Read መ/ቅዱስ ትግርኛ, Tigrigna Bible, 1997 መዝሙር ዳዊት 89 Bible Online

መዝሙር ዳዊት 89 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 89

¹ግብርታት ጸጋ እግዚኣብሄር ንዘለኣለም ክዝምር፡ ብኣፈይ ንውሉድ ወለዶ እምነትካ ኸፍልጥ እየ።

²ጸጋ ንዘለኣለም ኪህነጽ፡ እምነትካ ኣብ ሰማያት ከተጽንዕ ኢኻ፡ በልኩ እሞ፡

³ምስ ሕሩየይ ኪዳን ኣቶኹ፡ ንዳዊት ባርያይ መሐልኩሉ፡

⁴ዘርእኻ ንዘለኣለም ከጽንዕ፡ ዝፋንካውን ንውሉድ ወለዶ ኽሀንጽ እየ።ሴላ።

⁵ጐይታየ፡ ሰማያት ከኣ ንተኣምራትካ፡ ንእምነትካ ኣብ ማሕበር ቅዱሳን ኪውድሱ እዮም።

⁶ኣብ ጠፈር ንእግዚኣብሄር ዚመዓራረዩስ መን እዩ? ካብ ውሉድ ስልጡናትከ መን እዩ ንእግዚኣብሄር ዚመስሎ?

⁷ኣብ ምኽሪ ቅዱሳን ኣዝዩ ዜፍርህ፡ ካብቶም ኣብ ዙርያኡ ዘለዉ ዂላቶም ዜሸብር ኣምላኽ እዩ።

⁸እግዚኣብሄር ኣምላኽ ሰራዊት፡ ከማኻ ስልጡን መን እዩ? ዎ ጐይታይ፡ እምነትካውን ኣብ ዙርያኻ ኣሎ።

⁹ንትዕቢት ባሕሪ ትገዝኦ፡ ማዕበላቱ እንተ ተንስኤ፡ ንስኻ ተህድኦ።

¹⁰ከም እተወግኤ ጌርካ፡ ንረሃብ ቀጥቂጥካዮ፡ ብሓይሊ ቕልጽምካ ንጸላእትኻ በቲንካዮም ኢኻ።

¹¹ሰማያት ናትካ እዩ፡ ምድሪውን ናትካ እያ፡ ንዓለም ምስ ምልኣታ ሰሪትካያ።

¹²ንሰሜንን ደብቡን ንስኻ ፈጠርካየ፡ ታቦርን ሄርሞንን ብስምካ እልል ይብላ።

¹³ሓያል ቅልጽም ኣሎካ፡ ኢድካ ብርትዕቲ፡ የማነይትኻ ልዕልቲ እያ።

¹⁴መሰረት ዝፋንካ ጽድቅን ቅንዕናን እዩ፡ ሳህልን ሓቅን ቀቅድሚ ገጽካ ይኸዳ ኣለዋ።

¹⁵እቲ እልልታ ዚፈልጥ ህዝቢ ብጹእ እዩ፡ ዎ እግዚኣብሄር፡ ብብርሃን ገጽካ ይመላለሱ።

¹⁶ብስምካ ምሉእ መዓልቲ ይሕጐሱ፡ ብጽድቅኻውን ልዕል ይብሉ።

¹⁷ክብሪ ሓይሎም ንስኻ ኢኻ እሞ፡ ብሞገስካ ቐርንና ልዕል ኪብል እዩ።

¹⁸ዋልታና ናይ እግዚኣብሄር እዩ እሞ፡ ንጉስና ናይቲ ናይ እስራኤል ቅዱስ እዩ።

¹⁹በቲ ዘመን እቲ ብራእይ ንቕዱሳንካ ኸምዚ ኢልካ ተዛረብካዮም፡ ረዲኤት ኣብ ልዕሊ ጅግና ኣንቢረ፡ ካብ ህዝቢ ሓደ ሕሩይ ኣልዒለ።

²⁰ንዳዊት ባርያይ ረኺበዮ፡ ብቕዱስ ዘይተይ ቀቢኤዮ፡

²¹ኢደይ ኲሉ ጊዜ ምስኡ ኽትከውን እያ፡ ቅልጽመይ ከኣ ኬበርትዖ እዩ።

²²ጸላኢ ኣይኪወድቆን፡ ዓማጺ ኸኣ ኣይኪጠቕዖን እዩ።

²³ንጸላእቱ ድማ ኣብ ቅድሚኡ ክቕጥቅጦም፡ ነቶም ዚጸልእዎምውን ክወቕዖም እየ።

²⁴እምነተይን ጸጋይን ድማ ምስኡ ኪዀና፡ ብስመይውን ቀርኑ ልዕል ኪብል እዩ።

²⁵ኢዱ ድማ ኣብ ባሕሪ፡ የማነይቱውን ኣብ ርባታት ከንብር እየ።

²⁶ንሲ፡ ኣቦይ ፡ ኣምላኸይ ፡ ክውሒ ምድሓነይ ስትኻ ኢኻ ፡ ኢሉ ኺሰምየኒ እዩ።

²⁷ኣነውን በኹሪ ፡ ካብ ነገስታት ምድሪ ልዕል ዝበለ ኽገብሮ እየ።

²⁸ሳህለይ ንዘልኣለም ክሕልወሉ እየ፡ ኪዳነይውን ኪጸንዓሉ እዩ።

²⁹ዘርኡ ድማ ንዘለኣለም ፡ ዝፋኑውን ከም መዓልትታት ሰማይ ከንብር እየ።

³⁰ድቁ ሕገይ እንተ ሓደጉ ፡ ከም ቅንዕናይ እንተ ዘይተመላለሱ ፡

³¹ስርዓተይ እንተ ኣፍረሱ ፡ ትእዛዛተይውን እንተ ዘይሓለዉ ፡

³²ሽዑ ንኣበሳኦም ብሾቦጥ ፡ ንበደሎምውን ብመውቃዕቲ ኸረኻኽበሎም እየ።

³³ጸጋይ ግና ኣየግድፎን ፡ እምነተይውን ኣይጠልምን።

³⁴ኪዳነይ ኣየፍርስን ፡ ከናፍረይ እተዘረቦ ድማ ኣይልውጥን።

³⁵ሓንቲ ነገር ብቕድስናይ ምሒለ እየ፡ ንዳዊት ኣይሕሱን ፡

³⁶ዘርኡ ንዘልኣለም ፡ ዝፋኑውን ከም ጸሓይ ኣብ ቅድመይ ኪነብር እዩ።

³⁷ከም ወርሒ ንዘለኣለም ይቐውም፡ ኣብ ደበና ዘሎ ከኣ እሙን እዩ።

³⁸ንስኻ ግና ደርቢኻን ንዒቕካን ፡ ንቕቡእካ ተቖጣዕካዮ።

³⁹ኪዳን ባርያኻ ኣፍረስካ ፡ ንዘዉዱ ኣብ ምድሪ ኣርከስካዮ።

⁴⁰ብዘሎ ምካበብያኡ ኣፍሪስካ፡ ዕርድታቱ ስዕኖኻ።

⁴¹ኩሎም ሓለፍቲ መገዲ ብዝቢዞምዎ፡ ንጎረባብቱ መላገጺኦም ኮይኑ።

⁴²ንየማነይቲ እቶም መጻርርቱ ልዕል ኣቢልካያ ፡ ንኹሎም ጸላእቱ ኣሐጎስካዮም።

⁴³እወ፡ ንስሕለት ሰይፉ መለስካዮ፡ ኣብ ውግእውን ኣየጽናዕካዮን።

⁴⁴ንነጸብራቑ ኣጥፈእካዮ፡ ንዝፋኑውን ናብ ምድሪ ደርቢኻዮ።

⁴⁵መዓልታት ንእስነቱ ኣሕጺርካዮ ፡ ብነውሪ ኣጎልቢብካዮ ኣሎኻ።

⁴⁶ዎ እግዚኣብሄር፡ ፈጺምካ እትኽወል ፡ ነድርኻስ ከም ሓዊ ዚነድድ ክሳዕ መኣዝ እዩ።

⁴⁷ህይወተይ ክንደይ ሓጻር ምኳና፡ ኩሎም ደቂ ስብ ንኸንቱነት ክም ዝፈጠርካዮም ዘክር።

⁴⁸ሞት ከይረኣየ ብህይወት ዚነብር፡ ንነፍሱስ ካብ ኢድ ሲኦል ዜናግፍ ሰብ መን እዩ፡

⁴⁹ጎይታየ፡ እቲ ብእምነትካ ንዳዊት ዝመሓልካሉ፡ ናይ ቐደም ጸጋኻ ኣበይ ኣሎ፡

⁵⁰ግይታየ፡ ንጸርፊ ባሮትካ፡ ነቲ ካብ ኩሎም ሓያላት ኣህዛብ ኣብ ልበይ ዝጾሮ ዘለኹ ዝክር።

⁵¹ጎይታየ፡ ጸላእትኻ ዝጸርፍዎ ጸርፊ፡ ነቲ ንኣሰር ቅቡእካ ዚጸርፍዎ ዘለዉ ዘክር።

⁵²እግዚኣብሄር ንዘለኣለም ይባረኽ። ኣሜን፡ ኣሜን።