብዘይ ክዳን ጥራዮም ይሐድሩ፡ ኣብቲ ቚሪ ዚኽደንዎ የብሎምን።

⁸ብርቱዕ ማይ ኣኽራን የጠልቅዮም፡ መጸግዒ ስኢኖም ድማ ከውሒ ይሐቚፉ።

⁹ንዘኽታም ካብ ጡብ እኖኡ ይምንጥልዎ፡ ካብ መሳኺን ታሕዚ ይወስዱ።

¹⁰ብዘይ ክዳን ጥራዮም ይኸዱ፡ ብጥሙያቶም እንዳእቲ ይጾሩ።

¹¹ኣብ ውሽጢ መካበብያኦም ዘይቲ ይጸምቁ፡ ኣብ መጽመቚ ይጸምቁ እሞ ይጸምኡ።

¹²እህህታ እቶም ውጹዓት ካብቲ ኸተማ ይወጽእ፡ ነፍሳት እቶም ቊሱላት ይጭርሓ ኣለዋ፡ ኣምላኽ ግና ነዚ ዓመጻ ግዱ ኣይገብርን እዩ።

¹³እቲኣቶም ካብቶም ንብርሃን ዚጸልኡ እዮም፡ ንጐደናታቱ ኣይፈልጥወንን፡ ኣብ መገድታቱ ኣይጸንዑን።

¹⁴እቲ ቐታል ነፍሲ ወጋሕታ ተንሲኡ፡ ነቲ ድኻን ጥቑዕን ይቐትሎ፡ ብለይቲ ኸኣ ከም ሰራቒ እዩ።

¹⁵ዓይኑ ዘማዊ ንጽልግልግታ ትጽበ፡ ገለ ዓይኒ ኸይትርእየኒ፡ እናበለ ገጹ ይጒልበብ።

¹⁶ንዂላቶም ረፍዲ ኸም ድነ ሞት ይዀኖም፡ ምስ ፍርሃት ድነ ሞት ከኣ ስምምዕ ኣለዎም እሞ፡ ብጸልማት ናብ ቤት ኲዒቶም ይኣትው፡ መዓልቲ ግና ተዐጽዮም ይውዕሉ፡ ንብርሃን ኣይፈልጥዎን እዮም።

¹⁷ንዂላቶም ረፍዲ ኸም ድነ ሞት ይዀኖም፡ ምስ ፍርሃት ድነ ሞት ከኣ ስምምዕ ኣለዎም እሞ፡ ብጸልማት ናብ ቤት ኲዒቶም ይኣትው፡ መዓልቲ ግና ተዐጽዮም ይውዕሉ፡ ንብርሃን ኣይፈልጥዎን እዮም።

¹⁸ቀልጢፉ ብልዕሊ ማይ ይሰፍፍ፡ ዕድሎም ኣብ ምድሪ ርጉም እዩ፡ ናብቲ መገዲ ኣታኽልቲ ወይኒ ኣይምለስን።

¹⁹ደርቅን ሃሩርን ንማይ በረድ ይውሕጦ፡ ከምኡውን ሲኦል ነቶም ዝሐጥኡ ይውሕጦም፡

²⁰ማሕጸን ይርስዖ፡ ሓሳኹ ብእኡ ይጸግቡ፡ ዚዝክሮውን የልቦን፡ እከይ ከም ኦም ይስበር።

²¹ነታ ዘይወለደት መኻን ይብድካ፡ ንመበለት ጽቡቕ ኣይገብረላን።

²²ንስልጡናት ብሓይሉ ይስሕቦም፡ ይትንስእ እሞ ኲሎም ሰብ ንህይወቶም ይቐብጽዋ።

²³ንሱ ህድኣት ሂቡ የዕርፎም፡ ኣዒንቱውን ንመገዶም ይቛመታ።

²⁴ልዕል ይብሉ፡ ድሕሪ ቕሩብ ጊዜ ግና ኣይርከቡን፡ ይወድቁ፡ ከምቶም ካልኦት ኲላቶም ይእከቡ፡ ከም ርእሲ ሰዊት ከኣ ይቚረጹ።

²⁵ከምኡ እንተ ዘይኰይኑስ፡ መን ሓሳዊ ኺገብረኒ እዩ? ነቲ ዘረባይከ መን ከንቱ ኺገብሮ ይኽእል?