Read መ/ቅዱስ ትግርኛ, Tigrigna Bible, 1997 መዝሙር ዳዊት 69 Bible Online

መዝሙር ዳዊት 69 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 69

¹ማያት ክሳዕ ነፍሰይ በጺሑ እዩ እሞ፣ ዎ ኣምላኽ፣ ኣድሕነኒ።

²ናብቲ መርገጺ ዜብሉ ዓሚቝ ሰልሚ ሰጢመ፣ ኣብ ጥልቂ ማያት አትየ፣ ማዕበላት ከኣ የጥሕለኒ አሎ።

³ብምእዋየይ ደኺመ፣ ጐረሮይ ነቒጹ፣ ኣዒንተይ ንኣምላኸይ ብምጽባይ ፈዚዘን።

⁴ብኸንቱ ዚጸልኡኒ ኻብ ጸጕሪ ርእሰይ ይበዝሑ፣ ብዘይ ምኽንያት ኬጥፍኡኒ ዚደልዩ ጸላእተይ ሓያላት እዮም፣ ኤረ ዘይከተርክዎ ኽመልስ እኳ ግዲ ዀነኒ።

⁵ዎ ኣምላኽ፣ ንስኻ ዕሽነተይ ትፈልጥ ኢኻ፣ በደለይውን ካባኻ ኣይተሐብኤን።

⁶ኣታ እግዚኣብሄር ጐይታ ሰራዊት፣ ስሌኻ ጸርፊ እጸውር አሎኹ። ነውሪ ንገጸይ ኣጐልቢብዎ እዩ እሞ፣ እቶም ዚጽበዩኻ ብኣይ ኣይሕፈሩ፣ ኣታ ኣምላኽ እስራኤል፣ እቶም ዚደልዩኻ ብኣይ ኣይነውሩ።

⁷ኣታ እግዚኣብሄር ጐይታ ሰራዊት፣ ስሌኻ ጸርፊ እጸውር አሎኹ። ነውሪ ንገጸይ ኣጐልቢብዎ እዩ እሞ፣ እቶም ዚጽበዩኻ ብኣይ ኣይሕፈሩ፣ ኣታ ኣምላኽ እስራኤል፣ እቶም ዚደልዩኻ ብኣይ ኣይነውሩ።

⁸ቅንኣት ቤትካ በሊዑኒ፣ ጸርፊ እቶም ጓና፣ ንውሉድ ኣደይውን ጋሻ ዀንኩ። ነሕዋተይ ጓና፣ ንውሉድ ኣደይውን ጋሻ ኼንኩ።

⁹ቅንኣት ቤትካ በሊዑኒ፣ ጸርፊ እቶም ጓና፣ ንውሉድ ኣደይውን ጋሻ ዀንኩ። ነሕዋተይ ጓና፣ ንውሉድ ኣደይውን ጋሻ ኼንኩ።

¹⁰እናበኼኹ ንነፍሰይ ብጾም ምስ ኣሕሳእክዋ፣ እዚ መጽረፊ ዀነኒ።

¹¹ክዳን ሓዘን ምስ ለበስኩ፣ መመሰሊ ዀንክዎም።

¹²ኣብ ደገ ዚቕመጡ ብዛዕባይ ይዛራረቡ፣ ሰካራት ብኣይ ይጭፍሩ።

¹³ኣታ እግዚኣብሄር፣ ብቕብልቲ ጊዜ ግና ጸሎተይ ናባኻ እዩ፣ ዎ ኣምላኽ፣ ብብዝሒ ምሕረትካ፣ ብሓቂ ምድሓንካ ምለሰለይ።

¹⁴ከይሰጥምሲ ኻብ ሰልሚ ኣውጽኣኒ፣ ካብ ጸላእተይን ካብ ጥልቂ ማያትን ኣናግፈኒ።

¹⁵ማዕበላት ማይ ኣየጥሕለኒ፣ መዓሙቑ ድማ ኣይውሐጠኒ፣ ጕድጓድውን ኣብ ልዕለይ ኣፉ ኣይትዕጾ።

¹⁶ጐይታየ፣ ሳህልኻ ሰናይ እዩ እሞ፣ ምለሰለይ፣ ከም ዕቤት ምሕረትካ ተመለሰኒ።

¹⁷ጸቢቡኒ እዩ እሞ፣ ንባርያኻ ገጽካ ኣይትኸውለሉ፣ ቀልጢፍካ ምለሰለይ።

¹⁸ክትብጀዋስ ናብ ነፍሰይ ቅረብ፣ ምእንቲ ጸላእተይ ኢልካ ኣናግፈኒ።

¹⁹ንስኻ ጸርፈይን ነውረይን ሕፍረተይን ትፈልጦ ኢኻ፣ ኵሎም ተጻረርተይ ኣብ ቅድሜኻ አለዉ።

²⁰ንልበይ ጸርፊ ቐጥቂጥዎ ደኸምኩ፣ ዚድንግጸለይ ተጸቤኹ፣ ሓደ እኳ ኣይነበረን፣ ዜጸናንዑኒ ደልየውን፣ ሰአንኩ።

²¹ኣብ መብልዔይ ሓሞት ገበሩ። ንጽምኤይውን መጺጽ ኣስተዩኒ።

²²መኣዶም ኣብ ቅድሚኦም መፈንጠራ ይዀኖም፣ ደሓን ኢና ኺብሉ ኸለዉ፣ መጻወድያ ይዀኖም።

²³ኣዒንቶም ከይርእያ ይጸልምታ፣ ንሓቛቝኦምውን ኵሉ ጊዜ ኣንቀጥቅጦ።

²⁴መዓትካ ኣፍስሰሎም፣ ረስኒ ቝጥዓኻውን የርክቦም።

²⁵ማሕደሪኦም ይዕኖ፣ ኣብ ድንኳናቶም ዚነብር ሓደ እኳ ኣይረኸብ

²⁶ነቲ ዝወቓዕካዮ ይሰጕዎ፣ ናይቶም ዘቝሰልካዮም ቃንዛ የዘንትውዎ አለዉ እሞ፣

²⁷ኣብ ርእሲ ዓገቦም ዓገብ ወስኰም፣ ናብ ጽድቅኻውን ኣይእተዉ።

²⁸ካብ መጽሓፍ ህይወት ይደምሰሱ፣ ምስ ጻድቃን ድማ ኣይጸሐፉ።

²⁹ኣነ ግና መስኪንን ምግዱርን እየ፣ ዎ ኣምላኽ፣ ምድሓንካ ልዕል የብለኒ።

³⁰ንስም ኣምላኽ ብመዝሙር ከመስግኖ፣ ብምምሳው ከኣ ልዕል ከብሎ እየ፣

³¹እዚ ንእግዚኣብሄር ካብ ዝራብዕ፣ ካብ ቀርንን ጽፍርን ዘለዎ ተፊንቲ ባህ ኬብሎ እዩ።

³²እግዚኣብሄር ንድኻታት ይሰምዖም፣ ንእሱራቱውን ኣይንዕቕን እዩ እሞ፣ ትሑታት ነዚ ርእዮም ይሕጐሱ። ኣቱም ንኣምላኽ እትደልይዎ፣ ልብኹም ብህይወት ይንበር።

³³እግዚኣብሄር ንድኻታት ይሰምዖም፣ ንእሱራቱውን ኣይንዕቕን እዩ እሞ፣ ትሑታት ነዚ ርእዮም ይሕጐሱ። ኣቱም ንኣምላኽ እትደልይዎ፣ ልብኹም ብህይወት ይንበር።

³⁴ሰማይን ምድርን ባሕርን፣ ኣብኡ ዚዋሳወስ ኵሉን ንእኡ የመስግንዎ።

³⁵ኣምላኽ ንጽዮን ኬድሕና፣ ንኸተማታት ይሁዳውን ኪሀንጸን እዩ እሞ፣ ኣብኤን ኪነብሩን ኪርስትዩን፣

³⁶ዘርኢ ዚፈትዉ ኸኣ ኣብኣ ኺነብሩ እዮም።