Read መ/ቅዱስ ትግርኛ, Tigrigna Bible, 1997 ትንቢት ሕዝቅኤል 1 Bible Online

ትንቢት ሕዝቅኤል 1 - መ/ቅዱስ ትግርኛ, Tigrigna Bible, 1997 bible

ትንቢት ሕዝቅኤል 1

¹ኰነ ድማ፡ ኣብ መበል ሰላሳ ዓመት፡ ኣብታ ራብዐይቲ ወርሒ፡ ካብታ ወርሒ ድማ ኣብ ሓምሰይቲ መዓልቲ፡ ኣብ ርባ ኬባር ኣብ ማእከል እቶም ምንሩኻት ከሎኹ፡ ሰማያት ተኸፍቱ፡ ራእይ እግዚኣብሄርውን ርኤኹ።

²ኣብ ሓምሳይ መዓልቲ ናይቲ ወርሒ ኻብቲ ንጉስ ዮኣቂን እተማረኸሉ ኣብ ሓምሳይ ዓመቱ፡

³ቃል እግዚኣብሄር ናብቲ ኻህን ህዝቅኤል ወዲ ቡዚ፡ ኣብ ሃገር ከለዳውያን፡ ኣብ ርባ ኬባር መጸ። ኣብኡ ኸኣ ኢድ እግዚኣብሄር ኣብ ልዕሊኡ ነበረት።

⁴እንሆ ኸኣ፡ ካብ ሰሜን ህቦብላ ንፋስ፡ ብርቱዕ ደበና ምስናይ ሃልሃልታ ሓዊ፡ ኣብ ዙርያኡ ኸኣ ጸዳል ብርሃን ኪመጽእ ከሎ ርኤኹ። ከም ፊሕፊሕ ዚብል ኣስራዚ ድማ ካብ ማእከሉ፡ ካብ ማእከል እቲ ሓዊ ወጸ።

⁵ካብቲ ማእከሉ ኸም መልክዕ ኣርባዕተ እንስሳ ወጸ። ትርኢቶም ድማ እዚ እዩ፡ ሰብ የምሰልስሉ።

⁶ነፍሲ ወከፎም ኣርባዕተ ገጽ፡ ነፍሲ ወከፎም ድማ ኣርባዕተ ኽንፊ ነበሮ።

⁷ኣእጋሮም ትኽ ዝበለ ኣእጋር ነበረ፡ ከብዲ እግሮም ከኣ ከም እግሪ ሸኾና ምራኽ ነበረ፡ ከም ርሱን ኣስራዚ ኸኣ ፊሕፊሕ ይብል ነበረ።

⁸በርባዕተ ወገኖም ኣብ ትሕቲ ኣኽናፎም ኢድ ሰብ ነበሮም፡ ኣርባዕቲኦም ገጽን ክንፍን ነበሮም።

⁹ኣኽናፎም ነንሓድሕደን ግጡማት እየን። ኪኸዱ ኸለዉ ኣይምለሱን፡ ነፍሲ ወከፍ ኣቕኒዑ ንቕድሚኡ ይኸይድ ነበረ።

¹⁰ምስሊ ገጾም ገጽ ሰብ ይመስል። ኣርባዕቲኦም ከኣ በቲ የማናይ ወገኖም ገጽ ኣንበሳ፡ ኣርባዕቲኦም ድማ በቲ ጸጋማይ ወገኖም ገጽ ብዕራይ፡ ኣርባዕቲኦምውን ገጽ ንስሪ ነበሮም።

¹¹ብላዕሊ ኸኣ ገጾምን ኣኽናፎምን ፍሉይ ነበረ። ናይ ነፍሲ ወከፍ ክልተ ክንፊ፡ እታ ሓንቲ ምስታ ናይቲ ሓደ እትላገብ፡ እተን ክልተ ድማ ንስጋኦም ዚኸድና እየን።

¹²ነፍሲ ወከፎም ኣቕኑዑ ንቕድሚኡ ይኸይድ፡ እቲ መንፈስ ናብ ዝኸዶ ይኸዱ፡ ኪኸዱ ኸለዉ ድማ ኣይምለሱን ነበሩ።

¹³ትርኢት እቶም እንስሳ ኸም ጒሁር ሓውን ከም ዚነድድ ሽግን ነበረ፡ እቲ ሓዊ ኸኣ ኣብ ማእከል እቶም እንስሳ ይዘውርን የንጸባርቕን ነበረ፡ ካብቲ ሓዊውን በርቂ ይወጽእ ነበረ።

¹⁴እቶም እንስሳ ኸኣ ከም በርቂ ይጐዩን ይምለሱን ነበሩ።

¹⁵እምበኣርሲ ነቶም እንስሳ ኽጥምት ከሎኹ፡ እንሆ፡ ሓደ መንኰርኰር ኣብ ምድሪ ኣብ ጥቓ እቶም እንስሳ ንነፍሲ ወከፍ በርባዕተ ገጾም ርኤኽዎም።

¹⁶ትርኢት እቲ መንኰራዂርን ኣስራርሓኡን ከም ሕብሪ በሪሎስ ነበረ። ኣርባዕቲኡ ይማሳሰል ነበረ። ትርኢቱን ኣስራርሓኡን ድማ እቲ ሓደ መንኰርኰር ኣብ ውሽጢ እቲ ሓደ መንኰርኰር ከም ዘሎ ይመስል ነበረ።

¹⁷ኪኸዱ ኸለዉ፡ በርባዕተ ወገኖም ይኸዱ፡ ምስ ዚኸዱ ድማ ኣይምለሱን ነበሩ።

¹⁸እቲ ኽቦም ከኣ ነዊሕን መፍርህን ነበረ። ኣርባዕቲኦም ድማ ኣብቲ ኣዝዋራ ኽቦም ኣዒንቲ መሊእዎም ነበረ።

¹⁹እቶም እንስሳ ኪኸዱ ኸለዉ፡ እቲ መንኰራዂር በብጥቓኦም ይኸይድ ነበረ። እቶም እንስሳ ኻብ ምድሪ ሓፍ ኪብሉ ኸለዉ፡ እቲ መንኰራዂር ከኣ ሓፍ ይብል ነበረ።

²⁰ናብቲ እቲ መንፈስ ዝኸዶ ንሳቶምውን ይኸዱ ነበሩ፡ መንፈስ እቶም እንስሳ ኣብቲ መንኰራዂር ነበረ እሞ፡ እቲ መንኰራዂር በብጥቓኦም ሓፍ ይብል ነበረ።

²¹መንፈስ እቶም እንስሳ ኣብቲ መንኰራዂር ስለ ዝነበረ፡ ንሳቶም ኪኸዱ ኸለዉ፡ ይኸይድ፡ ንሳቶም ደው ኪብሉ ኸለዉ፡ ደው ይብል፡ ንሳቶም ካብ ምድሪ ሓፍ ኪብሉ ኸለዉ፡ እቲ መንኰራዂር ከኣ በብጥቓኦም ሓፍ ይብል ነበረ።

²²ኣብ ልዕሊ ኣርእስ እቶም እንስሳ ኸኣ ከም ግሩም ዝዀነ ክሪስታል፡ ጠፈር ሰማይ ዚመስል፡ ኣብ ላዕሊ፡ ኣብ ልዕሊ ኣርእስቶም ተዘርጊሒ ነበረ።

²³ኣብ ትሕቲ እቲ ጠፈር ድማ ኣኽናፎም ኣብ መንጽር ነንሓድሕደን ትኽ ኢለን ነበራ። ነፍሲ ወከፎም ድማ ስጋኦም ዚኸድኑሉ ኸኽልተ ኽንፊ ነበሮም።

²⁴ኪኸዱ ኸለዉ ኸኣ፡ ደሃይ ኣኽናፎም ከም ህማም ብዙሕ ማያት፡ ከም ድምጺ እቲ ዂሉ ዚኽእማ፡ ደሃይ ታዕታዕ ከም ደሃይ ሰራዊት ሰማዕኩ። ደው ኪብሉ ኸለዉ ኣኽናፎም ይዕዂልሉ ነበሩ።

²⁵ካብ ልዕሊ እቲ ኣብ ልዕሊ ርእሶም ዝነበር ጠፈር ድማ ድምጺ ተሰምዔ። ደው ኪብሉ ኸለዉውን ኣኽናፎም ይዕዂልሉ ነበሩ።

²⁶ኣብ ልዕሊ እቲ ኣብ ልዕሊ ርእሶም ዝነበረ ጠፈር ከኣ እምኒ ሰፊሮስ ዚመስል ምስሊ ዝፋን ነበረ። ኣብ ልዕሊ እቲ ዝፋን ዚመስል ድማ ኣርኣያ ሰብ ዚመስል ተቐመጠ።

²⁷ካብቲ ሕቚኡ ዚመስል ሒዙ ንላዕሊ፡ ርሱን ኣስራዚ ዝሕብሩ፡ ከም ሓዊ ዝትርኢቱ ኣብ ውሽጥን ዙርያኡን ርኤኹ። ካብቲ ሕቚኡ ዚመስል ንታሕቲ ኸኣ ከም ሓዊ ዝትርኢቱ ርኤኹ፡ ኣብ ዙርያኡውን ባና ብርሃን ከቢብዎ ነበረ።

²⁸ከምቲ ብመዓልቲ ዝናም ኣብ ደበና ዚኸውን ትርኢት ቀስተ ደመና፡ ከምኡ ትርኢት ባና እቲ ብርሃን ኣብ ዙርያኡ ነበረ። ትርኢት ክብሪ እቲ ምስሊ እግዚኣብሄር ከምኡ ነበረ። ምስ ርኤኽዎ ኸኣ ብገጸይ ወደቕኩ፡ ድምጺ ሓደ ዚዛረብውን ሰማዕኩ።