Read መ/ቅዱስ ትግርኛ, Tigrigna Bible, 1997 መዝሙር ዳዊት 141 Bible Online

መዝሙር ዳዊት 141 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 141

¹ጐይታየ፡ ናባኻ ኤእዊ ኣሎኹ፡ ቀልጢፍካ ምጸኒ፡ ክጽውዓካ ኸሎኹ ንድምጸይ ጽን በሎ።

²ጸሎተይ ኣብ ቅድሜኻ ኸም ዕጣን፡ ምልዓል ኢደይ ከም መስዋእቲ ምሸት ይኹን።

³ጐይታየ፡ ንኣፈይ ቀፊር ግበረሉ፡ ደገ ኸናፍረይ ሐሉ።

⁴ምስ ገበርቲ እከይ ረሲእነት ከይገብርሲ፡ ንልበይ ናብ ክፍኣት ኣይተዘምብሎ፡ ኣነውን ካብቲ ጥዑም ብልዖም ኣይብላዕ።

⁵ጻድቕ ይውቅዓኒ፡ ለውሃት እዩ፡ ይዝለፈኒ፡ ዘይቲ ርእሲ እዩ፡ ርእሰይ ኣይእበዮ፡ ጸሎተይ ገና ብእከዮም እዩ።

⁶ፈረድቶም ብገደል ምስ ጸደፉ፡ ቃላተይ ጥዑም ምዃኑ ኺሰምዑ እዮም።

⁷ከምቲ ሰብ ንምድሪ ዚትልሞን ዚሐርሶን፡ ኣዕጽምትና ኸምኡ ኣብ ኣፍ ሲኦል ተበተነ።

⁸ዎ እግዚኣብሄር፡ ጐይታየ፡ ኣዒንተይ ናባኻ እየን፡ ኣባኻ እውከል ኣሎኹ፡ ንነፍሰይ ኣይትኽዐዋ።

⁹ካብቲ ዜጻውዱለይ መጻወድያን ካብ መፈንጠራ ገበርቲ እከይን ሐልወኒ።

¹⁰ኣነ ኽሐልፍ ከሎኹስ፡ ረሲኣን ኣብ መጻወድያኦም ይውደቑ።