Read መ/ቅዱስ ትግርኛ, Tigrigna Bible, 1997 መዝሙር ዳዊት 77 Bible Online

መዝሙር ዳዊት 77 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 77

¹ድምጸይ ናብ ኣምላኽ ኣልዒለ ኤእዊ፡ ድምጸይ ናብ ኣምላኽ ኤልዕል ኣሎኹ፡ ንሱውን ይሰምዓኒ እዩ።

²ብመዓልቲ ጸበባይ ንእግዚኣብሄር ደሌኽዎ፡ ብለይቲ ኢደይ ተዘርግሔት ኣይሰልከየትን ከኣ፡ ነፍሰይ ምጽንናዕ ኣበየት።

³ንኣምላኽ እዝክሮን እቚዝምን ኣሎኹ፡ ኤስተንትንን መንፈሰይ ከኣ ይሕለልን ኣሎ።ሴላ።

⁴ነዒንተይ ቈላሕላሕ ተብለን፡ እሽገር ምዝራብውን እስእን ኣሎኹ።

⁵ናይ ቀደም መዓልትታት፡ ናይ ጥንቲ ዓመታት እዝክር ኣሎኹ።

⁶ብለይቲ ንበገናይ እሐስብ፡ ምስ ልበይ ኤስተንትን ኣሎኹ፡ መንፈሰይውን ይምርምር ኣሎ፡

⁷እግዚኣብሄርሲ ንዘለኣለም ይድርቢ? ድሕርዚኸ ጸጋኡዶ ኣየርእን እዩ?

⁸ጸጋኡስ ንዘለኣለምዶ ፈጺሙ ተወዲኡ? ተስፋኡኸ ንውሉድ ወለዶዶ ተወዲኡ?

⁹ኣምላኽሲ ሳህሉዶ ረሲዕዎ? ንምሕረቱስ ብዂራዶ ዐጽይዎ እዩ?ሴላ።

¹⁰ኣነ በልኩ፡ እዚ እዩ ድኻመይ፡ ዓመታት የማነይቲ እቲ ልዑል እዝክር ኣሎኹ።

¹¹ናይ ቀደም ተኣምራትካ ኽሐስብ እየ እሞ፡ ንግብርታት እግዚኣብሄር ክዝክሮ እየ፡

¹²ንብዘሎ ግብርታትካ ድማ ከስተንትናኦ፡ ንዕዮኻውን ክምርምሮ እየ።

¹³ዎ ኣምላኽ፡ መገድኻ ብቕድስና እዩ፡ ከም ኣምላኽ ዝበለ ዓብዪ ኣምላኽከ መን ኣሎ?

¹⁴ተኣምራት እትገብ ኣምላኽ ንስኻ ኢኻ፡ ንሓይልኻ ኣብ ማእከል ኣህዛብ ኣፍለጥካዮ።

¹⁵ንህዝብኻ፡ ንውሉድ ያእቆብን ዮሴፍን፡ ብቕልጽምካ ተበጆኻዮ።ሴላ።

¹⁶ዎ ኣምላኽ፡ ማያት ረኣዩኻ፡ ማያት ረኣዩኻ ተሸበሩውን፡ እወ፡ መዓመቚ ተናወጸ።

¹⁷ደበናታት ብርቱዕ ማያት ኣፍሰሰ፡ ጠፈር ድምጹ ኣስምዔ፡ ፍላጻታትካውን ተወርወረ።

¹⁸ድምጺ ነጐድጓድካ ኣብ ህቦብላ ነበረ፡ መባርቕ ንዓለም ኣብርሃ፡ ምድሪ ተናወጸት ኣንቀጥቀጠትውን።

¹⁹ጐደናኻ ኣብ ባሕሪ፡ መገድታትካ ኣብ ዓበይቲ ማያት እዩ፡ ኣሰርካውን ኣይተፈልጠን።

²⁰ንህዝብኻ ኸም መጓሰ ብኢድ ሙሴን ኣሮንን ጌርካ መራሕካዮ።