Read መ/ቅዱስ ትግርኛ, Tigrigna Bible, 1997 መዝሙር ዳዊት 143 Bible Online

መዝሙር ዳዊት 143 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 143

¹ጐይታየ፡ ጸሎተይ ስማዕ፡ ንምህለላይ ጽን በሎ፡ ብሓቅኻን ብጽድቅኻን ምለሰለይ።

²ህያው ዘበለ ኣብ ቅድሜኻስ ሓደ እኳ ጻድቕ የልቦን እሞ፡ ምስ ባርያኻ ኣብ ፍርዲ ኣይትእቶ።

³ጸላኢ ንነፍሰይ ይሰጓ፡ ንህይወተይ ናብ ምድሪ ይድርብያ፡ ከምቶም ቀደም ዝሞቱ ኣብ ጸልማት የንብረኒ ኣሎ።

⁴መንፈሰይ ኣብ ውሽጠይ ይደክም፡ ልበይ ኣብ ውሽጠይ ይስምብድ ኣሎ።

⁵ናይ ቀደም መዓልትታት እዝክር፡ ኲሉ ተግባርካ ኤስተንትን፡ ግብሪ ኣእዳውካ እሐስብ ኣሎኹ።

⁶ኣእዳወይ ናባኻ እዝርግሕ፡ ነፍሰይ ከም ደርቕ ምድሪ ትጸምኣኻ ኣላ።ሴላ።

⁷ዎ እግዚኣብሄር፡ መንፈሰይ ደኺሙ እዩ እሞ፡ ቀልጢፍካ ምለሰለይ፡ ነቶም ኣብ ጒድጓድ ዝወረዱ ኸይመስልሲ፡ ገጽካ ኣይትኸውለለይ።

⁸ብኣኻ እውከል ኣሎኹ እሞ፡ ኣንጊህካ ሳህልኻ ኣስምዓኒ፡ ነፍሰይ ናባኻ ኤልዕል ኣሎኹ እሞ፡ እታ ዝኸዳ መገዲ ኣፍልጠኒ።

⁹ዎ እግዚኣብሄር፡ ዕቚባኻ እየ፡ ካብ ጸላእተይ ኣናግፈኒ።

¹⁰ንስኻ ኣምላኸይ ኢኻ እሞ፡ ምግባር ፍቓድካ ምሀረኒ፡ ሰናይ መንፈስካ ብቕኑዕ መገዲ ይምርሓኒ።

¹¹ዎ እግዚኣብሄር፡ ስለ ስምካ ኢልካ ብህይወት ኣንብረኒ፡ ብጽድቅኻ ንነፍሰይ ካብ ጸበባ ኣውጽኣያ።

¹²ኣነ ባርያኻ እየ እሞ፡ ብሳህልኻ ንጸላእተይ ኣጽንቶም፡ ነቶም ንነፍሰይ ዜጽቡቡላ ዂሎም ከኣ ኣጥፍኣዮም።