Read መ/ቅዱስ ትግርኛ, Tigrigna Bible, 1997 መጽሓፍ ምሳሌ 10 Bible Online

መጽሓፍ ምሳሌ 10 - መ/ቅዱስ ትግርኛ, Tigrigna Bible, 1997 bible

መጽሓፍ ምሳሌ 10

¹ምስላታት ሰሎሞን። ጥበበኛ ወዲ ነቦኡ የሐጒሶ፡ ዓሻ ወዲ ግና መጒሃይ ኣዲኡ እዩ።

²መዝገብ ረሲእነት ገለ እኳ ኣይጠቅምን፡ ጽድቂ ግና ካብ ሞት የናግፍ።

³እግዚኣብሄር ንነፍሲ ጻድቕ ግና ክትጠሚ ኣይሐድጋን፡ ንህርፋን ረሲኣን ግና የንኰላልፎ።

⁴ብህክይቲ ኢድ ዚዐዪ ይደኪ፡ ኢድ ትጉሃት ግና ተሀብትም።

⁵እቲ ብሓጋይ ዚእክብ ጥበበኛ ወዲ እዩ፡ እቲ ብቐውዒ ዚድቅስ ግና ዜሕስር ወዲ እዩ።

⁶በረኸት ኣብ ልዕሊ ርእሲ ጻድቕ እዩ፡ ኣፍ ረሲኣን ግና ዓመጽ ይኽውል።

⁷መዘከርታ ጻድቕ ንበረኸት እዩ፡ ስም ረሲኣን ግና ይምሽምሽ።

⁸ጠቢብ ዝልቡ ትእዛዛት ይቕበል፡ ዓሻ ዝኸናፍሩ ግና ይወድቕ።

⁹ብንጽህና ዚመላለስ ሀዲኡ ይኸይድ፡ ብጥውጥዋይ መገዲ ዚኸይድ ግና ይቕላዕ።

¹⁰ብዓይኑ ዚጠቅስ መከራ የምጽእ፡ ዓሻ ዝኸናፍሩ ግና ይወድቕ።

¹¹ኣፍ ጻድቕ ናይ ህይወት ፈልፋሊ እዩ፡ ኣፍ ረሲኣን ግና ዓመጽ ይኽውል።

¹²ጽልኢ ቈየቛ የልዕል፡ ፍቕሪ ግና ንዂሉ ኣበሳ ትኽውሎ።

¹³ኣብ ከናፍር ለባም ሰብ ጥበብ ትርከብ፡ በትሪ ግና ንዝባን እቲ ልቢ ዜብሉ እዩ።

¹⁴ጠቢባንሲ ፍልጠት ይእርንቡ፡ ኣፍ ዓሻ ግና ናብ ጥፍኣት ቀረባ እዩ።

¹⁵ንሃብታም እቲ ሃብቱ ጽኑዕ ከተማኡ እዩ፡ ንድኻ ግና እቲ ድኽነቱ ጥፍኣቱ እዩ።

¹⁶ዕዮ ጻድቕ ንህይወት፡ እቶም ረሲእ ግና ንሓጢኣት እዩ።

¹⁷ምዕዶ ዚሕሉ ኣብ መገዲ ህይወት እዩ፡ ተግሳጽ ዚኣቢ ግና ይስሕት።

¹⁸ጽልኢ ዚሐብእ ሓሰውቲ ኸናፍር ኣለዋኦ፡ ሕሜት ዚዝርግሕ ከኣ ዓሻ እዩ።

¹⁹ብዙሕ ዘረባ ኣብ ዘለዎ ኣብኡ ኣበሳ ኣይስኣኖን፡ ከናፍሩ ዚገትእ ግና ለባም እዩ።

²⁰ልሳን ጻድቕ ሕሩይ ብሩር እዩ፡ ልቢ ረሲኣን ግና ፍረ የብሉን።

²¹ከናፍር ጻድቕ ንብዙሓት ይጓስያ፡ ዓያሱ ግና ስኣን ልቢ እዮም ዚሞቱ።

²²በረኸት እግዚኣብሄር የሀብትም፡ ሽጋርውን ገለ ኣይውስኸሉን።

²³ንዓሻ ኽፋእ ምግባር ዋዛኡ እዩ፡ ጥበብ ከኣ ንለባም ከምኡ እያ።

²⁴ንረሲእ እቲ ዚፈርሆ ነገር ይመጾ፡ ንጻድቃን ግና እተመነይዎ ይወሀቦም።

²⁵ህቦብላ ምስ ዚሐልፍ፡ እቲ ረሲእ የሎን፡ ጻድቕ ግና ንዘለኣለም ዚነብር መሰረት እዩ።

²⁶ከም መጺጽ ንስኒ፡ ከም ትኪ ኸኣ ንዓይኒ፡ ሃካይ ንለኣኽቱ ኸምኡ እዩ።

²⁷ንእግዚኣብሄር ምፍራህ ዕድመ የንውሕ፡ ዓመታት ረሲእ ግና ኺሐጽራ እየን።

²⁸ትጽቢት ጻድቃን ደስታ እዩ፡ ተስፋ ረሲኣን ግና ክትጠፍእ እያ።

²⁹መገዲ እግዚኣብሄር ንንጹህ እምባኡ፡ ንገበርቲ እከይ ግና ጥፍኣቶም እያ።

³⁰ጻድቕ ከቶ ኣይናወጽን፡ ረሲኣን፡ ግና ኣብታ ሃገር ኣይነብሩን እዮም።

³¹ኣፍ ጻድቕ ጥበብ የውጽእ፡ ልግመኛ ልሳን ግና ትቚረጽ።

³²ከናፍር ጻድቃን ነቲ ዜሐጒስ ይፈልጣኦ፡ ኣፍ ረሲኣን ግና ልግመኛ እዩ።