Read መ/ቅዱስ ትግርኛ, Tigrigna Bible, 1997 መጽሓፍ ምሳሌ 28 Bible Online

መጽሓፍ ምሳሌ 28 - መ/ቅዱስ ትግርኛ, Tigrigna Bible, 1997 bible

መጽሓፍ ምሳሌ 28

¹ረሲኣን ዚሰጎም ዜብሎም ይሀፍሙ፡ ጻድቃን ግና ከም ሽደን ኣንበሳ ይተብዑ።

²ብሰሪ ኣበሳ ሃገርሲ ሓለቓታት ይበዝሑ፡ ብሳላ ኣስተውዓልን ጥበበኛን ሰብ ግና ህልዋታ ይነውሕ።

³ንመስኪን ዜጨንቕ ድኻስ፡ ከምቲ ደምሲሱ እንጌራ ዚኸልእ ዝናም እዩ።

⁴መፍረስቲ ሕጊ ንረሲኣን ይንእድዎም፡ ሓለውቲ ሕጊ ግና ይዋግእዎም።

⁵እኩያት ሰባትሲ ቅንዕና ኣየስተውዕሉን፡ እቶም ንእግዚኣብሄር ዚደልይዎ ግና ኲሉ የስተውዕሉ።

⁶ካብቲ ብጠዋይ መገዲ ዚኸይድ ሃብታምሲ፡ ብንጽህና ዚመላለስ ድኻ ይሐይሽ።

⁷ንሕጊ ዚሕልዎስ ኣስተውዓሊ ውሉድ እዩ፡ ምስ ሓሻሻት ዚመሐዞ ግና ነቦኡ የሕፍሮ።

⁸እቲ ብዘይ ግባእ ረብሓን ሓረጣን ገንዘብ ዜብዝሕ፡ ነቲ ንመሳኺን ዚርሕርሓሎም ይእክበሉ።

⁹እቲ ሕጊ ኸይሰምዕ ኢሉ እዝኑ ዚመልሽ፡ ጸሎቱ እኳ ፍንፋን እዩ።

¹⁰እቲ ንቕኑዓት ኣጋግዩ ናብ እኩይ መገዱ ዜእትዎም፡ ባዕሉ ኣብ ጒድጓድ ይወድቕ፡ እቶም ግጹማት ግና ሰናይ ኪወርሱ እዮም።

¹¹ሃብታም ሰብ ጥበበኛ ዝዀነ ይመስሎ፡ ግናኸ ኣእምሮ ዘለዎ ድኻ ይዕዘቦ።

¹²ጻድቃን እንተ ተዐወቱ፡ ዓብዪ ኽብሪ ይኸውን፡ ረሲኣን ልዕል እንተ በሉ ግና፡ ሰብ ይሕባእ።

¹³ገበኑ ዚኽውል ኣይሰልጦን፡ እቲ ዚናዘዘሉ እሞ ዚሐድጎ ግና ምሕረት ይረክብ።

¹⁴ኲሉ ጊዜ ዚፈርህ ሰብ ብጹእ እዩ፡ ልቡ ዜትርር ግና ኣብ መከራ ይወድቕ።

¹⁵ኣብ ድኻ ህዝቢ ዚገዝእ ረሲእ ከም ዚጓዝም ኣንበሳን ከም ጥሙይ ድብን እዩ።

¹⁶ኣእምሮ ዜብሉ መስፍን ብዙሕ ይገፍዕ፡ ንፍገት ዚጸልእ ግና መዓልትታቱ የንውሕ።

¹⁷ደም ነፍሲ ዝኸበዶ ሰብ ክሳዕ መቓብር ይሀድም፡ ሓደ እኳ ኣይዕገቶ።

¹⁸ብዘይ መንቅብ ዚመላለስ ይድሕን፡ ብጦዋይ መገዲ ዚኸይድ ግና ብኡብኡ ይወድቕ።

¹⁹ግራቱ ዚከናኸን እንጌራ ይጸግብ፡ ደድሕሪ ምናምን ዚስዕብ ግና ሽጋር ይጸግብ።

²⁰እሙን ሰብ ኣዝዩ ይባረኽ፡ እቲ ኺህብትም ኢሉ ዚህወኽ ግና ከይተቐጽዔ ኣይተርፍን።

²¹ኣድልዎ ሰናይ ኣይኰነን፡ ሰብ ምእንቲ ቚራስ እንጌራ ይብድል።

²²ክፋእ ዝዓይኑ ሰብ ኪህብትም ይቕልጥፍ፡ ሽጋር ከም ዚወርዶ ኸኣ ኣይፈልጥን።

²³ካብቲ ብልዙብ ልሳን ዜቀባጥርሲ፡ እቲ ንሰብ ዚግስጾ ደሓር ዝበለጸ ሞገስ ይረክብ።

²⁴እቲ ኻብ ኣቦኡን ኣዲኡን ዚሰርቕ እሞ፡ ሓጢኣት ኣይኰነን፡ ዚብል፡ ንሱ መሓዛ መጣፍኢ እዩ።

²⁵ረብሓ ዚሀርፍ ሰብ ባእሲ የልዕል። ብእግዚኣብሄር ዚእመን ግና ይጸግብ።

²⁶ብልቡ ዚእመን ዓሻ እዩ፡ ብጥበብ ዚመላለስ ግና የምልጥ።

²⁷ንድኻ ዚህብ ገለ ኣይጐድሎን፡ ነቲ ኣዕንቱ ዚዕምቶ ግና ብዙሕ መርገም ይወርዶ።

²⁸ረሲኣን ልዕል እንተ በሉ፡ ሰብ ይሕባእ፡ እንተ ጠፍኡ ግና፡ ጻድቃን ይዕምሩ።