Read መ/ቅዱስ ትግርኛ, Tigrigna Bible, 1997 ትንቢት ሕዝቅኤል 17 Bible Online

ትንቢት ሕዝቅኤል 17 - መ/ቅዱስ ትግርኛ, Tigrigna Bible, 1997 bible

ትንቢት ሕዝቅኤል 17

¹ከምዚ ዚብል ቃል እግዚኣብሄር ናባይ መጸ፡

²ኣታ ወዲ ሰብ። ንቤት እስራኤል ሕንቅሕንቅሊቶይ ንገሮም፡ ምስላውን መስለሎም።

³እግዚኣብሄር ኣምላኽ ከምዚ ይብል ኣሎ፡ ኢልካውን ተዛረብ፡ ገዚፍ ዘኽናፉ፡ ነዊሕ ዝመንገብገቡ፡ ዓንጥዓንጦራይ ክንቲት ዝመልኦ ዓብዪ ንስሪ ኣብ ሊባኖስ መጸ እሞ ርእሲ ጨንፈር እታ ኦም ጽሕዲ ወሰደ።

⁴ነቲ ርእሲ ጨንፈራ ሰልዖ፡ ናብ ሃገር ነግዲ ወሰዶ፡ ኣብ ከተማ ነጋዶ ኸኣ ኣንበሮ።

⁵ካብታ ሃገር ድማ ጫለዳ ወሰደ፡ ኣብ ፍርያም ግራት ከኣ ተኸላ፡ ኣብ ጥቓ ብዙሕ ማይ ድማ ከም ዕቦል ገይሩ ስፍራ ኣትሐዛ።

⁶ንሳ ዐበየት፡ ጨናፍራ ናብኡ ዘበለ፡ ሱራ ኸኣ ኣብ ትሕቲ ዝዀነ ሰፊሕ ዝሓረጋ፡ ሓጺር ዝጒንዳ ኦም ወይኒ ዀነት። በዚ ኸምዚ ጨንፈር እትጭንፍርን፡ ጠጥዒ እትጥጥዕን ኦም ወይኒ ዀነት።

⁷ገዚፍ ዝኽንፉ፡ ብዙሕ ዝኽንቲቱ ኻልእ ዓብዪ ንስሪ ነበረ። እንሃ ኸኣ፡ እዛ ኦም ወይኒ እዚኣ፡ ንሱ ማይ ኬስትያ ኢላ፡ ካብቲ እተተኽለቶ ቦታ ናብኡ ኣቢላ ሱር ዘርግሔት፡ ሓረጋ ድማ ናብኡ ኣቢላ ኣውፈረት።

⁸ጨናፍር ምእንቲ ኸተውጽእ፡ ፍረ ኸተፍሪ፡ ክብርቲ ኦም ወይኒውን ክትከውንሲ፡ ኣብ ጽቡቕ ግራት ኣብ ጥቓ ብዙሕ ማይ ተተኺላ ነበረት።

⁹በል ድማ፡ ክትልምዕዶ እያ ይብል እግዚኣብሄር ኣምላኽ። ምእንቲ ኽትነቅጽሲ ሱራዶ ኣይኪምንቈስን፡ ፍሪኣኸ ኣይኪቚረጽን እዩ እቲ ኻብኣ ዝጨብጨበ ዂሉ ቘጽልስ ኣይኪነቅጽን ድዩ ሱራ ንምምንቋስ ሓያል ቅልጽምን ብዙሕ ህዝብን ኣየድልን እዩ።

¹⁰እንሆ፡ ምትካልሲ ተተኺላ ኣላ፡ ክትልምዕዶ እሞ እያ ንፋስ ምብራቕ ምስ ተንከያስ፡ ሓሸውሸው ኢላዶ ኣይክትነቅጽን እያ ኣብታ ዝበቘለትላ ቦታ ኽትነቅጽ እያ።

¹¹ከምዚ ዚብል ቃል እግዚኣብሄር ከኣ መጸኒ፡

¹²እምበኣርሲ ነቲ ተጻራሪ ቤት፡ እዚ እንታይ ማለት ምዃኑዶ ኣይትፈልጡን ኢኹም በሎም። ንገሮም ከኣ፡ እንሆ፡ እቲ ንጉስ ባቢሎን ናብ የሩሳሌም መጸ፡ ንንጉሳን መሳፍንታን ሒዙ ናብኡ ናብ ባቢሎን ማረኾም።

¹³እታ መንግስቲ ኽትሐምቕ እሞ ከይትትንስእ፡ ብምሕላው ኪዳና ኸኣ ምእንቲ ኽትቀውምሲ፡ ካብ ዘርኢ ቤት መንግስቲ ወሲዱ ምስኡ ኺዳን ኣተወ ማሕላ ድማ ኣምሐሎ። ነቶም ኣውራታት እታ ሃገርውን ምስኡ ወሰዶም።

¹⁴እታ መንግስቲ ኽትሐምቕ እሞ ከይትትንስእ፡ ብምሕላው ኪዳና ኸኣ ምእንቲ ኽትቀውምሲ፡ ካብ ዘርኢ ቤት መንግስቲ ወሲዱ ምስኡ ኺዳን ኣተወ ማሕላ ድማ ኣምሐሎ። ነቶም ኣውራታት እታ ሃገርውን ምስኡ ወሰዶም።

¹⁵ግናኸ ንሱ ኻብኡ ዐለወ፡ ኣፍራስን ብዙሕ ህዝብን ኪህብዎ ልኡኻቱ ናብ ግብጺ ሰደደ። ኪሰልጦዶ እሞ እዩ ከምዚ ዝበለ ዚገብርሲ ኼምልጥዶ እዩ ጠላም ኪዳንከ የምልጥዶ እዩ

¹⁶ኣነ ህያው እየ፡ ይብል እግዚኣብሄር ኣምላኽ፡ ኣብታ እቲ ንእኡ ዘንገሶ ዚነብረላ ዘሎ ቦታ፡ ናይቲ ማሕላኡ ዝጠለመሉ፡ ኪዳን ዘፍረሰሉ ንጉስ፡ ምስኡ ዀይኑ፡ ኣብ ማእከል ባቢሎን ኣብኣ ኺመውት እዩ።

¹⁷ብዙሕ ሰብ ኪቐትሉ ኢሎም ዕርዲ ኺዐርዱን ግምቢ ኺሰርሑን ከለዉ፡ ፈርኦን ከኣ ምስቲ ብርቱዕ ሰራዊቱን ብዙሕ ህዝብን ኰይኑ ኣብ ውግእ ኣይኪረድኦን እዩ።

¹⁸ነቲ ኺዳን ብምፍራሱ ማሕላ ንዒቑ፡ ኢድ ጠቒዑስ እዚ ዂሉ ገይሩ እዩ እሞ፡ ኣይኬምልጥን እዩ።

¹⁹ስለዚ፡ ኣነ ህያው እየ፡ እቲ ዝነዐቖ ማሕላይን እቲ ዘፍረሶ ኺዳነይን ብርግጽ ናብ ርእሱ ኸውርደሉ እየ፡ ይብል እግዚኣብሄር ኣምላኽ።

²⁰መርበበይ ክዝርግሓሉ እየ፡ ብመፈንጠራይ ከኣ ኪተሐዝ እዩ፡ ናብ ባቢሎን ድማ ክወስዶ፡ ኣብኡውን በቲ ንኣይ ዝዐመጽሉ ዓመጻ ምስኡ ናብ ፍርዲ ኽኣቱ እየ።

²¹ኲሎም ህዱማቱ ምስ ኲሎም ጭፍራኡ ብሰይፊ ኺወድቁ፡ እቶም ዝተረፉ ኸኣ ኣብ ኲሉ ንፋሳት ኪዝረዉ እዮም። ኣነ እግዚኣብሄር ከም እተዛረብኩ ድማ ክትፈልጡ ኢኹም።

²²እግዚኣብሄር ኣምላኽ ከምዚ ይብል ኣሎ፡ ኣነ ኸኣ ካብ ርእሲ እቲ ነዊሕ ጽሕዲ ወሲደ ኸንብሮ እየ። ካብቲ ላዕላይ ጠጥዒ ሓንቲ ለውለው እትብል ሰሊዔ፡ ኣብ ክብ ዝበለ በሪኽ ከረን ክተኽላ እየ።

²³ኣብቲ በሪኽ ከረን እስራኤል ክተኽላ እየ። ክትጭንፍርን ክትፈርን፡ ግሩም ዝዀነት ጽሕዲውን ክትከውን እያ። ኲለን ኣዕዋፍን ክንፊ ዘለወን ዘበላን ኣብ ትሕቲኣ ኺነብራ፡ ኣብ ትሕቲ ጽላል ጨናፍራ ኺነብራ እየን።

²⁴ኲለን ኣእዋም መሮር ከኣ ነታ ነዋሕ ኦም ለጠቕ ዝበለት ኦም ከኣ ክብ ዘበልኩ፡ ነታ ልምዕቲ ኦም ዘንቀጽኩ፡ ነታ ንቕጽቲ ኦም ከኣ ዘጠጣዕኩ ኣነ እግዚኣብሄር ከም ዝዀንኩ ኺፈልጣ እየን። ኣነ እግዚኣብሄር ተዛሪበ ኣሎኹ፡ ክገብሮ ድማ እየ።