Read መ/ቅዱስ ትግርኛ, Tigrigna Bible, 1997 መጽሓፍ ምሳሌ 27 Bible Online

መጽሓፍ ምሳሌ 27 - መ/ቅዱስ ትግርኛ, Tigrigna Bible, 1997 bible

መጽሓፍ ምሳሌ 27

¹መዓልቲ እትወልዶ ኣይትፈልጥን ኢኻ እሞ፡ ብጽባሕ ኣይትመካሕ።

²ካልእ ይንኣድካ ኣፍካ ኣይኰነን፡ ጓና እምበር፡ ከናፍርካ ኣይኰነን።

³እምኒ ኸቢድ እዩ፡ ሑጻ ኸኣ ረዚን እዩ፡ ካብ ክልቲኡ ግና እንጽርጽሮት ዓሻ ይኸብድ።

⁴ቊጥዓ ጨካን እዩ፡ ኲራውን ውሒዝ እዩ፡ ኣብ ቅድሚ ቕንኢ ግና መን ደው ይብል

⁵ካብ ሕቡእ ፍቕሪ ግሉጽ ተግሳጽ ይሐይሽ።

⁶ናይ ፈታዊ ምቚሳል እሙን እዩ፡ ጸላኢ ግና ኣብዚሑ ይስዕም።

⁷ዝጸገበት ነፍስስ ወለላ መዓር ትረግጽ፡ ንዝጠመየት ነፍሲ ግና ኲሉ መሪር እኳ ጥዑም እዩ።

⁸ካብ ቤቱ ወጺኡ ዚዂብልል ሰብ፡ ቤታ ሓዲጋ ኸም እትዂብልል ዑፍ እዩ።

⁹ቅብኣን ዕጣንን ንልቢ የሐጒሶ፡ ጣዕሚ ፈታዊ ምስናይ ምኽሪ ነፍሱ ኸኣ ከምኡ እዩ።

¹⁰ፈታዊኻን ፈታው ኣቦኻን ኣይትሕደግ፡ ብመዓልቲ ጸበባኻ ናብ ቤት ሓውካ ኣይትኺድ፡ ካብ ርሑቕ ዘሎ ሓውስ ኣብ ቀረባ ዘሎ ጐረቤት ይሐይሽ።

¹¹ወደየ፡ ነቲ ዚጸርፈኒ ምላሽ ምሃብ ክኽእልሲ፡ ጥበበኛ ኹን፡ ንልበይውን ኣሐጒሶ።

¹²ኣስተውዓሊ ሰብሲ እከይ ይርኢ እሞ ይሕባእ፡ ገርህታት ግና ንቕድሚት ይኸዱ እሞ ብእኡ ይጒድኡ።

¹³ነቲ ንጓና እተዋሕሰ ኽዳኑ ውሰደሉ፡ ኣብ ክንዲ እታ ጓና ኻብኡ ታሕዚ ውሰድ።

¹⁴እቲ ኣንጊሁ ዓው ኢሉ ንብጻዩ ዚምርቖ፡ ከም ዚረግም ዚቚጸር።

¹⁵ብመዓልቲ ጥሚቕ ከየቛረጸ ዚነጥብ ቤትን ናግራም ሰበይትን ሓደ እዮም።

¹⁶ንእኣ ምዕጋትሲ ንንፋስ ምዕጋትን ብየማነይትኻ ዘይቲ ምዕማዂን እዩ።

¹⁷ሓጺን ንሓጺን ይስሕሎ፡ ከምኡ ኸኣ ሰብ ንገጽ ብጻዩ ይስሕሎ።

¹⁸ንበለስ ዚከናኸን፡ ፍሬኡ ይበልዕ፡ ንጐይታኡ ዚከናኸን ከኣ ይኸብር።

¹⁹ከምቲ ገጽ ንገጽ ኣብ ማይ ዚርእዮ፡ ከምኡ ኸኣ ልቢ ሰብ ንሰብ ይርእዮ።

²⁰ሲኦልን መዓሙቚን ከቶ ኣይጸግቡን፡ ከምኡውን ኣዒንቲ ሰብ ኣይጸግባን እየን።

²¹መምከኺ ንብሩር፡ እቶን ንወርቂ እዩ፡ ሰብ በቲ ዚነኣዶ ይፍለጥ።

²²ንዓሻ ኣብ ሞጒእ ምስ ጒርዲ ብንኢ እንተ ትጐድኦ እኳ፡ እቲ ዕሽነቱ ኣይምሐደጎን።

²³ሃብቲ ንሓዋሩ ዘውዲውን ንውሉድ ወለዶ ኣይነብርን እዩ እሞ፡ ሃለዋት ኣባጊዕካ ኣጸቢቕካ ፍለጥ፡ ንልብኻ ኣብ መጓሴኻ ኣንብሮ።

²⁴ሃብቲ ንሓዋሩ ዘውዲውን ንውሉድ ወለዶ ኣይነብርን እዩ እሞ፡ ሃለዋት ኣባጊዕካ ኣጸቢቕካ ፍለጥ፡ ንልብኻ ኣብ መጓሴኻ ኣንብሮ።

²⁵ዕላም ሐሊፉ ለቅሚ በቚሉ፡ ኣብ ኣኽራን ድማ መኸል ተኣኪቡ።

²⁶ዕያውቲ ንኽዳንካ፡ ድቤላውን መዓደግ ግራት ኣሎካ፡

²⁷ጸባ ኣጣል ድማ ንምግብኻን ንምግቢ ስድራኻን ንቐለብ ኣግራድካን ኪኣክል እዩ።