Read መ/ቅዱስ ትግርኛ, Tigrigna Bible, 1997 መዝሙር ዳዊት 88 Bible Online

መዝሙር ዳዊት 88 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 88

¹ዎ እግዚኣብሄር፡ ኣምላኽ ምድሓነይ፡ ኣብ ቅድሜኻ ለይትን መዓልትን ኤእዊ ኣሎኹ፡

²ጸሎተይ ኣብ ቅድሜኻ ይብጻሕ፡ እዝንኻ ናብ ኣውያተይ ኣድንን።

³ነፍሰይ መከራ ጸጊባ እያ እሞ፡ ህይወተይ ናብ ሲኦል ቀሪባ ኣላ።

⁴ምስቶም ናብ ጒድጓድ ዚወርዱ ተቘጺረ፡ ሓይሊ ኸም ዜብሉ ሰብኣይ እየ፡

⁵ከምቶም ድሕርዚ ዘይትዝክሮም፡ ካብ ኢድካ እተቘርጹ፡ ኣብ ጒድጓድውን ዚድቅሱ ቕቱላት ኣብ ማእከል ምዉታት ተደርቤኹ።

⁶ኣብ ዓሚቚ ጒድጓድ፡ ኣብ ጸልማት፡ ኣብ መዓሙቚ ኣንበርካኒ።

⁷ቊጥዓኻ ይኸብደኒ ኣሎ፡ ብዂሉ ማዕበላትካ ጸቒጥካኒ።ሴላ።

⁸ንመሓዙተይ ካባይ ኣርሒቕካ፡ ብኣታቶም ፍንፋን ገበርካኒ፡ ተዐጽየ፡ ምውጻእውን ስኢነ ኣሎኹ።

⁹ኣዒንተይ ብስቓይ ይስልምታ ኣለዋ፡ ዎ እግዚኣብሄር፡ ኲሉ መዓልቲ ናባኻ ኤእዊ። ኣእዳወይ ናባኻ እዝርግሕ ኣሎኹ።

¹⁰ንምዉታትዶ ተኣምራት ትገብረሎም ኢኻ? ዝሞቱስ ተንሲኦምዶ የመስግኑኻ እዮም?ሴላ።

¹¹ኣብ መቓብርካ ሳህልኻ፡ ኣብ ቦታ ጥፍኣትውን እምነትካዶ ይንገር እዩ?

¹²ተኣምራትዶ ኣብ ጸልማት፡ ጽድቅኻውን ኣብ ምድሪ ምርሳዕ ይፍለጥ እዩ?

¹³ጐይታየ፡ ኣነ ግና ናባኻ ኤእዊ ኣሎኹ፡ ጸሎተይ ድማ ኣንጊሁ ይቃባበለካ ኣሎ።

¹⁴ጐይታየ፡ ስለምንታይ ንነፍሰይ እትድርብያ፡ ንምንታይሲ ገጽካ ትኽውለለይ ኣሎኻ?

¹⁵ካብ ንእስነተይ ጀሚረ ሽጉርን ውጹዕን እየ፡ ፍርሃትካ ተሰኪመስ፡ ተስፋ እቘርጽ ኣሎኹ።

¹⁶ሓቂ ቚጥዓኻ ብልዕለይ ሐሊፉ፡ ስምባድካ ኣጥፊኡኒ።

¹⁷ምሉእ መዓልቲ ኸም ማይ ከቢቦምኒ፡ ሐቢሮም ኣብ ዙርያይ ኣለዉ።

¹⁸ንፈታውን ዓርክን ካባይ ኣርሐቕካዮም፡ መሓዛይ ጸልማት እዩ።