Read መ/ቅዱስ ትግርኛ, Tigrigna Bible, 1997 መዝሙር ዳዊት 105 Bible Online

መዝሙር ዳዊት 105 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 105

¹ንእግዚኣብሄር ኣመስግንዎ፡ ስሙ ጸውዑ፡

²ዘምሩሉ፡ ኣመስግንዎ፡ ብዛዕባ ዂሉ ተኣምራቱ ተዛረቡ።

³ብቅዱስ ስሙ ኽበሩ፡ ልቢ እቶም ንእግዚኣብሄር ዚደልይዎ ይተሐጐስ።

⁴እግዚኣብሄርን ሓይሉን ድለዩ፡ ኣዘውቲርኩም ገጹ ድለዩ።

⁵ኣቱም ዘርኢ ኣብርሃም፡ እቲ ባርያኡ፡ ኣቱም ውሉድ ያእቆብ፡

⁶ሕሩያቱ፡ ዝገበሮ መስትንክር ግብርታቱን ተኣምራቱን ፍርዲ ኣፉን ዘክሩ።

⁷ንሱ እግዚኣብሄር ኣምላኽና እዩ፡ ፍርዱ ኣብ ኲሉ ምድሪ እዩ።

⁸ነቲ ምስ ኣብርሃም ዝኣተዎ ኺዳኑ፡ ንይስሃቅውን ዝመሐለሉ ማሕላ፡

⁹ነቲ ንሽሕ ወለዶ ዝኣዘዞ ቓል ንዘለኣለም ዘኪሩስ፡

¹⁰ምድሪ ከነኣን፡ ዕድሎት ርስትኹም ክትከውን፡ ክህበካ እየ፡

¹¹ኢሉ ንያእቆብ ከም ሕጊ፡ ንእስራኤል ከኣ ከም ናይ ዘለኣለም ኪዳን ገይሩ ኣቘሞ።

¹²ብቚጽሪ ሒደት፡ ኣዝዮም ሒደት፡ ኣብኣውን ስደተኛታት ከለዉ፡

¹³ካብ ህዝቢ ናብ ህዝቢ፡ ካብ መንግስቲውን ናብ ካልእ ህዝቢ ኺሐልፉ ኸለዉስ፡

¹⁴ንሱ ሰብ ኪጠቕዖም ኣይሐደገን፡ ንቕቡኣተይ ኣይተንክይዎም፡

¹⁵ንነብያተይ ድማ ክሩእ ኣይትግበርዎም፡ ኢሉ ምእንትኦም ንነገስታት ገሰጾም።

¹⁶ጥሜት ናብ ሃገር ጸውዔ፡ ኲሉ ምርኩስ እንጌራ ሰበረ።

¹⁷ቀቅድሚኦም ሰብኣይ ለኣኸ፡ ዮሴፍ ከም ባርያ ተሸጠ።

¹⁸ነእጋሩ ብመቚሕ ሳቐዩ፡ ነፍሱ ኣብ ሓጺን ኣተወት።

¹⁹ቃሉ ኽሳዕ ዚፍጸም፡ ቃል እግዚኣብሄር ክሳዕ ዚፍትኖ፡

²⁰ንጉስ ልኢኹ ኣፍትሖ፡ እቲ ገዛእ ኣህዛብ ሓራ ኣውጽኦ።

²¹ንመሳፍንቱ ኸም ፍቓዱ ኺኣስሮም፡ ንሽማግሌታቱ ኸኣ ጥበብ ኪምህሮም፡

²²ጐይታ ቤቱን ኣዛዝ ኲሉ ጥሪቱን ገበሮ።

²³እስራኤል ናብ ግብጺ መጸ፡ ያእቆብውን ኣብ ሃገር ካም ሰፈረ።

²⁴ንህዝቡ ኸኣ ኣዝዩ ኣብዝሖ፡ ካብ ተጻረርቱውን ኣበርትዖ።

²⁵ንህዝቡ ኺጸልእዎ፡ ንባሮቱ ኺታናዀልዎምሲ፡ ልቦም ለወጦ።

²⁶ንሙሴ ባርያኡን ንኣሮን ሕሩዩን ለኣኸ።

²⁷ኣብ ማእከሎም ትእምርትታቱ፡ ኣብ ሃገር ካም ድማ ተኣምራት ገበሩ።

²⁸ጸልማት ለኣኸ፡ ኣጸልመተ ኸኣ፡ ንቓላቱውን ኣይተጻረርዎን።

²⁹ማያቶም ናብ ደም ለወጠ፡ ዓሳታቶም ከኣ ቐተለ።

³⁰ናብ ኣባይቲ ነገስታቶም ክሳዕ ዚኣትዋ፡ ምድሮም ብቚርዖብ መልኤት።

³¹ተዛረበ እሞ ጽንጽያታት፡ ኣብ ኲሉ ወሰኖም ከኣ ቃርማ መጹ።

³²ኣብ ክንዲ ዝናምሲ በረድ፡ ሃልሃልታ ሓዊ ኸኣ ኣብ ሃገሮም ኣውረደ።

³³ወይኖምን በለሶምን ወቕዔ፡ ኣእዋሞ ዓዶም ድማ ሰባበረ።

³⁴ተዛረበ እሞ ኣንበጣ፡ ቊጽሪ ዜብሉ ኹብኩብታ መጸ።

³⁵ንዂሉ ብቋልያ ሃገሮም በልዖ፡ ንፍረ ምድሮም ከኣ በልዔ።

³⁶ንዂሉ በዂሪ ሃገሮም፡ ንበዂሪ ሓይሎም፡ ቀተለ።

³⁷ብወርቅን ብሩርን ኣውጽኦም፡ ኣብ ማእከል ዓሌቱ ኸኣ ድኹም ኣይነበረን።

³⁸ፍርሃት ወዲቕዎም ነበረ እሞ፡ ግብጺ ብምውጻኦም ተሐጐሰት።

³⁹ደበና ንመኸወልታ፡ ሓዊ ድማ ብለይቲ ኼብርህ፡ ዘርግሔ።

⁴⁰ለመኑ እሞ ብርኒጎታት ኣምጽኤ። ብእንጌራ ሰማይውን ኣጽገቦም።

⁴¹ከውሒ ኸፈተ እሞ ማያት ፈልፈለ፡ ውሒዝ ብንቑጽ ቦታ ወሐዘ።

⁴²ነቲ ቅዱስ ቃሉን ንኣብርሃም ባርያኡን ዘኪሩ እዩ እሞ፡

⁴³ንህዝቡ ብሓጐስ፡ ነቶም ሕሩያቱ ድማ ብእልልታ ኣውጽኦም።

⁴⁴ትእዛዛቱ ኺገብሩ፡ ሕጉውን ኪሕልዉስ፡

⁴⁵ ሃገር ኣህዛብ ሀቦም፡ ጻማ ኣህዛብውን ወረሱ።