Read መ/ቅዱስ ትግርኛ, Tigrigna Bible, 1997 መዝሙር ዳዊት 81 Bible Online

መዝሙር ዳዊት 81 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 81

¹ንኣምላኽ፡ ነቲ ሓይልና፡ እልል በሉሉ፡ ንኣምላኽ ያእቆብ እልል በሉ።

²መዝሙር ኣልዕሉ፡ ከበሮም ጥዑም በገና ምስ መሰንቆን ኣቓንዩ።

³እዚ ናይ እስራኤል ሕጊ፡ ናይ ኣምላኽ ያእቆብ ስርዓት እዩ እሞ፡

⁴ብሰርቂ ወርሒ፡ ብምልኣት ወርሒ፡ ብመዓልቲ በዓልና መለኸት ንፍሑ።

⁵ካብ ምድሪ ግብጺ ኺወጽእ ከሎ፡ ኣብ የሴፍ ምስክር ገይሩ ኣቘሞ። ዘይፈልጦ ቛንቋ እሰምዕ ኣሎኹ፡

⁶ንመንኲቡ ኻብ ሰኽሚ ኣርሐቕክዎ፡ ኣእዳዉ ኻብ መጾሪ ኣቕሓ ተናገፉ።

⁷ብጸበባ ኣእዌኻ፡ ኣነውን ኣናገፍኩኻ፡ ኣብ ነጒዲ ተሰዊሩ መለስኩልካ፡ ኣብ ማይ መሪባ ተዐዘብኩኻ። ሴላ።

⁸ዎ ህዝበይ፡ ክምስክረልካስ ስማዕ፡ ዎ እስራኤል፡ ኣየ እንተ ትሰምዓኒ።

⁹ካልእ ኣምላኽ ኣብ ማእከልካ ኣይኹን፡ ንኻልእ ኣምላኽውን ኣይትስገድ።

¹⁰ኣነ እግዚኣብሄር፡ እቲ ኻብ ምድሪ ግብጺ ዘውጻእኩኻ ኣምላኽ እየ፡ ኣፍካ ሃህ ኣብል፡ ኣነውን ክመልኦ እየ።

¹¹ህዝበይ ግና ንድምጸይ ኣይሰምዖን፡ እስራኤል ድማ እሺ ኣይበለንን።

¹²ብምኽሪ ርእሶም ኪመላለሱ፡ ኣብ ጽንዓት ልቦም ሐደግክዎም።

¹³ኣየ፡ ህዝበይ እንተ ዚሰምዓኒ፡ እስራኤልሲ ብመገደይ እንተ ዚኸይድ።

¹⁴ንጸላእቶም ቀልጢፈ መዋረድክዎም፡ ኢደይውን ናብ ተጻረርቶም ምመለስኩ።

¹⁵ንእግዚኣብሄር ጸላእቱ ምተገዝእዎ ነይሮም፡ ዘመኖም ከኣ ንዘለኣለም ምዀነ።

¹⁶ስብሒ ስርናይ መብላዕኩኻ፡ ካብ ከውሕስ መዓር መጽገብኩኻ ነይረ።