Read መ/ቅዱስ ትግርኛ, Tigrigna Bible, 1997 መዝሙር ዳዊት 109 Bible Online

መዝሙር ዳዊት 109 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 109

¹ኣታ ኣምላኽ ምስጋናይ፡ ኣፍ ረሲኣን ኣፍ ጥበራን ናባይ ተኸፊቶም፡

²ብሓሳዊት መልሓስ ይዛረቡኒ፡ ብቓላት ጽልኢ ኸቢቦምኒ፡

³ብዘይ ምኽንያት ይዋግኡኒ ኣለዉ እሞ፡ ስቕ ኣይትበል።

⁴ኣብ ክንዲ ዘፍቀርክዎም ተጻረሩኒ፡ ኣነ ግና እጽሊ ኣሎኹ።

⁵ኣብ ክንዲ ሰናይ እከይ፡ ኣብ ክንዲ ፍቕረይ ከኣ ጽልኢ ፈድዮምኒ።

⁶ረሲእ ኣብ ልዕሊኡ ኣቚመሉ፡ ተጻራሪ ኣብ የማኑ ይቑም።

⁷ምስ ተፈርደ፡ ተረቲዑ ይውጻእ፡ ጸሎቱውን ንሓጢኣት ይኹኖ።

⁸መዓልትታቱ ሒደት ይኹና፡ ንሽመቱውን ካልእ ይውሰዳ።

⁹ውሉዱ ዘኽታማት ይኹኑ፡ ሰበይቱውን መበለት ትኹን።

¹⁰ውሉዱ እናዞሩ ይለምኑ፡ ካብተን ዝዐነዋ ኣባይቶም ርሒቖም፡ እንጌራ ይድለዩ።

¹¹ንዘለዎ ዂሉ እቲ መሓረጺ ይሐዞ፡ ጓኖት ከኣ ንጻማኡ ይዝመትዎ።

¹²ዚልውሃሉ ሓደ እኳ ኣይረኸብ፡ ንዘኽታማቱ ዚርሕርሓሎም ከኣ ሓደ እኳ ኣይሀሉ።

¹³ሐድጉ ይጽነቱ፡ ስሞም ኣብ ካልኣይ ወለዶ ይደምሰስ።

¹⁴በደል ኣቦታቱ ኣብ ቅድሚ እግዚኣብሄር ይዘከር፡ ሓጢኣት ኣዲኡ ኸኣ ኣይደምሰስ።

¹⁵ኲሉ ጊዜ ኣብ ቅድሚ እግዚኣብሄር ይኹኑ፡ መዘከርታኦም ካብ ምድሪ የጥፍኣዮ።

¹⁶ንመስኪንን ንድኻን፡ ነቲ ልቡ እተሰብረን ምእንቲ ኪቐትሎም ሰጐጎም እምበር፡ ምሕረት ኪገብር ስለ ዘይሐሰበ፡

¹⁷ንመርገም ፈተዋ፡ ንሳ ኸኣ መጸቶ፡ ንበረኽት ኣይበሀጋን፡ ንሳውን ረሐቐቶ።

¹⁸ንመርገም ከም ክዳኑ ተኸድና፡ ንሳ ኸኣ ከም ማይ ናብ ውሽጡ፡ ከም ቅብኢውን ናብ ኣዕጽምቱ ሰረጸት።

¹⁹ከምቲ ዚጓናጸፈሉ ልብስን፡ ከምቲ ዂሉ ጊዜ ዚዕጠቖ ቕናትን ይኹኖ።

²⁰እዚ ኻብ እግዚኣብሄር ናይ ተጻረርተይን ናይቶም ኣብ ነፍሰይ ክፉእ ዚዛረቡን ፍዳ ይኹን።

²¹ዎ እግዚኣብሄር ኣምላኽ፡ ስለ ስምካ ኢልካ ርድኣኒ፡ ጸጋኻ ሰናይ እዩ እሞ፡ ኣናግፈኒ።

²²ኣነ መስኪንን ድኻን እየ እሞ፡ ልበይ ኣብ ውሽጠይ ቈሲሉ ኣሎ።

²³ከም ዚነውሕ ጽላሎት እኸይድ፡ ከም ኣንበጣውን እሰጐጒ ኣሎኹ።

²⁴ኣብራኸይ ብጾም ራዕራዕ በለ፡ ስጋይ ከኣ ካብ ስብሒ ዐበረ።

²⁵መላገጺኦም ከኣ ዀንኩ፡ እተን ረኣዩኒ ርእሶም ይንቕንቑ።

²⁶ዎ እግዚኣብሄር ኣምላኸይ፡ ርድኣኒ፡ እዚ ኢድካ ምዃኑ፡

²⁷ንስኻ ኸም ዝገበርካዮ ኺፈልጡስ፡ ዎ እግዚኣብሄር፡ ብመጠን ጸጋኻ ኣናግፈኒ።

²⁸ንሳቶም ይረግሙ፡ ንስኻ ግና መርቕ፡ እንተ ተንስኡ፡ ኪሐፍሩ እዮም። ባርያኻ ግና ኪሕጐስ እዩ።

²⁹ተጻረርተይ ውርደት ይከደኑ፡ ንነውሮም ከኣ ከም ነጸላ ይወንዘፍዎ።

³⁰ካብቶም ንነፍሱ ዚዂንንዋ ኼድሕኖስ፡ ኣብ የማን እቲ ድኻ ቈይሙ ኣሎ እሞ፡

³¹ካንእግዚኣብሄር ብኣፈይ ኣዝየ ኸመስግኖ፡ ኣብ ማእከል ብዙሓትውን ክውድሶ እየ።