Read መ/ቅዱስ ትግርኛ, Tigrigna Bible, 1997 ኦሪት ዘሌዋውያን 6 Bible Online

ኦሪት ዘሌዋውያን 6 - መ/ቅዱስ ትግርኛ, Tigrigna Bible, 1997 bible

ኦሪት ዘሌዋውያን 6

¹እግዚኣብሄር ድማ ንሙሴ ኸምዚ ኢሉ ተዛረቦ፡

²ሰብ ንእግዚኣብሄር በደል ብምብዳሉ ሓጢኣት እንተ ገብረ፡ ብጻዩ ዘንበረሉ ሕድሪ ብምጥላሙ፡ ወይ ኣብ ኢዱ ብዘትሓዞ፡ ወይ ገለ ብዝኸተሮ ወይ ብዝጸውዖ፡

³ወይ ገለ ጥፋእ ረኺቡ ኸሎ ኣሉ ኢሉ ብሓሶት ብምምሓሉ፡ ብሓደ ኻብ ዝኾነ ነገር ሰብ ሓጢኣት ብዝገበረሉ፡

⁴ይኸውን ድማ፡ ሓጢኣት ብምግባሩ በዳሊ ምስ ኮነ፡ ንሱ እቲ ኸትሪ ዝኸተሮ፡ ወይ እቲ ዓመጽ ዝዐመጾ ወይ ሕድሪ ዘንበረሉ፡ ወይ ጠፊኡ ዝረኸቦ፡

⁵ወይ ዝኾነ ነገር ሓስዩ ዝመሓለሉ ይምለሶ፡ ብምሉእ ይምለሶ፡ ኣብ ልዕሊኡ ኸኣ ሓምሻኡ ይወስኸሉ። በታ መስዋእቲ በደሉ ዜቕርበላ መዓልቲ ነቲ ዋናኡ ይምለሰሉ።

⁶ንመስዋእቲ በደል ድማ ካብ መጓሰ ኣባጊዕ ከም ገምጋምካ፡ ጎደሎ ዜብሉ ድዑል መስዋእቲ በደሉ ንእግዚኣብሄር፡ ናብ ካህን የምጽእ።

⁷እቲ ካብ ዝኾነ ዝገብሮ ድማ ብእኡ በዳሊ ዝኾነ፡ ኪሕደገሉ እዩ።

⁸እግዚኣብሄር ድማ ንሙሴ ኸምዚ ኢሉ ተዛረቦ፡

⁹ንኣሮንን ንደቁን ከምዚ ኢልካ ኣዝዞም፡ ሕጊ እቲ ዚሓርር መስዋኣቲ እዚ እዩ፡ እቲ ዚሐርር መስዋእቲ ኣብ ልዕሊ እቲ ኣብ መሰውኢ ዚነድድ መስዋእቲ ዕጨይቲ ምሉእ ለይቲ ኽሳዕ ዚወግሕ ይነብር፡ እቲ ሓዊ መሰውኢ ኸኣ ይንደድ።

¹⁰እቲ ኻህን ቀምሽ ልሕጺ እንጣጢዕ ይከደን፡ ኣብ ስጋኡ ድማ ስረ ልሕጺ እንጣጢዕ ይግበር። ነቲ ሓሙኹሽቲ ናይቲ ዚሓርር መስዋእቲ ኣብ መሰውኢ ሓዊ ዝበልዖ፡ ሓፊሱ ኣብ ጎቦ መሰውኢ ይግበሮ።

¹¹ደሓር ክዳውንቱ የውጽእ፡ ካልእ ክዳውንቲ ድማ ይከደን፡ ነቲ ሓሙኹስቲ ኸአ ካብቲ ሰፍር ናብ ጽሩይ ቦታ የውጽኣዩ።

¹²እቲ ኣብ መስውኢ ዘሎ ሓዊ ኣብኡ ይንደድ፡ ኣይጥፋእ። እቲ ኻህን ከኣ ኣብ ጸጽባሕ ኣብ ልዕሊኡ ዕጨይቲ የንድድ። ኣብ ልዕሊኡ ድማ ኣቲ ዚሓርር መስዋኣቲ ይግበር፡ ኣብ ልዕሊኡ ኸኣ ስብሒ መስዋኣቲ ምስጋና የሕርር።

¹³እቲ ሓዊ ወርትግ ኣብ ልዕሊ መሰውኢ ይንደድ፡ ኣይጥፋእ።

¹⁴ሕጊ መስዋእቲ ብልዒ ድማ እዚ እዩ፡ ደቂ ኣሮን ኣብ ቅድሚ እግዚኣብሄር ናብ ቅድሚ መሰውኢ የቕርብዎ።

¹⁵ካብኡ፡ ካብቲ ናይ መስዋእቲ ብልዒ ድኹም ሓርጭ ከኣ ኢዱ ምሉእ የልዕል ካብ ዘይቱ ድማ ምስቲ ኣብ ልዕሊ መስዋእቲ ብልዒ ዘሎ ኹሉ ዕጣን ገይሩ ንመዘከሪ፡ ንእግዚኣብሄር ጥዑም ጨና ኣብ መሰውኢ የሕርሮ።

¹⁶እቲ ኻብኡ ዝተረፈ ድማ ኣሮንን ደቁን ይብልዕዎ፡ ከይበኹዔ ኣብ ቅዱስ ቦታ ይበላዕ። ኣብ ኣጸድ ድንኳን ምርኻብ ኾይኖም ይብልዕዎ።

¹⁷ብማይ ርሑቕ ኣይሰንከት። እዚ ኻብቲ ብሓዊ እተገብረ መስዋእተይ ዝሀብክዎም ግዲኦም እዩ። ከም መስዋእቲ ሓጢኣትን ከም መስዋእቲ በደልን ቅዱስ ቅዱሳን እዩ።

¹⁸ካብ ደቂ ኣሮን ተባዕታይ ዝኾነ ኹሉ ይብልዓዮ። እዚ ኻብቲ ንእግዚኣብሄር ብሓዊ እተገብረ መስዋእትታት ንውሉድ ወለዶኹም ናይ ዘለኣለም መሰሎም ይኹን። ነፍስ ወከፍ ዝተንከዮ ይቀደስ።

¹⁹እግዚኣብሄር ድማ ንሙሴ ኸምዚ ኢሉ ተዛረቦ፡

²⁰ኣሮንን ደቁን በታ ዚቕብኣላ መዓልቲ ንእግዚኣብሄር ዜቕርብዎ መስዋእቲ እዚ እዩ፡ ንናይ ወርትግ መስዋእቲ ብልዒ ዓስራይ ኣፍ ኤፍ ድኹም ሓርጭ፡ ፈረቓኡ ብጊሓት፡ ፈረቓኡ ኸኣ ምሸት።

²¹ምስ ዘይቲ ኣብ መቕሎ ይሰንከት። ምስ ተቖምጥዒ ኸኣ ኣምጽኣዮ። ንእግዚኣብሄር ንጥዑም ጨና ብሱል ቁረርስ ጌርካ፡ መስዋእቲ ብልዒ ኣቕርበሉ።

²²እቲ ኻብ ደቁ ኣብ ስፍራኡ ዚቕባእ ካህን ድማ ከምኡ ይግበር። ንስርዓት ዘለኣለም ብምሉእ ንእግዚኣብሄር ይሕረር።

²³ኩሉ ናይ ካህን መስዋእቲ ብልዒ፡ ብምሉእ ይሕረር፡ ኣይበላዕ።

²⁴እግዚኣብሄር ድማ ንሙሴ ኸምዚ ኢሉ ተዛረቦ፡

²⁵ንኣሮንን ንደቁን ከምዚ ኢልካ ተዛረቦም፡ ሕጊ መስዋእቲ ሓጢኣት እዚ እዩ፡ እቲ መስዋእቲ ሓጢኣት ኣብታ ዚሓርር መስዋኣቲ ዚሕረደላ ቦታ፡ ኣብ ቅድሚ እግዚኣብሄር ይተሓረድ። ንሱ ቅዱስ ቅዱሳን እዩ።

²⁶እቲ ኻህን ብዛዕባ ሓጢኣት ዜቕርቦ፡ ይብልዓዮ። ኣብ ኣጸድ ድንኳን ምርኻብ ኣብ ቅዱስ ቦታ ኾንካ ሕጸቦ።

²⁷እቲ ዝበሰለሉ ቁራዕ ድማ ይሰበር፡ ኣብ ድስቲ ኣስራዚ እንተ በሰለ ኸአ፡ ይፈጉፈጉ ብማይውን ይተሓጸብ።

²⁸እቲ ዝበሰለሉ ቁራዕ ድማ ይሰበር፡ ኣብ ድስቲ ኣስራዚ እንተ በሰለ ኸአ፡ ይፈጉፈጉ ብማይውን ይተሓጸብ።

²⁹ነፍስ ወከፍ ተባዕታይ፡ ካህን ዝኾነ፡ ይብልዓዮ፡ ንሱ ቅዱስ ቅዱሳት እዩ።

³⁰መስዋእቲ ሓጢኣት ዘበለ ድማ፡ ካብ ደሙ ኣብ መቕደስ ንምትዕራቕ ናብ ድንኳን ምርኻብ ዚኣቱ፡ ብሓዊ ይንደድ እምበር ኣይብላዕ።