Read መ/ቅዱስ ትግርኛ, Tigrigna Bible, 1997 መዝሙር ዳዊት 106 Bible Online

መዝሙር ዳዊት 106 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 106

¹ሃሌሉያ። ምሕረቱውን ንዘለኣለም ይነብር እዩ እሞ፡ ኣመስግንዎ።

²ንግብርታት ሓይሊ እግዚኣብሄር ኪዛረቦ፡ ንብዘሎ ምስጋናኡስ ኪነግሮ መን ይኽእል?

³ፍርዲ ዚሕልዉ፡ ኲሉ ጊዜ ጽድቂ ዚገብሩ ብጹኣን እዮም።

⁴ጐይታየ፡ በቲ ንህዝብኻ ዝሀብካዮ ጸጋ ዘክረኒ፡ ጣዕሚ ሕሩያትካ ኽርኢ፡

⁵ብሓጐስ ህዝብኻ ኽሕጐስ ምስ ርስትኻውን ምእንቲ ክኽብርሲ፡ ብምድሓንካ ብጽሓኒ።

⁶ምስ ኣቦታትና ሓጢኣት ገበርና፡ በደልና። ግፍዒ ገበርና።

⁷ኣቦታትና ኣብ ግብጺ ንተኣምራትካ ኣየስተውዐልዎን፡ ንብዝሒ ጸጋኻ ኣይዘከርዎን፡ ኣብ ባህሪ፡ ኣብቲ ባሕሪ ኤርትራ፡ ዐለዉ።

⁸ንሱ ግና ስልጣኑ ምእንቲ ኼፍልጥሲ፡ ስለ ስሙ ኢሉ ኣድሐኖም።

⁹ንባሕሪ ኤርትራ ገንሓ እሞ ነቐጸት፡ ከም ብበረኻ ድማ ብዓሚቚ መርሖም።

¹⁰ካብ ኢድ ተጻራሪኦም ኣድሐኖም፡ ካብ ኢድ ጸላኢ ኸኣ ተበጀዎም።

¹¹ንተጻረርቶም ከኣ ማያት ደፈኖም፡ ካብኦም ሓደ እኳ ኣይተረፈን።

¹²ሽዑ ንቓላቱ ኣመኑ፡ ምስጋኑኡ ዘመሩ።

¹³ንተግባሩ ቐልጢፎም ረስዕዎ፡ ንምኽሩ ኣይተጸበይዎን።

¹⁴ኣብ በረኻ ኣዝዮም ተመነዩ፡ ኣብቲ ጽምዋ ንእግዚኣብሄር ፈተኑ።

¹⁵ንሱ ኸኣ ዝለመንዎ ሀቦም፡ ግናኸ ንነፍሶም ዕብራን ለኣኸሎም።

¹⁶ኣብቲ ሰፈር ንሙሴን ንኣሮን፡ ናይ እግዚኣብሄር ቅዱስን፡ ቀንኡሎም።

¹⁷ምድሪ ተኸፊታ ንዳታን ወሐጠቶ፡ ንወገን ኣቢራም ከኣ ደፈነቶ።

¹⁸ሓዊ ኣብ ማእከል ወገኖም ነደድ፡ ሃልሃልታ ንረሲኣን ወሐጦም።

¹⁹ኣብ ሆሬብ ምራኽ ገበሩ፡ ንዘፈስስ ምስሊ ኸኣ ሰገዱሉ።

²⁰ክብረቶም ንምስሊ ሳዕሪ ዚበልዕ ብዕራይ ለወጥዎ።

²¹ኣብ ግብጺ ዓብዪ ተግባር፡ ኣብ ሃገር ካም ተኣምራት፡

²²ኣብ ባሕሪ ኤርትራ ዜፍርህ ነገር ዝገበረ ኣምላኽ፡ መድሓኒኦም፡ ረስዕዎ።

²³ሽዑ ኼጥፍኦም ደልዩ ተዛረበ፡ ግናኸ ሙሴ፡ እቲ ሕሩዩ፡ ከየጥፍኦም ቊጥዓኡ ምእንቲ ኺመልስ፡ ኣብ ቅድሚ ገጹ ኣብ ማእከል ቈመ።

²⁴ነታ ፍትውቲ ሃገር ነዐቑ፡ ብቓሉውን ኣይኣመኑን።

²⁵ኣብ ድንኳናቶም ኣጒረምረሙ፡ ንድምጺ እግዚኣብሄር ከኣ ኣይሰምዕዎን።

²⁶ሽዑ ኢዱ ናብኦም ኣልዒሉ፡ ኣብ በረኻ ኼውድቖም፡

²⁷ንዘርኦም ከኣ ኣብ ማእከል ኣህዛብ ኬውድቖም፡ ኣብ ሃገራትውን ፋሕ ኬብሎም መሐለ።

²⁸ምስ በዓል ጴኦር ሐበሩ፡ መስዋእቲ ምዉታት ከኣ በልዑ።

²⁹ብግብርታቶም ከኣ ኣዀረይዎ፡ መዓትውን ወረዶም።

³⁰ሽዑ ፊንሃስ ተንሲኡ ፍትሒ ኣውጽኤ፡ እቲ መዓት ድማ ዛረየ።

³¹እዚ ኸኣ ንሓዋሩ ንውሉድ ወለዶ ጽድቂ ዀይኑ ተቘጽረሉ።

³²ኣብ ማይ መሪባ ድማ ኣዀረይዎ፡ ሙሴውን ብሰሮም ተጐድኤ።

³³ንመንፈሱ ኣንጸርጺሮምዎ ነበሩ እሞ፡ ብኸናፍሩ ዕሽነት ተዛረበ።

³⁴ምስ ኣህዛብ ተሓባበሩ፡ ግብርታቶም ከኣ ተማህሩ እምበር፡

³⁵ከምቲ እግዚኣብሄር ዝእዘዞም፡ ነህዛብ ኣየጽነትዎምን።

³⁶ንጣኦታቶም ኣገልገሉ፡ ንሳቶም ከኣ መፈንጠርያ ዀንዎም።

³⁷ኣወዳቶምን ኣዋልዶምን ነጋንንቲ ሰውኡሎም።

³⁸ንጹህ ደም፡ ደም ኣወዳቶምን ኣዋልዶምን፡ ኣፍሰሱ፡ ንጣኦታት ከነኣን ሰውእዎም፡ እታ ሃገርውን ብደም ረኸሰት።

³⁹በዚ ኸምዚ ብተግባሮም ረኸሱ፡ ብግብርታቶም ከኣ ኣመንዘሩ።

⁴⁰ሽዑ ቚጥዓ እግዚኣብሄር ኣብ ህዝቡ ነደደ፡ ንርስቱ ኸኣ ፈንፈኖ።

⁴¹ኣብ ኢድ ኣህዛብ ኣሕሊፉ ሀቦም፡ እቶም ዝጸልእዎም ድማ መለኽዎም።

⁴²ጸላእቶም ከኣ ጠቕዕዎም፡ ኣብ ትሕቲ ኣእዳዎም ድማ ተዋረዱ።

⁴³ብዙሕ ጊዜ ኣናገፎም፡ ንሳቶም ግና ብምኽሮም ዐለዉ፡ ብኣበሳኦምውን ተዋረዱ።

⁴⁴ኣውያቶም ምስ ሰምዔ ኸኣ፡ ጸበባኦም ረኣየ።

⁴⁵ንኺዳኑ ድማ ዘከረሎም፡ ብመጠን ብዝሒ ሳህሉውን ራሕርሓሎም።

⁴⁶ኣብ ቅድሚ ዂሎም ማረኽቶም ከኣ ሞገስ ሀቦም።

⁴⁷ዎ እግዚኣብሄር ኣምላኽና፡ ንቕዱስ ስምካ ኽንውድሶ፡ ብምስጋናኻውን ክንምካሕሲ፡ ኣናግፈናን ካብ ማእከል ኣህዛብ ኣክበናን።

⁴⁸እግዚኣብሄር ኣምላኽ እስራኤል ካብ ዘለኣለም ንዘለኣለም ይባረኽ። ሓምሳይ መጽሓፍ።