Read መ/ቅዱስ ትግርኛ, Tigrigna Bible, 1997 መዝሙር ዳዊት 94 Bible Online

መዝሙር ዳዊት 94 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 94

¹ዎ እግዚኣብሄር ኣምላኽ ሕነ፡

²ኣታ ፈራድ ምድሪ፡ ተንስእ፡ ንዕቡያት ከም ግብሮም ፍደዮም።

³ክሳዕ መኣዝ እቶም ረሲኣን፡ ጐይታየ፡ ክሳዕ መኣዝ ረሲኣን ኪዕወቱ እዮም?

⁴ዘረባ ድርቅና የፈልፍሉ፡ ኲሎም ገበርቲ እከይ ይጀሀሩ ኣለዉ።

⁵ዎ እግዚኣብሄር፡ ንህዝብኻ ይቕጥቅጥዎ፡ ንርስትኻውን የጨንቕዎ ኣለዉ።

⁶ንመበለትን ስደተኛን ይቐትሉ፡ ንዘኽታማት ከኣ ይሐርዱ እዮም እሞ፡

⁷እግዚኣብሄር ኣይርእዮን፡ ኣምላኽ ያእቆብ ኣየስተብህሎን እዩ፡ ይብሉ ኣለዉ።

⁸ኣቱም ዳንዴታት ህዝቢ፡ ኣስተውዕሉ፡ ኣቱም ዓያሱ፡ መኣዝ ኢኹም እትልብሙ?

⁹እዝኒ ዝተኸለስ ኣይሰምዕንዶ? ዓይኒ ዝፈጠረስ ኣይርእንዶ እዩ?

¹⁰ነህዛብ ዚቐጽዕ፡ ፍልጠት ንሰብ ዚምህር ኣይግስጽንዶ እዩ?

¹¹እግዚኣብሄር ንሓሳባት ሰብ ከንቱ ምዃኑ ይፈልጦ እዩ።

¹²ዎ እግዚኣብሄር፡ ጒድጓድ ንረሲእ ክሳዕ ዚኲዐት፡ እቲ ኻብ መዓልቲ መከራ ኸተህድኦ ኢልካ፡

¹³እትቐጽዖን ብሕግኻ እትምህሮን ሰብ ብጹእ እዩ።

¹⁴እግዚኣብሄር ንህዝቡ ኣይኪድርብዮን፡ ንርስቱ ኸኣ ኣይኪሐድጎን እዩ።

¹⁵ፍርዲ ኣብ ጽድቂ ኺምለስ እዩ እሞ፡ ኲሎም ቅኑዓት ልቢ ኺስዕብዎ እዮም።

¹⁶ኣብቶም ገበርቲ ኽፉእ መን ይትንስኣለይ? ኣብቶም ዓመጸኛታትከ መን ይቘመለይ?

¹⁷እግዚኣብሄር ረዲኤተይ ነይሩ እንተ ዘይከውንሲ፡ ነፍሰይ ኣብ ስቕታ ንምሕዳር ምቐረበት ነይራ።

¹⁸ጐይታየ፡ እግረይ ኣንደልሀጸ ምስ በልኩ፡ ጸጋኻ ደገፈኒ።

¹⁹ጓሂ ልበይ ኣብ ውሽጠይ ምስ በዝሔ፡ ምጽንናዕካ ንነፍሰይ ኣሐጐሳ።

²⁰ከም ሕጊ ኢና። እናበሉ ዓመጽ ዚገብሩሉ መንበር ጥፍኣትዶ ምሳኻ ሕብረት ኣለዎ እዩ?

²¹ንነፍሲ ጻድቕ ሐቢሮም ይወድቅዋ፡ ንንጹህ ደም ድማ ይዂንንዎ ኣለዉ።

²²እግዚኣብሄር ግና በሪኽ መጸግዕየይ፡ ኣምላኸይ ድማ ከውሒ መዕቈብየይ እዩ።

²³ዓገቦም ኣብ ርእሶም ይመልስ፡ ብእከዮም ከኣ ኬጥፍኦም እዩ። እግዚኣብሄር ኣምላኽና ኼጥፍኦም እዩ።