Read መ/ቅዱስ ትግርኛ, Tigrigna Bible, 1997 መዝሙር ዳዊት 90 Bible Online

መዝሙር ዳዊት 90 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 90

¹ጐይታየ፡ ካብ ወለዶ ንወለዶ መዕቈቢ ዀንካና።

²ኣኽራን ከይተወልደ፡ ምድርን ዓለምን ከይፈጠርካ፡ ኤረ ንስኻስ ካብ ዘለኣለም ንዘለኣለም ኣምላኽ ኢኻ።

³ኣቱም ደቂ ሰብ፡ ተመለሱ፡ እናበልካ፡ ንሰብ ናብ መሬት ትመልሶ ኣሎኻ።

⁴ሽሕ ዓመት ኣብ ቅድሜኻ ኸም እዛ ትማሊ ዝሐለፈት መዓልትን ከም ምንቃሕ ለይትን እየን እሞ፡

⁵ከም ከውሒዝ ትገፎም፡ ከም ትኽስታ እዮም፡ ከምቲ ብጊሓት ዚልማልም ሳዕረ፡

⁶ንግሆ ይዕምብብ ይልምልም ድማ፡ ኣጋ ምሸት ይዕጸድ እሞ ይነቅጽ።

⁷ብዂራኻ ጠፊእና ኢና እሞ፡ ብቚጥዓኻውን ሰምቢድና።

⁸ንኣበሳና ኣብ ቅድሜኻ፡ ንሕብእ ሓጢኣትናውን ኣብ ብርሃን ገጽካ ተቚሞ ኣሎኻ።

⁹ብዘሎ መዓልትታትና ብቚጥዓኻ ይሐልፍ፡ ዓመታትና ኸም እህህታ ነሕልፈን ኣሎና እሞ፡

¹⁰መዓልትታት ዓመታትና ሰብዓ ዓመት፡ እንተ በዝሔ ኸኣ ሰማንያ ዓመት እዩ፡ ቀልጢፉ ይሐልፍ፡ ነፊርናውን ንኸይድ ኢና እሞ፡ ክብረቱ ጻዕርን መከራን እዩ።

¹¹ከም ዚግባእ ምእንቲ ኺፈርሃካ ኢሉስ፡ ንሓይሊ ኲራኻን ንቚጥዓኻን ዚሐስብከ መን እዩ?

¹²ጥበበኛ ልቢ ምእንቲ ኽንረክብሲ መዓልትታትና ኽንቈጽር ምሀረና።

¹³ጐይታይ፡ ተመለስ፡ ክሳዕ መኣዝ? ንባሮትካ ምሐሮም።

¹⁴ኲለን መዓልትታትና ኽንሕጐስን ባህ ኪብለናንሲ፡ ንግሆ ጸጋኻ ኣጽግበና።

¹⁵ብመጠን እተን ዘጨነቕካና መዓልትታትን፡ ክፉእ ዝርኤናለን ዓመታትን ኣሐጒሰና።

¹⁶ግብርታትካ ንባሮትካ፡ ክብርኻውን ንውሉዶም ግለጽ።

¹⁷ጸጋ እግዚኣብሄር ኣምላኽና ኣብ ልዕሌና ይኹን፡ ተግባር ኣእዳውና ኣስልጠልና፡ እወ፡ ንተግባር ኣእዳውና ንስኻ ኣስልጦ።