Read መ/ቅዱስ ትግርኛ, Tigrigna Bible, 1997 መዝሙር ዳዊት 144 Bible Online

መዝሙር ዳዊት 144 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 144

¹እግዚኣብሄር እምባይ፡ ነእዳወይ ውግእ፡ ነጻብዔይ ድማ ሰልፊ ዝመሀረ፡ ይባረኽ።

²ጸጋይ፡ ዕርደይ፡ እምባይ፡ መድሓንየይ፡ ዋልታይ፡ እቲ ዝውከሎ፡ ንህዝበይ ዜግዝኣለይ ንስኻ ኢኻ።

³ዎ እግዚኣብሄር፡ ሰብ እንታይ እዩ እትፈልጦ? ወዲ ሰብከ እንታይ እዩ እትዝክሮ?

⁴ሰብ ንትንፋስ ይመስል፡ መዓልትታቱ ኸም ዚሐልፍ ጽላሎት እየን።

⁵ዎ እግዚኣብሄር፡ ሰማያትካ ለጠቕ ኣቢልካ ውረድ፡ ነኽራን ተንክዮ እሞ፡ ኪተክኽ።

⁶መባርቕ ኣባርቕ እሞ፡ በትኖም፡ ፍላጻታትካ ወርዊርካ ኣሸብሮም።

⁷ኣእዳውካ ኻብ ላዕሊ ዘርግሕ፡ ካብ ብርቱዕ ማያት፡ ካብ ኢድ ውሉድ ጓና ኣናግፈኒ።

⁸ካብቶም ኣፎም ጥልመት ዚዛረቡ፡ የማነይቲ ኢዶም ከኣ የማነይቲ ሓሶት ብዀነት ባልሃኒ።

⁹ዎ ኣምላኽ፡ ሓድሽ መዝሙር እዝምረልካ፡ ዓሰርተ ብዘውታሩ በገና እውድሰካ ኣሎኹ።

¹⁰ንነገስታት ዲል ዝሀብካ፡ ንዳዊት ባርያኻ ኻብ ክፉእ ዘድሐንካ ንስኻ ኢኻ።

¹¹ካብ ኢድ ውሉድ ጓና፡ ኣፎም ጥልመት ዚዛረብ፡ የማነይቲ ኢዶም የማነይቲ ሓሶት ዝዀነት፡ ኣናግፈንን ባልሃንን።

¹²ኣወዳትና ብጒብዝናኦም ከም ነዋሕቲ ኣትክልቲ ይኹኑ፡ ኣዋልድና ኸም ኣተሃናንጻ ኣዳራሽ እተወቕረ ኣዕኑድ ኲርናዕ ይኹና፡

¹³መዓኽንና በብዓይነቱ እኽሊ ይምላእ፡ ኣባጊዕና ኣብ መሮርና ኣሽሓትን ኣእላፋትን ይውለዳ፡

¹⁴ኣብዑርና ኣጸቢቖም ይመንጒዱ፡ ኣብ ኣደባባያትናስ ምጥሓስን ምህዳምን ኣውያትን ኣይኹን።

¹⁵ከምዚ ዚረክብ ህዝቢ ብጹእ እዩ፡ እቲ እግዚኣብሄር ዝኣምላኹ ህዝቢ ብጹእ እዩ።