Read መ/ቅዱስ ትግርኛ, Tigrigna Bible, 1997 መዝሙር ዳዊት 135 Bible Online

መዝሙር ዳዊት 135 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 135

¹ሃሌሉያ። ኣቱም ኣብ ቤት እግዚኣብሄር፡

²ኣብ ኣጸድ ቤት ኣምላኽና እትቘሙ፡ ኣመስግንዎ።

³እግዚኣብሄር ሰናይ እዩ እሞ፡ ኣመስግንዎ። ግሩም እዩ እሞ፡ ንስሙ ምስጋና ዘምሩሉ።

⁴እግዚኣብሄር ንያእቆብ ናቱ፡ ንእስራኤል ከኣ ጥሪቱ ኪኸውን ሐረዮ።

⁵እግዚኣብሄር ዓብዪ ምዃኑ፡ ጐይታና ኣብ ልዕሊ ዂሎም ኣማልኽቲ ምዃኑ እፈልጥ ኣሎኹ እሞ፡

⁶እግዚኣብሄር ኣብ ሰማያን ምድርን፡ ኣብ ባሕርን መዓሙቚን ዝደለዮ ዘበለ ይገብር እዩ።

⁷ንግመ ኻብ ወሰን ምድሪ የልዕሎ፡ ንመባርቕ ኣብ ዝናም ይገብሮ፡ ንንፋስ ካብ መዝገብ የውጽኦ።

⁸ንበርዂሪ ግብጺ፡ ካብ ሰብ ክሳዕ እንስሳ፡ ወቕዔ።

⁹ዎ ምስሪ፡ ኣብ ማእከልኪ፡ ኣብ ፈርኦንን ኣብ ኲሎም ባሮቱን ትእምርትን ተኣምራትን ሰደደ።

¹⁰ንዓበይቲ ኣህዛብ ወቕዔ፡ ንስልጡናት ነገስታት ከኣ፡

¹¹ንሲሆን ንጉስ ኣሞራውያንን ንኦግ ንጉስ ባሳንን ንዂሎም መንግስትታት ከነኣንን ቀተለ።

¹²ምድሮምውን ንርስቲ ሀበ፡ ንህዝቡ እስራኤል ኣውረሶም።

¹³ዎ እግዚኣብሄር፡ ስምካ ንዘለኣለም፡ ኣታ ጐይታይ፡ ዝኽርኻ ንውሉድ ወለዶ ይነብር።

¹⁴እግዚኣብሄር ንህዝቡ ይብይነሎም እዩ እሞ፡ ንባሮቱ ይርሕርሓሎም።

¹⁵ጣኦታት ኣህዛብሲ ብኢድ ሰብ እተገብሩ ብሩርን ወርቅን እዮም።

¹⁶ኣፍ ኣለዎም፡ ኣይዛረቡን፡ ኣዒንቲ ኣለዎም፡ ኣይርእዩን፡

¹⁷ኣእዛን ኣለዎም፡ ኣይሰምዑን እዮም። ኣብ ኣፎም ድማ ትንፋስ የልቦን።

¹⁸እቶም ዚገብርዎም፡ ዚውከልዎም ዘበሉ ኸማታቶም ኪዀኑ እዮም።

¹⁹ኣቱም ቤት እስራኤል፡ ንእግዚኣብሄር ባርኽዎ፡ ኣቱም ቤት ኣሮን፡ ንእግዚኣብሄር ባርኽዎ፡

²⁰ኣቱም ቤት ሌዊ፡ ንእግዚኣብሄር ባርኽዎ፡ ኣቱም ንእግዚኣብሄር እትፈርሁ፡ ንእግዚኣብሄር ባርኽዎ።

²¹ኣብ የሩሳሌም ዚነብር እግዚኣብሄር ካብ ጽዮን ይባረኽ።