Read መ/ቅዱስ ትግርኛ, Tigrigna Bible, 1997 መዝሙር ዳዊት 102 Bible Online

መዝሙር ዳዊት 102 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 102

¹ጐይታየ፡ ጸሎተይ ስማዕ፡ ኣውያተይውን ኣባኻ ይብጻሕ።

²ብመዓልቲ ጸበባይ ገጽካ ኣይትኸውለለይ፡ እዝንኻ ኣድንነለይ፡ በታ ዘእውየላ መዓልቲ ቐልጢፍካ ምለሰለይ።

³መዓልትታተይ ከም ትኪ ይበና ኣለዋ እሞ፡ ኣዕጽምተይ ከኣ ከም እይድ ይነድድ ኣሎ።

⁴ምብላዕ እንጌራይ ረሲዔዮ እየ እሞ፡ ልበይ ከም ሳዕሪ ጸምለወን ነቐጸን።

⁵ካብ ድምጺ ገዓረይ እተላዕለ ኣዕጽምተይ ኣብ ስጋይ ተጣበቐ።

⁶ኣባ ጉምባሕ በረኻ መሰልኩ፡ ከም ጉንጓ ዑናታት ኰንኩ።

⁷ተጋሀኩ፡ ከምቲ እቲ ናሕሲ በይኑ ዘሎ ዑፍ ከኣ እየ።

⁸ምሉእ መዓልቲ ጸላእተይ የላግጹለይ፡ ተጻረርተይ ብስመይ ይረግሙ ኣለዉ።

⁹ንሓመዂስቲ ኸም እንጌራ እበልዖ ኣሎኹ እሞ፡ ንመስተይ ምስ ንብዓት እሕውሶ ኣሎኹ።

¹⁰ብምኽንያት ኲራኻን ቊጥዓኻን ኣልዒልካ ደርቢኻኒ ኢኻ እሞ፡

¹¹መዓልትታተይ ከም ዚነውሕ ጽላሎት እየን፡ ኣነውን ከም ሳዕሪ እነቅጽ ኣሎኹ።

¹²ዎ እግዚኣብሄር፡ ንስኻ ግና ንዘለኣለም ትነብር፡ መዘከርታኻውን ንውሉድ ወለዶ እዩ።

¹³ጊዜ ምሕረታ እዩ፡ እቲ ምዱብ ጊዜ በጺሑ፡ ባሮትካ ነእማና ኣፍቂሮም፡

¹⁴ብሓመዳ ኸኣ ጒህዮም እዮም እሞ፡ ክትትንስእ ንጽዮንውን ክትርሕርሓላ ኢኻ።

¹⁵ኣህዛብ ከኣ ንስም እግዚኣብሄር፡ ኲሎም ነገስታት ምድሪ ድማ ንኽብርኻ ኺፈርሁ እዮም።

¹⁶እግዚኣብሄር ንጽዮን ኪሀንጻ፡ ብኽብሩ ኺግለጽ እዩ።

¹⁷ኣብ ጸሎት ሽጉራት ኬቕልብ፡ ንጸሎቶምውን ኣይኪንዕቕን እዩ እሞ፡

¹⁸እዚ ነቲ ዚመጽእ ወለዶ ኺጽሐፍ፡ እቲ ዚፍጠር ህዝቢውን ንእግዚኣብሄር ኬመስግኖ እዩ።

¹⁹ኲሎም ኣህዛብን መንግስትታትን ኣብ ጽዮን ንስም እግዚኣብሄር ኣብ የሩስሌም ድማ ንምስጋናኡ ኺነግሩ ኢሎም፡

²⁰ንእግዚኣብሄር ኬገልግልዎ ምስ ተኣከቡ፡ እግዚኣብሄር ንብኽያት እሱራት ኪሰምዕ፡

²¹ነቶም ንሞት እተመደቡ ምእንቲ ኺፈትሖም ካብ ልዕልና መቕደሱ ረኣየ፡

²²ካብ ሰማይ ናብ ምድሪ ኣንቈልቊሉ ጠመተ።

²³ንሓይለይ ኣብ መገዲ ኣድከሞ፡ ንመዓልትታተይ ኣሕጸረን።

²⁴ኣምላኸየ፡ ኣብ ፍርቂ መዓልትታተይ ኣይትውሰደኒ፡ በልኩ። ዓመታትካ ንውሉድ ወለዶ እዩ

²⁵ካብ ጥንቲ ንምድሪ ሰረትካያ፡ ሰማያት ከኣ ግብሪ ኣእዳውካ እዮም።

²⁶ንሳቶም ኪጠፍኡ እዮም፡ ንስኻ ግና ትነብር፡ ኲላቶም ከም ክዳን ኪበልዩ እዮም፡ ከም ልብሲ ኽትልውጦም ኢኻ፡ ኪልወጡውን እዮም።

²⁷ንስኻ ግና ከም ቀደምካ ኢኻ፡ ዓመታትካውን ከቶ ኣይውዳእን።

²⁸ውሉድ ባሮትካ ኺነብሩ፡ ዘርኦም ከኣ ኣብ ቅድሜኻ ኺጸንዕ እዩ።