Read መ/ቅዱስ ትግርኛ, Tigrigna Bible, 1997 መዝሙር ዳዊት 118 Bible Online

መዝሙር ዳዊት 118 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 118

¹እግዚኣብሄር ሰናይ እዩ፡

²ምሕረቱ ንዘለኣለም ከም ዚነብር፡ እስራኤል ይበል።

³ምሕረቱ ንዘለኣለም ከም ዚነብር፡ ቤት ኣሮን ይበል።

⁴ምሕረቱ ንዘለኣለም ከም ዚነብር፡ እቶም ንእግዚኣብሄር ዚፈርህዎ ይበሉ።

⁵ኣብ ጸበባይ ንእግዚኣብሄር ጸዋዕኩ፡ እግዚኣብሄር መለሰለይ ኣርሐበለይ ድማ።

⁶እግዚኣብሄር ምሳይ እዩ፡ ኣይፈርህን፡ ሰብከ እንታይ ከይገብረኒ?

⁷እግዚኣብሄር ምሳይ እዩ፡ ረዳእየይ እዩ፡ ኣብ ጸላእተይ ትምኒተይ ክርኢ እየ።

⁸ካብ ኣብ ሰብ ምውካልሲ ኣብ እግዚኣብሄር ምዕቋብ ይሐይስ።

⁹ካብ ኣብ መሳፍንቲ ምውካልሲ ኣብ እግዚኣብሄር ምዕቋብ ይሐይስ።

¹⁰ኲሎም ኣህዛብ ከበቡኒ፡ ብስም እግዚኣብሄር ክቘርጾም እየ።

¹¹ከበቡኒ፡ እወ ኸበቡኒ፡ ብስም እግዚኣብሄር ክቘርጾም እየ።

¹²ከም ንህቢ ኸበቡኒ፡ ከም ሓቂ ቘጥቋጥ ጠፍኡ፡ ብስም እግዚኣብሄር ክቘርጾም እየ።

¹³ከተውድቐኒ ኢልካ ደፋእካኒ፡ እግዚኣብሄር ግና ረድኣኒ።

¹⁴ሓይለይን መዝሙረይን እግዚኣብሄር እዩ፡ ንሱውን ምድሓነይ ኰነ።

¹⁵ኣብ ድንኳናት ጻድቃን ድምጺ እልልታን ምድሓንን ኣሎ፡ የማነይቲ ኢድ እግዚኣብሄር ሓይሊ ትገብር።

¹⁶የማነይቲ እግዚኣብሄር ልዕል ትብል፡ የማነይቲ እግዚኣብሄር ሓይሊ ይገብር ኣላ።

¹⁷ብህይወት ክነብር እየ እምበር፡ ኣይክመውትን፡ ግብሪ እግዚኣብሄር ከኣ ከዘንቱ እየ።

¹⁸እግዚኣብሄር ኣዝዩ ቐጽዓኒ፡ ንሞት ግና ኣይወፈየንን።

¹⁹ብእኤን ኣትየ ንእግዚኣብሄር ከመስግኖስ፡ ደጌታት ጽድቂ ኽፈቱለይ።

²⁰ደገ እግዚኣብሄር እዚኣ እያ፡ ጻድቃን ብእኣ ኺኣትዉ እዮም።

²¹ሰሚዕካኒ ምድሓነይውን ኴንካ ኢኻ እሞ፡ ከመስግነካ እየ።

²²ነደቕቲ ዝነዐቕዎ እምኒ፡ ንሱ ርእሲ መኣዝን ኰነ።

²³እዚ ኻብ እግዚኣብሄር ኰነ፡ ነዒንትናውን ግሩም እዩ።

²⁴እታ እግዚኣብሄር ዝገበራ መዓልቲ እዚኣ እያ፡ ብእኣ ንተሐጐስን ባህ ይበለናን።

²⁵ዎ እግዚኣብሄር፡ ኣድሕን ኰታ፡ ኣታ እግዚኣብሄር፡ ኣሰልጥን ኰታ።

²⁶እቲ ብስም እግዚኣብሄር ዚመጽእ ብሩኽ እዩ፡ ካብ ቤት እግዚኣብሄር ንባርኸኩም ኣሎና።

²⁷እግዚኣብሄርሲ ኣምላኽ እዩ፡ ንሱውን ኣብረሀልና፡ ነቲ መስዋእቲ በዓል ዓመት ክሳዕ ኣቕርንቲ መሰውኢ ብገመድ እሰሩ።

²⁸ንስኻ ኣምላኸይ ኢኻ፡ ኤመስግነካ፡ ዎ ኣምላኸይ፡ ልዕል ኤብለካ ኣሎኹ።

²⁹እግዚኣብሄር ሰናይ እዩ፡ ምሕረቱ ንዘለኣለም ይነብር እዩ እሞ፡ ኣመስግንዎ።