Read መ/ቅዱስ ትግርኛ, Tigrigna Bible, 1997 መዝሙር ዳዊት 138 Bible Online

መዝሙር ዳዊት 138 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 138

¹ብምሉእ ልበይ ኤመስግነካ፡ ኣብ ቅድሚ ኣማልኽቲ ምስጋናኻ እዝምር።

²ንቓልካ ሓለፋ ዂሉ ስምካ ኣዕቢኻዮ ኢኻ እሞ፡ ናብ ቅዱስ መቕደስካ ኣቢለ ኽሰግድ፡ ንስምካውን ስለ ሳህልኻን ሓቅኻን ኢለ ኸመስግኖ እየ።

³በታ ዝጸዋዕኩላ መዓልቲ መለስካለይ፡ ኣትባዕካኒ፡ ንነፍሰይ ኣበርታዕካያ።

⁴ጐይታየ፡ ኲሎም ነገስታት ምድሪ፡ ቃላት ኣፍካ ሰሚዖም፡ ኬመስግኑኻ እዮም።

⁵ክብሪ እግዚኣብሄር ዓብዪ እዩ እሞ፡ ብዛዕባ መገድታት እግዚኣብሄር ኪዝምሩ እዮም።

⁶እግዚኣብሄር ልዑል እዩ እሞ፡ ንትሑት ይርእዮ፡ ንዕቡይውን ካብ ርሑቕ የለልዮ።

⁷ብማእከል መከራ እኳ እንተ ኸድኩ፡ ንስኻ ህያው ትገብረኒ፡ ኢድካ ኣብ ኲራ ጸላእተይ ትዝርግሕ፡ የማነይቲ ኢድካውን ተድሕነኒ።

⁸እግዚኣብሄር ኪፍጽመለይ እዩ፡ ጐይታየ፡ ጸጋኻ ንዘለኣለም ይነብር፡ ንተግባር ኣእዳውካ ኣይትሕደጎ።