Read መ/ቅዱስ ትግርኛ, Tigrigna Bible, 1997 መዝሙር ዳዊት 95 Bible Online

መዝሙር ዳዊት 95 - መ/ቅዱስ ትግርኛ, Tigrigna Bible, 1997 bible

መዝሙር ዳዊት 95

¹ንዑ፡ ንእግዚኣብሄር ብሓጎስ ንዘምር፡

²ብምስጋና ኣብ ቅድማኡ ንብጻሕ፡ ብመዝሙር እልል ንበለሉ።

³እግዚኣብሄር ዓብዪ ኣምላኽ፡ ኣብ ልዕሊ ዂሎም ኣማልኽቲ ድማ ዓብዪ ንጉስ እዩ እሞ፡

⁴መዓሙቚ ምድሪ ኣብ ኢዱ፡ ምብራኽ ኣኽራን ከኣ ናቱ እዩ።

⁵ባሕሪ ናቱ እዩ፡ ንሱ ፈጠሮ፡ ንንቑጽ ምድሪውን ኣእዳው ገበራኦ።

⁶ንዑ፡ ፍግም ኢልና ንስገድ፡ ኣብ ቅድሚ እግዚኣብሄር፡ ፈጣሪና፡ ንንበከኽ።

⁷ንሱ ኣምላኽና እዩ፡ ንሕና ድማ ህዝቢ መጓሴኡ፡ ኢዱ እትኽብክበን ኣባጊዑ ኢና እሞ፡ ሎሚ ድምጹ እንተ ሰማዕኩም፡

⁸ከም ኣብ መሪባ፡ ከምቲ ብመዓልቲ ማሳ ኣብ በረኻ፡ ኣቦታትኩም ኪፍትኑኒ፡

⁹ኪዕዘቡኒ ኸለዉ፡ ግብረይ ዝረአዩ ዄንኩም፡ ልብኹም ኣይተትርሩ።

¹⁰በቲ ወለዶ እቲ ኣርብዓ ዓመት ተመነወኒ፡ በገደይ ዘይፈለጡ፡ ብልቦም እተጋገዩ ህዝቢ እዮም፡ በልኩ።

¹¹ስለዚ፡ ኣብ ዕረፈተይ ኣይኪአትዉን እዮም፡ ኢለ ብዂራይ መሐልኩ።