Read መ/ቅዱስ ትግርኛ, Tigrigna Bible, 1997 መዝሙር ዳዊት 119 Bible Online

መዝሙር ዳዊት 119 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 119

¹ብመገዶም ፍጹማት ዝዀኑ፡

²ምስክራቱ ዚሕልዉ፡ ብምሉእ ልቢ ዚደልይዎ ብጹኣን እዮም።

³እከይ ኣይገብሩን፡ ብመገድታቱ ኸኣ ይመላለሱ።

⁴ኣጸቢቑ ምእንቲ ኺሕሎ፡ ትእዛዛትካ ኣዘዝካ።

⁵ኣየ፡ ስርዓታትካ ኽሕሉስ፡ መገደይ እንተ ዚቐንዕ።

⁶ንዂሉ ትእዛዛትካ እንት ዝቋመት፡ ሽዑ ኣይምሐፈርኩን።

⁷ፍርዲ ጽድቅኻ ምስ ተምሀርኩ፡ ብቕንዕና ልቢ ኸመስግነካ እየ።

⁸ስርዓታትካ ኽሕሉ እየ፡ ፈጺምካ ኣይትሕደገኒ።

⁹ጐበዝ ንመገዱ ብምንታይ የንጽሃ? ከም ቃልካ ንነፍሱ ብምጥንቃቕ እዩ።

¹⁰ብምሉእ ልበይ እደልየካ ኣሎኹ፡ ካብ ትእዛዛትካ ኸየግልስ ኣይትሕደገኒ።

¹¹ንኣኻ ምእንቲ ኸይብድልሲ፡ ንቓልካ ኣብ ልበይ ዐቘርክዎ።

¹²ዎ እግዚኣብሄር፡ ንስኻ ብሩኽ ኢኻ፡ ስርዓታትካ ምሀረኒ።

¹³ንዂሉ ፍርድታት ኣፍካ ብኸናፍረይ ኣዘንቶኹ።

¹⁴ብመገዲ ምስክራትካ ኸም ብዂሉ ሃብቲ ገይረ ተሐጐስኩ።

¹⁵ንትእዛዛትካ ኤስተንትኖ፡ ንመገድኻውን እቋመቶ ኣሎኹ።

¹⁶ብስርዓታትካ ባህ እብል፡ ንቓልካ ኣይክርስዖን እየ።

¹⁷ብህይወት ክነብር፡ ቃልካውን ክሕሉስ፡ ንባርያኻ ሰናይ ግበረሉ።

¹⁸ኣብ ሕግኻ ተኣምራት ክርእስ፡ ኣዒንተይ ክፈተለይ።

¹⁹ኣነ ኣብ ምድሪ ጋሻ እየ፡ ትእዛዛትካ ኣይትሕብኣለይ።

²⁰ነፍሰይ፡ ኲሉ ጊዜ ፍርድኻ ብምንፋቕ ተቐጥቀጠት።

²¹ነቶም ትዕቢተኛታት፡ ነቶም ካብ ትእዛዛትካ ዜግልሱ ርጉማት ገናሕካ።

²²ምስክራት ሐልየ እየ እሞ፡ ጸርፍን ንዕቀትን ኣርሕቐለይ።

²³መሳፍንቲ ተቐሚጦም እኳ እንተ ሐመዩኒ፡ ባርያኻስ ብስርዓታትካ የስተንትን ኣሎ።

²⁴ምስክራትካ ድማ ባህታይን መኸርተይን እዮም።

²⁵ነፍሰይ ኣብ ሓመድ ተጣበቐት፡ ከም ቃልካ ህያው ግበረኒ።

²⁶መገደይ ኣዘንቶኹ፡ ንስኻውን መለስካለይ፡ ስርዓታትካ ምሀረኒ።

²⁷ንተኣምራትካ ኸስተንትኖስ፡ መገዲ ትእዛዛትካ ኣፍልጠኒ።

²⁸ነፍሰይ ብሓዘን ትነብዕ ኣላ፡ ከም ቃልካ ኣደልድለኒ።

²⁹መገዲ ሓሶት ኣርሕቐለይ፡ ሕግኻውን ብሳህልኻ ፍቐደለይ።

³⁰መገዲ ሓቂ መረጽኩ፡ ፍርድታትካ ኣብ ቅድመይ ኣንበርኩ።

³¹ኣብ ምስክራትካ እጠብቕ፡ ዎ እግዚኣብሄር፡ ኣይተሕፍረኒ።

³²ልበይ ምስ ኣግፋሕካ፡ ብመገዲ ትእዛዛትካ ኽጐዪ እየ።

³³ዎ እግዚኣብሄር፡ መገዲ ስርዓታትካ ምሀረኒ፡ ክሳዕ መወዳእታውን ክሕልዎ እየ።

³⁴ምስትውዓል ሀበኒ እሞ፡ ንሕግኻ ኽሕልዎ፡ ብምሉእ ልበይውን ክገብሮ እየ።

³⁵ብእኡ ባህ ኢሉኒ እዩ እሞ፡ ብመገዲ ትእዛዛትካ ኣመላልሰኒ።

³⁶ንልበይ ናብ ምስክራትካ እምበር፡ ናብ ስስዔ ገንዘብ ኣይተዝብሎ።

³⁷ነዒንተይ ካብ ምርኣይ ከንቱነት ምለሰን፡ ብመገድኻ ህያው ግበረኒ።

³⁸ነቲ ናብ ፍርሃትካ ዚመርሕ ቃልካ ኣብ ባርያካ ኣጽንዓዮ።

³⁹ፍርድታትካ ሰናይ እዩ እሞ፡ ነቲ ዝፈርሆ ጸርፊ ኣርሕቐለይ።

⁴⁰እንሆ፡ ትእዛዛትካ እናፍቕ ኣሎኹ፡ ብጽድቅኻ ህያው ግበረኒ።

⁴¹ዎ እግዚኣብሄር፡ ከምቲ ቓልካ ምሕረትካን ምድሓንካን ይምጽኣኒ።

⁴²ኣብ ቃልካ ተወኪለ እየ እሞ፡ ነቲ ዚጸርፈኒ ምላሽ ክህቦ እየ።

⁴³ንፍርድታትካ እጽበ ኣሎኹ እሞ፡ ነቲ ቓል ሓቂ ኻብ ኣፈይ ፈጺምካ ኣይተግድፈኒ።

⁴⁴ኣነውን ንሕግኻ ኣዘውቲረ፡ ኲሉ ጊዜ፡ ንዘለኣለም ክሕልዎ እየ።

⁴⁵ትእዛዛትካ ድማ ደልየ እየ እሞ፡ ብገፊሕ ቦታ ኽመላለስ እየ።

⁴⁶ኣብ ቅድሚ ነገስታት ከኣ ምስክራትካ ኽዛረብ፡ ኣይክሐፍርን ድማ እየ።

⁴⁷በቲ ዘፍቅሮ ትእዛዛትካውን ባህ ክብል እየ።

⁴⁸ኣእዳወይ ድማ ናብቲ ዘፍቅሮ ትእዛዛትካ ኸልዕል፡ ስርዓታትካ ኸኣ ከስተንትን እየ።

⁴⁹ነቲ ንባርያኻ ዘተስፎኻዮ ቓል ዘክር።

⁵⁰ቃልካ ህያው ገይሩኒ እዩ እሞ፡ እዚ ኣብ መከራይ መጸናንዕየይ እዩ።

⁵¹ትዕቢተኛታት ኣዝዮም ኣላገጹለይ፡ ኣነ ግና ካብ ሕግኻ ኣየግለስኩን።

⁵²ጐይታየ፡ ናይ ጥንቲ ፍርድታትካ እናሐሰብኩ፡ እጸናናዕ ኣሎኹ።

⁵³ብሰሪ እቶም ሕግኻ ዝሐደጉ ረሲኣን ብቚጥዓ ተቓጸልኩ።

⁵⁴ኣብ ቤት ግሽነተይ ስርዓታትካ መዝሙራተይ እዩ።

⁵⁵ዎ እግዚኣብሄር፡ ብለይቲ ስምካ ሐሰብኩ፡ ሕግኻውን ሐሎኹ።

⁵⁶ትእዛዛትካ ሐልየ እየ እሞ፡ እዚ ዕድለይ ኰነ።

⁵⁷ጐይታየ፡ ምሕላው ቃልካ ግደይ እዩ፡ በልኩ።

⁵⁸ብምሉእ ልበይ ኣባኻ እምህለል ኣሎኹ፡ ከም ቃልካ ምሐረኒ።

⁵⁹ንመገደይ ሐሰብኩ፡ ኣእጋረይውን ናብ ምስክራትካ መለስኩ።

⁶⁰ትእዛዛትካ ንምሕላው ቀልጠፍኩ እምበር፡ ኣይደንጔኹን።

⁶¹ኣግማድ ረሲኣን ከበበኒ፡ ሕግኻ ግና ኣይረሳዕኩን።

⁶²ስለቲ ጻድቕ ፍርድኻ ኸመስግነካ፡ ፍርቂ ለይቲ ኽትንስእ እየ።

⁶³ኣነ ብጻይ እቶም ዚፈርሁኻ ዂሎምን ትእዛዛትካ ዚሕልዉን እየ።

⁶⁴ጐይታየ፡ ምድሪ ብጸጋኻ መሊኣ ኣላ፡ ስርዓታትካ ምሀረኒ።

⁶⁵ዎ እግዚኣብሄር፡ ከም ቃልካ ንባርያኻ ሰናይ ገበርካሉ።

⁶⁶ትእዛዛትካ ኣሚነ ኣሎኹ እሞ፡ ሰናይ ምስትውዓልን ፍልጠትን ምሀረኒ።

⁶⁷ከይተዋረድኩ ተጋጌኹ፡ ሕጂ ግና ቓልካ እሕሉ ኣሎኹ።

⁶⁸ንስኻ ሰናይ ኢኻ እሞ፡ ሰናይ ትገብር ኣሎኻ፡ ስርዓትካ ምሀረኒ።

⁶⁹ትዕቢተኛታት ሓሶት ይፍሕሱለይ ኣለዉ፡ ኣነ ግና ብምሉእ ልበይ ትእዛዛትካ እሕሉ ኣሎኹ።

⁷⁰ልቦም ከም ስብሒ ረጐደ፡ ኣነ ግና ብሕግኻ ባህ እብል ኣሎኹ።

⁷¹ስርዓታትካ ምእንቲ ኽምሀር፡ ውርደተይ ሰናይ ኰነለይ።

⁷²ካብ ኣእላፋት ወርቅን ብሩርንሲ ሕጊ ኣፍካ ይሔሸኒ።

⁷³ኣእዳውካ ገበራንን ሰርሓንን፡ ትእዛዛትካ ኽምሀርሲ፡ ኣለብመኒ።

⁷⁴ንቓልካ ተጸብየ እየ እሞ፡ እቶም ዚፈርሁኻ ርእዮምኒ ኺሕጐሱ ኣዮም፡

⁷⁵ጐይታየ፡ ፍርድኻ ጽድቂ ምዃኑ፡ ብሓቅኻውን ከም ዘዋረድካኒ፡ እፈልጥ ኣሎኹ።

⁷⁶ከምቲ ንባርያኻ ዝበልካዮ ቓል፡ ጸጋኻ መጸናንዒ ይኹነኒ።

⁷⁷ሕግኻ ደስታይ እዩ እሞ፡ ብህይወት ክነብርሲ፡ ምሕረትካ ይውረደኒ።

⁷⁸ዕቡያት ብሓሶት ጠውዮምኒ እዮም እሞ፡ ይሕፈሩ፡ ኣነ ግና ትእዛዛትካ ኤስተንትን ኣሎኹ።

⁷⁹እቶም ዚፈርሁኻን ምስክራትካ ዚፈልጡን ናባይ ይመለሱ።

⁸⁰ምእንቲ ኸይሐፍርሲ፡ ልበይ ብስርዓታትካ ፍጹም ይኹን።

⁸¹ነፍሰይ ንምድሓንካ ትናፍቖ ኣላ፡ ንቓልካ እጽበዮ ኣሎኹ።

⁸²መኣዝ ኢኻ እተጸናንዓኒ? እናበልኩ፡ ብናፍቖት ቃልካ ኣዒንተይ ሐመቓ።

⁸³ከም ኣብ ትኪ ዘሎ ሓርቢ ዀንኩ፡ ስርዓታትካ ግና ኣይረሳዕኩን።

⁸⁴መዓልትታት ባርያኻ ኽንደይ እየን? ንሰጐጒተይከ መኣዝ ኢኻ እትፈርዶም?

⁸⁵እቶም ከም ሕግኻ ዘይነበሩ ትዕቢተኛታት ጒድጓድ ኰዐቱለይ።

⁸⁶ኲሉ ትእዛዛትካ ሓቂ እዩ፡ ብዘይ ምኽንያት ይሰጉኒ ኣለዉ፡ ርድኣኒ።

⁸⁷ካብ ምድሪ ኼጥፍኡኒ ቕሩብ ተረፎም፡ ኣነ ግና ትእዛዛትካ ኣይሐደግኩን።

⁸⁸ከም ጸጋኻ ህያው ግበረኒ፡ ኣነውን ምስክር ኣፍካ ኽሕሉ እየ።

⁸⁹ዎ እግዚኣብሄር፡ ቃልካ ንዘለኣለም ኣብ ሰማይ ጸኒዑ ኣሎ።

⁹⁰ሓቅኻ ኻብ ወለዶ ንወለዶ እዩ፡ ንምድሪ ኣጽኒዕካያ፡ ንሳውን ትነብር ኣላ።

⁹¹ብዘሎ ዂሉ ንኣኻ የገልግል እዩ እሞ፡ ክሳዕ ሎሚ ኸም ሕጋጋትካ ቘይሙ ኣሎ።

⁹²ሕግኻ ደስታይ እንተ ዘይነብርሲ፡ ዛጊት ብመከራይ ምጠፋእኩ ነይረ።

⁹³ብእኡ ህያው ጌርካኒ ኢኻ እሞ፡ ንትእዛዛትካ ከቶ ኣይክርስዖን እየ።

⁹⁴ትእዛዛትካ ደልየ እየ እሞ፡ ናትካ እየ፡ ኣድሕነኒ።

⁹⁵ረሲኣን፡ ምእንቲ ኼጥፍኡኒ፡ ይጸናተዉኒ ኣለዉ፡ ኣነ ግና ንምስክራትካ ኤስተብህሎ ኣሎኹ።

⁹⁶ኲሉ ፍጽምነት መወዳእታኡ ርኤኹ፡ ትእዛዝካ ግና ኣዝዩ ርሒብ እዩ።

⁹⁷ንሕግኻ እምብዛ ኣፍቀርክዎ፡ ምሉእ መዓልቲ ኤስተንትኖ ኣሎኹ።

⁹⁸ትእዛዛትካ ንሓዋሩ ምሳይ እዩ እሞ፡ ሓለፋ ጸላእተይ ኣለበመኒ።

⁹⁹ምስክራትካ ምስትንታነይ እዩ እሞ፡ ሓለፋ ዂሎም መምህራነይ ለባም ኰንኩ።

¹⁰⁰ትእዛዛትካ ሐልየ እየ እሞ፡ ሓለፋ እቶም ሽማግሌታት ኣእምሮ ኣሎኒ።

¹⁰¹ቃልካ ምእንቲ ኽሕሉስ፡ ኣእጋረይ ካብ ክፉእ ዘበለ መገዲ ኸልከልኩ።

¹⁰²ንስኻ ምሂርካኒ ኢኻ እሞ፡ ካብ ፍርድኻ ኣይርሕቕን እየ።

¹⁰³ቃላትካ ንትንሓገይ እምብዛ ጥዑም እዩ፡ ንኣፈይ ካብ መዓር ዝበለጸ ይምቅር።

¹⁰⁴ሳላ ትእዛዛትካ ኣእምሮ ረኸብኩ፡ ስለዚ ዂሉ መገዲ ሓሶት ጸላእኩ።

¹⁰⁵ቃልካ ንእግረይ መብራህቲ፡ ንመገደይ ብርሃን እዩ።

¹⁰⁶ንፍርድታት ጽድቅኻ ኽሕሉ መሐልኩ፡ ኣጽናዕክዎ ኸኣ።

¹⁰⁷ኣዝየ ተጨነቕኩ፡ ዎ እግዚኣብሄር፡ ከም ቃልካ ህያው ግበረኒ።

¹⁰⁸ዎ እግዚኣብሄር፡ ፍርድታትካ ምሀረኒ፡ እቲ ፈትየ ዘቕርበልካ መስዋእቲ ኣፈይ ባህ የብልካ።

¹⁰⁹ነፍሰይ ኲሉ ጊዜ ኣብ ኢደይ እያ፡ ኣነ ግና ሕግኻ ኣይርስዕን እየ።

¹¹⁰ረሲኣን መፈንጠርያ ኣጻወዱለይ፡ ኣነ ግና ካብ ትእዛዛትካ ኣየግለስኩን።

¹¹¹ምስክራትካ ሓጐስ ልበይ እዩ እሞ፡ ንዘለኣለም ርስተይ ገበርክዎ።

¹¹²ስርዓታትካ ንሓዋሩ ኽሳዕ መወዳእታ ኽገብር፡ ልበይ ኣድነንኩ።

¹¹³ክልተ ዝልቦም ጸላእኩ፡ ሕግኻ ግና ፈቶኹ።

¹¹⁴ንስኻ መዕቈብየይን ዋልታይን ኢኻ፡ ብቓልካ ተስፋ እገብር ኣሎኹ።

¹¹⁵ትእዛዛት ኣምላኸይ ክሕሉስ፡ ኣቱም ሕሱማት፡ ካባይ ርሐቑ።

¹¹⁶ብህይወት ክነብርሲ፡ ከም ቃልካ ደግፈኒ፡ ብተስፋይ ድማ ኣይተሕፍረኒ።

¹¹⁷ምእንቲ ኽድሕን ደግፈኒ፡ ንስርዓታትካውን ኲሉ ጊዜ ኽቋመቶ እየ።

¹¹⁸ተንኰሎም ሓሶት እዩ እሞ፡ ነቶም ካብ ስርዓታተካ ዜግልሱ ዂሎም ትረግጾም።

¹¹⁹ንስኻ ንዂሎም ረሲኣን ምድሪ ኸም ሓርኢ ሓጺን ትጒሕፎም፡ ስለዚ ንምስክራትካ ኣፍቀርኩ።

¹²⁰ካብ ስምባድካ እተላዕለ ስጋይ ይርዕድ፡ ፍርድኻውን የሸብረኒ ኣሎ።

¹²¹ፍርድን ጽድቅን እገብር ኣሎኹ፡ ነቶም ጠቓዕተይ ኣሕሊፍካ ኣይትሀበኒ።

¹²²ንባርያኻ ብሰናይ ተውሐሶ፡ ዕቡያት ኪጠቕዑኒ ኣይትፍቀደሎም።

¹²³ኣዒንተይ ብናፍቖት ምድሓንካን ቃል ጽድቅኻን ሐመቓ።

¹²⁴ከም ጸጋኻ ንባርያኻ ግበረሉ፡ ስርዓታትካ ኸኣ ምሀረኒ።

¹²⁵ኣነ ባርያኻ እየ፡ ምስክራትካ ኽፈልጥሲ፡ ኣእምሮ ሀበኒ።

¹²⁶ሕግኻ ኣፍሪሶም እዮም እሞ፡ እግዚኣብሄር ግብሩ ዚገብረሉ ጊዜ እዮ።

¹²⁷ስለዚ ንትእዛዛትካ ኻብ ወርቂ፡ ካብ ጽሩይ ወርቂ ኣብሊጸ እፈትዎ ኣሎኹ።

¹²⁸ስለዚ ትእዛዛትካ ዘበለ ዂሉ ቕኑዕ ምዃኑ እቘጽሮ፡ መገዲ ሓሶት ዘበለ ኸኣ እጸልኦ ኣሎኹ።

¹²⁹ምስክራትካ መስተንክር እዩ፡ ስለዚ ነፍሰይ ትሕልዎ።

¹³⁰ምኽፋት ቃልካ የብርህ፡ ንገርህታት ኣእምሮ ይህብ።

¹³¹ትእዛዛትካ ናፊቐ እየ እሞ፡ ኣፈይ ሃህ ኣቢለ እህህ እብል ኣሎኹ።

¹³²ከምቲ ነቶም ስምካ ዚፈትዉ እትገብረሎም፡ ተመለሰንን ምሐረንን።

¹³³ንስጒምተይ ኣብ ቃልካ ኣጽንዓዮ፡ እከይ ድማ ከቶ ኣይምለኸኒ።

¹³⁴ካብ መጥቃዕቲ ሰብ ተበጀወኒ፡ ኣነውን ትእዛዛትካ ኽሕሉ እየ።

¹³⁵ገጽካ ንባርያካ ኣብርሃሉ፡ ስርዓታትካ ኸኣ ምሀረኒ።

¹³⁶ሕግኻ ኣይሕልዉን እዮም እሞ፡ ኣዒንተይ ወሓዚ ማይ የፍስሳ ኣለዋ።

¹³⁷ዎ እግዚኣብሄር፡ ንስኻ ጻድቕ ኢኻ፡ ፍርድኻ ድማ ቅኑዕ እዩ።

¹³⁸ብጽድቅን ብዕዙዝ ሓቅን ምስክራትካ ኣዘዝካ።

¹³⁹ተጻረርተይ ቃልካ ረሲዖም እዮም እሞ፡ ቅንኣተይ ይበልዓኒ ኣሎ።

¹⁴⁰ቃልካ ኣዝዩ ጽሩይ እዩ፡ ባርያኻውን የፍቅሮ ኣሎ።

¹⁴¹ኣነ፡ ንኡስን ንዑቕን እየ፡ ትእዛዛትካ ግና ኣይረሳዕኩን።

¹⁴²ጽድቅኻ ናይ ዘለኣለም ጽድቂ እዩ፡ ሕግኻውን ሓቂ እዩ።

¹⁴³መከራን ሽጋርን ረኸበኒ፡ ትእዛዛትካ ግና ደስታይ እዩ።

¹⁴⁴ምስክራትካ ንዘለኣለም ጽድቂ እዩ፡ ኣእምሮ ሀበኒ እሞ፡ ብህይወት ክነብር እየ።

¹⁴⁵ብምሉእ ልበይ እምህለል ኣሎኹ፡ ዎ እግዚኣብሄር፡ ምለሰለይ፡ ስርዓታትካ ኽሕሉ እየ።

¹⁴⁶ናባኻ ተማህለልኩ፡ ኣድሕነኒ፡ ምስክራትካውን ክሕሉ እየ።

¹⁴⁷ቅድሚ ወጋሕታ መጺኤ ኣእዌኹ፡ ንቓልካ እጽበ እኔኹ።

¹⁴⁸ንቓልካ ኼስተንትንሲ፡ ኣዒንተይ ነቶም ናይ ለይቲ ሓለውቲ ቐደማኦም።

¹⁴⁹ከም ሳህልኻ ድምጸይ ስማዕ፡ ዎ እግዚኣብሄር፡ ከም ፍርድኻ ህያው ግበረኒ።

¹⁵⁰ንሕሰም ዚስዕቡ ይቐርቡ ኣለዉ፡ ካብ ሕግኻ ረሐቑ።

¹⁵¹ዎ እግዚኣብሄር፡ ቀረባ ኢኻ፡ ኲሉ ትእዛዛትካ ኸኣ ሓቂ እዩ።

¹⁵²ንዘለኣለም ከም ዝመስረትካዮ፡ ካብ ጥንቲ ጀሚረ ብምስክራትካ ፈለጥኩ።

¹⁵³ሕግኻ ኣይረሳዕኩን እሞ፡ መከራይ ርኢኻ ኣናግፈኒ።

¹⁵⁴ጠበቓይ ኩን እሞ ተበጀወኒ፡ ከም ቃልካ ህያው ግበረኒ።

¹⁵⁵ረሲኣን ስርዓታትካ ኣይደልዩን እዮም እሞ፡ ምድሓንካ ኻብኦም ረሐቐ።

¹⁵⁶ዎ እግዚኣብሄር፡ ርሕራሔኻ ዓብዪ እዩ፡ ከም ፍርድኻ ህያው ግበረኒ።

¹⁵⁷ሰጐጒተይን ተጻረርተይን ብዙሓት እዮም፡ ኣነ ኻብ ምስክራትካ ኣየግለስኩን።

¹⁵⁸ቃልካ ኣይሕልዉን እዮም እሞ፡ ንጠለምቲ ርእየ ፈንፈንክዎም።

¹⁵⁹ዎ እግዚኣብሄር፡ ንትእዛዛትካ ኸም ዘፍቅሮ ርኤ፡ ከም ሳህልኻ ህያው ግበረኒ።

¹⁶⁰ብዘሎ ቓልካ ሓቂ እዩ፡ ኲሉ ፍርዲ ጽድቅኻ ድማ ንዘለኣለም ይነብር።

¹⁶¹መሳፍንቲ ብዘይ ምኽንያት ሰጐጉኒ፡ ልበይ ግና ቃልካ እዩ ዚፈርህ።

¹⁶²ከምቲ ብዙሕ ምርኮ ዝማረኸ፡ ብቓልካ ባህ ይብለኒ ኣሎ።

¹⁶³ንሓሶት እጸልኦን እፍንፍኖን፡ ንሕግኻ ግና ኤፍቅሮ ኣሎኹ።

¹⁶⁴ስለ ጽድቂ ፍርድኻ ኣብ መዓልቲ ሾብዓተ ሳዕ ኤመስግነካ ኣሎኹ።

¹⁶⁵እቶም ዜፍቅሩ ብዙሕ ሰላም ኣለዎም፡ ዜዐንቅፎም ከኣ የልቦን።

¹⁶⁶ዎ እግዚኣብሄር፡ ንምድሓንካ ተጸቤኽዎ፡ ትእዛዛትካ ድማ ገበርኩ።

¹⁶⁷ነፍሰይ ንምስክራትካ ሐለወቶ፡ ኣዝየውን ኤፍቅሮ ኣሎኹ።

¹⁶⁸ኲሉ መገደይ ኣብ ቅድሜኻ እዩ እሞ፡ ትእዛዛትካን ምስክራትካን ሐሎኹ።

¹⁶⁹ዎ እግዚኣብሄር፡ ኣውያተይ ኣብ ቅድሜኻ ይብጻሕ፡ ከም ቃልካ ኣእምሮ ሀበኒ።

¹⁷⁰ምህለላይ ኣብ ቅድሜኻ ይብጻሕ፡ ከም ቃልካ ኣናግፈኒ።

¹⁷¹ስርዓታትካ ምሂርካኒ ኢኻ እሞ፡ ከናፍረይ ምስጋናኻ ኼፈልፍላ እየን።

¹⁷²ኲሉ ትእዛዛትካ ጽድቂ እዩ እሞ፡ ልሳነይ ንቓልካ ኽትነግር እያ።

¹⁷³ትእዛዛትካ ሐርየ እየ እሞ፡ ኢድካ ረዳኢተይ ትኹን።

¹⁷⁴ጐይታየ፡ ምድሓንካ እናፍቕ ኣሎኹ፡ ሕግኻውን ደስታይ እዩ።

¹⁷⁵ንነፍሰይ ህያው ግበራ፡ ንሳ ኸኣ ከተመስግነካ እያ፡ ፍርድታትካውን ይርዳኣኒ።

¹⁷⁶ከም ጥፍእቲ በጊዕ ተባረርኩ፡ ትእዛዛትካ ኣይረሳዕኩን እሞ፡ ንባርያኻ ድለዩ።