Read መ/ቅዱስ ትግርኛ, Tigrigna Bible, 1997 መጽሓፍ ምሳሌ 21 Bible Online

መጽሓፍ ምሳሌ 21 - መ/ቅዱስ ትግርኛ, Tigrigna Bible, 1997 bible

መጽሓፍ ምሳሌ 21

¹ልቢ ንጉስ ኣብ ኢድ እግዚኣብሄር ከም ወሓዚ ማይ እዩ፡ ንሱ ናብ ዝደለዮ ይመልሶ።

²ሰብሲ ዂሉ መገዱ ኣብ ቅድሚ ዓይኑ ቕኑዕ ይመስሎ፡ ግናኸ እግዚኣብሄር እዩ ልቢ ዚመዝን።

³እግዚኣብሄር ካብ መስዋእትስ ጽድቅን ቅንዕናን ምግባር እዩ ዚፈቱ።

⁴ኲሩዓት ኣዒንትን ንፉሕ ልብን ሓጢኣት እዩ፡ ንሱ ኸኣ መብራህቲ ረሲኣን እዩ።

⁵ሃቐና እቲ ትጉህ ብርግጽ ናብ ረብሓ የብጽሕ፡ እቲ ዚህወኽ ዘበለ ግና ናብ ስእነት ጥራይ ይህወኽ።

⁶እቲ ብሓሳዊት መልሓስ እተኣከበ መዝገብ በኒኑ ይጠፍእ፡ ናብ ወጽመድ ሞት ከኣ የውድቕ።

⁷ቅንዕና ምግባር ኣብዮም እዮም እሞ፡ ነቶም ረሲኣንሲ ግፎኦም ጥፍኣቶም እዩ።

⁸መገዲ እቲ በደለኛ ጥውጥዋይ እያ፡ ንጹህ ሰብ ግና ግብሩ ቕኑዕ እዩ።

⁹ካብ ምስ ናግራም ሰበይቲ ኣብ ሓደ ቤትሲ ኣብ ዝባን ናሕሲ ብሓደ ወገን ምቕማጥ ይሐይሽ።

¹⁰ነፍሲ ረሲእ ንእከይ ትምነዮ፡ ብጻዩውን ኣብ ቅድሚኡ ምሕረት ኣይረክብን።

¹¹ንመላገጺ እንተ ቐጻዕካዮ፡ እቲ ገርሂ ጠቢብ ይኸውን፡ ንጥበበኛ እኝተ መሀርካዮ ኸኣ፡ ፍልጠት ይቕበል።

¹²እቲ ጻድቕ ንቤት ረሲእ ይምልከቶ፡ ነቶም ረሲኣን ከኣ ናብ መከራ የጽድፎም።

¹³እቲ ንጥርዓን ድኻ ኸይሰማዕ ኢሉ እዝኑ ዚዐጹ፡ ንሱውን ይጠርዕ እሞ ምላሽ ኣይረክብን።

¹⁴ብስውር ዝኣተወ ገጽ በረኸት ኲራ የህድእ፡ ሕቡእ ውህበትውን ንብርቱዕ ቊጥዓ የዝሕሎ።

¹⁵ቅኑዕ ምግባር ንጻድቕ ሓጐስ እዩ፡ ንገበርቲ ዓመጻ ግና ረዓድ እዩ።

¹⁶እቲ ኻብ መገዲ ልቦና ዚዝምብል ሰብ ኣብ ኣኼባ ምውታት ይነብር።

¹⁷ጣዕሚ ንብረት ዚፈቱ ይደኪ፡ ወይንን ዘይትን ዚፈቱ ኸኣ ኣይህብትምን።

¹⁸ረሲእ በጃ ጻድቕ እዩ፡ ኣብ ክንዲ ቕኑዕ ድማ ጠላሚ ይሐልፍ።

¹⁹ካብ ምስ ናግራም መሰቀቒትን ሰበይቲስ ኣብ በረኻ ምቕማጥ ይሐይሽ።

²⁰ኣብ ቤት ጥበበኛ ኽቡር መዝገብን ዘይትን ኣሎ፡ ዓሻ ግና ይውሕጦ።

²¹እቲ ንጽድቅን በጒነትን ዚስዕበን፡ ህይወትን ጽድቅን ክብረትን ይረክብ።

²²ጥበበኛ ሰብ ናብ ከተማ ሓያላት ይድይብ፡ ንሓይሉ እምንቶኣ ኸኣ የፍርሶ።

²³እቲ ኣፉን መልሓሱን ዚሕሉ ሰብ ንነፍሱ ኻብ ጸበባ ይሕልዋ።

²⁴ዕቡይን ኲሩዕን ሰብ መላገጹ እዩ ስሙ፡ ንሱ ብናይ ትዕቢት ቊጥዓ ይገብር።

²⁵ሃካይ፡ ኣእዳው ምዕያይ ይኣብያ እየን እሞ፡ ትምኒቱ ይቐትሎ።

²⁶ምሉእ መዓልቲ ብህርፋን ዚምነ ኣሎ፡ ጻድቕ ግና ይህብ ኣይከልእን ከኣ።

²⁷መስዋእቲ እቶም ረሲኣን ፍንፋን እዩ፡ ምናዳ እኳ ብእኩይ ሓሳብ እንተ ኣቕረቦ።

²⁸ሓሳዊ ምስክር ይጠፍእ፡ ዚሰምዕ ሰብ ግና ኲሉ ጊዜ ኺዛረብ ይፍቀደሉ።

²⁹ረሲእ ሰብ ገጽ ድርቅና የርኢ፡ ጻድቕ ግና መገዱ የጽንዕ።

³⁰ጥበብ ወይስ ኣእምሮ ወይስ ምኽሪ፡ ንእግዚኣብሄር ዚቃወሞ የልቦን።