Read መ/ቅዱስ ትግርኛ, Tigrigna Bible, 1997 መዝሙር ዳዊት 146 Bible Online

መዝሙር ዳዊት 146 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 146

¹ሃሌሉያ።

²ብህይወተይ ከሎኹ ንእግዚኣብሄር ከመስግኖ፡ ክሳዕ ዘሎኹ ንኣምላኸይ ክውድሶ እየ።

³ብመሳፍንቲ፡ በቲ ኺረድእ ዘይከኣሎ ወዲ ሰብ ኣይትወከሉ።

⁴ትንፋሱ ይወጽእ፡ ናብ መሬቱ ይምለስ፡ በታ መዓልቲ እቲኣ ሃቐናኡ ይጠፍእ።

⁵ኣምላኽ ያእቆብ ዝረዲኤቱ፡ ተስፋኡ ኸኣ ኣብ እግዚኣብሄር ኣምላኽ ዝገበረ ሰብ ብጹእ እዩ።

⁶ንሰማይን ምድርን፡ ንባሕርን ኣብኡ ዘሎ ዂሉን ዝገበረ፡ ንሓቂ ኽሳዕ ዘለኣለም ዚሕሉ፡

⁷ንጥቑዓት ፍትሒ ዜውጽኣሎም፡ ንጥሙያት እንጌራ ዚህቦም ንሱ እዩ፡ እግዚኣብሄር ንእሱራት ይፈትሖም።

⁸እግዚኣብሄር ነዒንቲ ዕዉራት ይኸፍተን፡ እግዚኣብሄር ንዝደነኑ የቕንዖም፡ እግዚኣብሄር ንጻድቃን የፍቅሮም፡

⁹እግዚኣብሄር ንስደተኛታት የዕቊቦም፡ እግዚኣብሄር ንዘኽታምን መበለትን ይኣልዮም፡ ንመገዲ ረሲኣን ግና ይጠዋውያ።

¹⁰እግዚኣብሄር ንዘለኣለም ይነግስ፡ ዎ ጽዮን፡ ኣምላኽኪ ንውሉድ ወለዶ ይነግስ።