Read መ/ቅዱስ ትግርኛ, Tigrigna Bible, 1997 ኦሪት ዘሌዋውያን 22 Bible Online

ኦሪት ዘሌዋውያን 22 - መ/ቅዱስ ትግርኛ, Tigrigna Bible, 1997 bible

ኦሪት ዘሌዋውያን 22

¹እግዚኣብሄር ድማ ንሙሴ ኸምዚ ኢሉ ተዛረቦ።

²ንኣሮንን ንደቁን፡ ካብቲ ደቂ እስራኤል ዚቕደሱለይ ቅዱስ ነገር ኪፍለዮን፡ ነቲ ቅዱስ ስመይ ከኣ ከየርክሱን ንገሮም። ኣነ እግዚኣብሄር እየ።

³ብዚመጽእ ወለዶኹም ዝኾነ ሰብ ካብ ኩሉ ዘርእኹም፡ ርኽሰቱ ኣብ ልዕሊኡ ኸሎ፡ ናብቲ ደቂ እስራኤል ንእግዚኣብሄር ዚቕድሱሉ ቅዱስ ነገር ዝቐረበ፡ እታ ነፍሲ እቲኣ ኻብ ቅድመይ ክትምንቆስ እያ በሎም። ኣነ እግዚኣብሄር እየ።

⁴ዝኾነ ሰብ ካብ ዘርኢ ኣሮን ለምጻም ወይ ዘርኡ ዚከዐዎ፡ ክሳዕ ዚነጽሕ ካብቲ ቅዱስ ነገር ኣይብላዕ። ብምውት ዝረኸሰ ዘበለ ነገር ዝተንከየ፡ ወይ ዘርኡ ኻብኡ ዝወጾ ሰብ፡

⁵ወይ ንዜርክሶ ዘበለ ለመምታ ዝተንከየ ሰብ፡ ወይ ዝኾነ ርኹሰት ብዘለዎ ሰብ ዝረኸሰ፡

⁶ነዚ ዝተንከየን ነፍሲ ኽሳዕ ምሸት ርኽስቲ ትኹን፡ ስጋኡ ብማይ ክሳዕ ዝሕጸብ ካብቲ ቅዱስ ነገር ኣይብላዕ።

⁷ጸሓይ ምስ ዐረበት ከኣ ይነጽህ፡ ድሕርቲ፡ ንሱ ምግቡ ኣዩ እሞ፡ ካብቲ ቅዱስ ነገር ይብላዕ።

⁸ብእኡ ኸይረክስሲ፡ ሕሉቕን ኣራዊት ዝቐተሎን ኣይብላዕ። ኣነ እግዚኣብሄር እየ።

⁹ብዛዕባኡ ሓጢኣት ከይጾሩ፡ እንተ ኣርከስዎ ድማ፡ ከሞቱ፡ ትእዛዘይ ይሐልው። ዝቕድሶም ኣነ ኣግዚኣብሄር እየ።

¹⁰ጓና ዘበለ ኻብቲ ቅዱስ ነገር ኣይብላዕ፡ ምስ ካህን ዚነብር ወይ ግዚኡ ኻብቲ ቅዱስ ነገር ኣይብላዕ።

¹¹እቲ ኻህን ብገንዘቡ ተሻይጡ ሰብ እንተ እጥረየ ግና፡ ንሱ ኻብኡ ይብላዕ፡ ኣብ ቤቱ እተወልደ ኸኣ ከምኡ፡ እዚኣቶም ካብቲ ኣንጌራኡ ይብልዑ።

¹²ጓል ካህን ድማ ሰበይቲ ጓና እንተ ኾነት፡ ካብቲ ናይ ቅዱስ ነገር ዚልዐል መስዋእቲ ኣይትብላዕ።

¹³ጓል ካህን ዘበለት እንተ ኾነት ወይ ፍትሕቲ፡ ውሉስ ዜብላ፡ ተመሊሳ፡ ከምቲ ብጓላ ኸላ፡ ኣብ ቤት ኣቦኣ እንተ ተቐመጠት፡ ካብ እንጌራ ኣቦኣ ትብላዕ። ጓና ዘበለ ግና ካብኡ ኣይብላዕ።

¹⁴ዝኾነ ሰብ ብዘይ ምፍላጥ ካብቲ ቅዱስ ነገር ኣንተ ብልዔ፡ ኣብ ልዕሊኡ ሓምሳይ ኣፍ ወሲኹ እቲ ቅዱስ ነገር ንኻህን ይሀቦ።

¹⁵ዝቕድሶም ኣነ ኣግዚኣብሄር እየ እሞ፡ ንሳቶም ካብቲ ዝቕድሶም ነገር ብምብላዖም በደል ዚኸኖም ክፍኣት ከይጸሩስ፡ ነቲ ደቂ እስራኤል ንእግዚኣብሄር ዚስውእዎ ቅዱስ ነገር ኣየርክሱ።

¹⁶ዝቕድሶም ኣነ ኣግዚኣብሄር እየ እሞ፡ ንሳቶም ካብቲ ዝቕድሶም ነገር ብምብላዖም በደል ዚኸኖም ክፍኣት ከይጸሩስ፡ ነቲ ደቂ እስራኤል ንእግዚኣብሄር ዚስውእዎ ቅዱስ ነገር ኣየርክሱ።

¹⁷እግዚኣብሄር ድማ ንሙሴ ኸምዚ ኢሉ ተዛረቦም፡

¹⁸ንኣሮንን ንደቁን ንኹሎም ደቂ እስራኤል ተዛረቦም በሎም ከኣ፡ ዝኾነ ሰብ ካብ ቤት እስራኤል ወይ ኣብ እስራኤል ካብ ዚነብር ጓና መስዋእቱ ዜቕርብ፡ መስዋእቲ መብጽዓ ኾነ ወይ መስዋእቲ ፍቓድ፡ ንእግዚኣብሄር ንዚሓርር መስዋእቲ ዜቕርብዎ፡

¹⁹ማንቲ ኺፍተወልኩም፡ ካብ ኣብዑር ኮነ ወይ ካብ ኣባጊዕ ወይ ካብ ኣጣል፡ ጎደሎ ዜብሉ ተባዕታይ ኣቕርቡ።

²⁰ጎደሎ ዘለዎ ዘበለ ግና ኣይፍተወልኩምን እዩ እሞ፡ ኣይተቕርብዎ።

²¹ዝኾነ ሰብ ድማ ብምፍጻም መብጽዓ ወይ መስዋእቲ ፍቓድ፡ ንእግዚኣብሄር መስዋእቲ ምስጋና፡ ካብ ማል ኮነ ውይ ካብ ጤለበጊዕ፡ ምስ ዜቕርብ፡ ምእንቲ ኺፍቶ ጎደሎ ዜብሉ ይኹን፡ ገለ እኳ ጎደሎ ኣይሀልዎ።

²²ዕውር ወይ ስቡአ ወይ ቁሩጽ ወይ ቁሱል ወይ ዐባቕ ወይ ሳሕራም፡ እዚ ንእግዚኣብሄር ኣይተቕርቡሉ። ካብ እዚኣቶም ንእግዚኣብሄር መስዋእቲ ሓዊ ኣብ ልዕሊ መሰውኢ ኣይትግበሩ ።

²³ብዕራይ ወይ በጊዕ ኣካሉ እንተ ነውሔ ወይ እንተ ሓጸረ፡ ንመስዋእቲ ፍቃድሲ ግበሮ፡ ንመስዋእቲ ምብጽዓ ግና ኣይፍትኖን እየ።

²⁴ብምጭፍላቕ ወይ ብምቕጥቃጥ ወይ ብምምላሕ ወይ ብምቑራጽ ዝሶረ ንእግዚኣብሄር ኣይተቕርቡሉ፡ ኣብ ሃገርኩምውን ኣይትግበርዎ።

²⁵እዚኣቶም ጉድኣት እዮም፡ ጎደሎ ኣለዎም እሞ፡ ካብ ኢድ ጓና ድማ ካብዚ ኹሉ እንጌራ ኣምላኽኩም ኣይትቕርቡ፡ ኣይፍተወልኩምን ኣዩ።

²⁶እግዚኣብሄር ድማ ንሙሴ ኸምዚ ኢሉ ተዛረቦ፡

²⁷ብተይ ወይ የት ወይ ማሕስእ ምስ ተወልደ፡ ሾብዓተ መዓልቲ ምስ ኣዲኡ ይጽናሕ፡ ካብ ሳምነይቲ መዓልቲ ንንየው ከኣኣ ንመስዋእቲ ሓዊ ንእግዚኣብሄር ፍትዊ እዩ።

²⁸ላም ኮነ ወይ በጊዕ ምስ ውላዳ ብሓንቲ መዓልቲ ኣይትሕረዱ።

²⁹መስዋኣቲ ምስጋና ንእግዚኣብሄር ምስ እትስውኡሉ፡ ከም ዚፍተወልኩም ጌርኩም ሰውእዎ።

³⁰በታ መዓልቲ እቲኣ ይበላዕ፡ ካብኣ ገለ እኳ ኽሳዕ ንጽብሒቱ ኣይትሕደጉ። ኣነ እግዚኣብሄር ኣየ።

³¹ትእዛዛተይ ድማ ሓልው፡ ግበርዎውን። ኣነ እግዚኣብሄር እየ።

³²ኣብ ማእክለ ደቂ እስራኤል ምእንቲ ኽቕደስሲ፡ ነቲ ቅዱስ ስመይ ኣይተርክስዎ። ዝቕድሰኩም ኣነ ኣግዚኣብሄር እየ።

³³ኣምላኽኩም ምእንቲ ክከውን፡ ካብ ምድሪ ግብጺ ዘውጻእኩኹም፡ ኣነ እግዚኣብሄር እየ።