Read መ/ቅዱስ ትግርኛ, Tigrigna Bible, 1997 ትንቢት ሕዝቅኤል 21 Bible Online

ትንቢት ሕዝቅኤል 21 - መ/ቅዱስ ትግርኛ, Tigrigna Bible, 1997 bible

ትንቢት ሕዝቅኤል 21

¹ከምዚ ዚብል ቃል እግዚኣብሄር ድማ መጸኒ፡

²ኣታ ወዲ ሰብ፡ ገጽካ ናብ የሩሳሌም ኣቢልካ ምለስ፡ ቃልካ ኸኣ ናብቲ ቅዱስ ስፍራታት ኣንጠብጥብ፡ ንሃገር እስራኤል ከኣ ኣንጻር ተነበየሉ።

³ነታ ሃገር እስራኤል፡ እግዚኣብሄር ከምዚ ይብል ኣሎ፡ ኢልካ ንገራ፡ እኔኹ ኣንጻርኪ እየ፡ ሰይፈይ ከኣ ካብ ሰንገባኡ ኽመልሖ፡ ካባኺውን ጻድቃንን ረሲኣንን ከጥፍእ እየ።

⁴ንጻድቃንን ረሲኣንን ካባኺ ኸጥፍኦም እየ እሞ፡ ስለዚ ንዂሉ ስጋ ኺወቅዕ ካብ ደቡብ ክሳዕ ሰሜን ሰይፈይ ካብ ሰገባኡ ኺምላሕ እሮኡ።

⁵ስጋ ዘበሉ ዂሎም ከኣ፡ ኣነ እግዚኣብሄር ሰይፈይ ካብ ሰገባኡ ኸም ዝመላሕኩ፡ ኪፈልጡ እዮም፡ ኣይኪምለስን ድማ እዩ።

⁶ስለዚ ኣታ ወዲ ሰብ፡ ቈዝም፡ ብምስባር ሓቛቚኻ፡ ብመሪር ቃንዛ ኣብ ቅድሚ ኣዒንቶም ቈዝም።

⁷ኪኸውን ከኣ እዩ፡ እንታይ ኴንካ ትቚዝም ኢሎም እንተ ሐተቱኻ፡ ንስኻ፡ በቲ ዝመጽእ ወረ ዂሉ ልቢ ኺመክኽ፡ ኲለን ኣእዳው ድማ ወለል ኪብላ፡ ኲሉ መንፈስ ከኣ ኪሕለል፡ ኲሉ ኣብራኽውን ከም ማይ ኪፈስስ እዩ፡ ኢልካ ምለሰሎም። እንሆ፡ ይመጽእ ኣሎ፡ ኪፍጸም ድማ እዩ፡ ይብል እግዚኣብሄር ኣምላኽ።

⁸ከምዚ ዚብል ቃል እግዚኣብሄር ከኣ መጸኒ፡

⁹ኣታ ወዲ ሰብ፡ ተነበ በልውን፡ እግዚኣብሄር ከምዚ ይብል ኣሎ፡ ሰይፊ፡ ሰይፊ በሊሑን ተወልዊሉን ኣሎ፡ በል።

¹⁰ምእንቲ ኺሐርድ በሊሑ፡ ምእንቲ ማሕማሕ ኪብል ተወልዊሉ። እምበኣርሲ ብእኡዶ ኽንሕጐስ ኢና በትሪ ወደይ ንዂለን ኣዕጻው ትንዕቀን ኣላ።

¹¹ብኢድ ምእንቲ ኺተሐዝ፡ ኪውልውል ሀቦ። እቲ ሰይፊ ናብ ኢድ ቀታሊ ምእንቲ ኺውፈ፡ ተሳሕለን ተወልወለን።

¹²ኣታ ወዲ ሰብ፡ እዚ ኣብ ህዝበይን ኣብ ኲሎም መሳፍንቲ እስራኤልን ኪኸውን እዩ እሞ፡ ጨርሕ፡ ዋይዋይ ከኣ በል። ምስ ህዝበይ ንኣደዳ ሰይፊ ተዋሂቦም እዮም፡ ስለዚ ሰለፍካ ውቓዕ።

¹³ምዕዛብ መጸ፡ እታ እትንዕቕ በትሪ እኳ ኻብ ዘይትህሉስ፡ እንታይ ደኣ እዩ ይብል እግዚኣብሄር ኣምላኽ።

¹⁴ኣታ ወዲ ሰብ፡ ተነበ በእዳውካ ኸኣ ኣጣቕዕ። እቲ ሰይፊ ሰለስተ ጊዜ ይካዕበት፡ እቲ ሰይፊ ናይቶም ክሳዕ ሞት ዝቘሰሉ፡ እቲ ሰይፊ ናይቲ ኽሳዕ ሞት ዝቘሰለ ዓብዪ እዩ ናብ ቤቶም ዚኣቱ።

¹⁵ልቦም ምእንቲ ኺመክኽ፡ ዕንቅፋቶም ከኣ ኪበዝሕሲ፡ ኣንፊ ሰይፊ ናብ ኲሉ ኣፍደጌታቶም ኣቢለ ኣንበርኩ። ኣየ፡ ከም በርቂ መስመስ ይብል፡ ኪሐርዱሉ ኸኣ ተሳሒሉ ኣሎ።

¹⁶ስሕለትካ ናብ ዘበሎ ተዳሊኻ ንየማን ወይስ ንጸጋም ኪድ።

¹⁷ኣነ ድማ ኣእዳወይ ከጣቕዕ፡ ሃና ነድረይውን ከውጽእ እየ። ኣነ እግዚኣብሄር እየ ተዛሪበዮ ዘሎኹ።

¹⁸መሊሱውን ከምዚ ዚብል ቃል እግዚኣብሄር መጸኒ

¹⁹ኣታ ወዲ ሰብ፡ ሰይፊ ንጉስ ባቢሎን ዚሐልፈለን ክልተ መገዲ ንኣኻ ግበር፡ ክልቲኤን ካብ ሓደ ሃገር ይውጽኣ። መሓበርታ ኸኣ ግበር፡ ኣብ ርእሲ እታ ናይታ ኸተማ መገዲ ግበሮ።

²⁰ሰይፊ ናብ ራባት ናይ ደቂ ዓሞን፡ ናብ ይሁዳ ኸኣ ናብታ ዕርድቲ የሩሳሌም ኪመጽእስ፡ መገዲ ኽትገብር ኢኻ።

²¹እቲ ንጉስ ባቢሎን ምእንቲ ኺጥንቊል፡ ኣብታ ቓራና መገዲ፡ ኣብ ርእሲ ኽልቲኤን መገዲ ደው ኢሉ ኣሎ፡ ፍላጻታት የነኒ፡ ንጣኦታት ቤቱ ይጥይቕ፡ ከብዲ ይጥምት ኣሎ።

²²ኣብኡ መፍረስ ዕርዲ ኺተክል፡ ንዘመራ ውግእ ኣፉ ኪኸፍት፡ ንሆይታ ውግእ ዓው ኢሉ ኺጭድር፡ ኣብ መንጽር ደጌታት ከኣ መፍረስ ዕርዲ ኼቕውም፡ ሓመድ ኲዒቱውን ዕርዲ ኺነድቕሲ፡ ኣብ የማነይቱ ናብ የሩሳሌም እተመልክት ዕጭ ኣላቶ።

²³ማሕላ ምሒሎም ክነሶምሲ፡ እዚ ጠንቈላ እዚ ሓሶት ኰይኑ ኺረኣዮም እዩ። ንሱ ግና፡ ምእንቲ ኺትሐዙ፡ ኣበሳኦም ኬዘክር እዩ።

²⁴ስለዚ እግዚኣብሄር ኣምላኽ፡ ገበንኩም ተቐሊዑ፡ ሓጢኣትኩም ብዂሉ ግብርኩም ብምርኣዩ፡ ኣበሳኹም ስለ ዘዘከረኩም፡ ዝኽርኹም ተዘኪሩ እዩ እሞ፡ ስለዚ ብሓያል ኢድ ክትተሐዙ ኢኹም፡ ይብል ኣሎ።

²⁵ኣታ በዚ ኣበሳ ዚፍጸመሉ ጊዜ መዓልትኻ ዝበጽሔ ርኹስ ረስእ መስፍን እስራኤል፡

²⁶እግዚኣብሄር ኣምላኽ ከምዚ ይብል ኣሎ፡ ዘውዲ ቐንጥጥ፡ ኣኽሊል ኣውጽእ። እዝስ ከምዚ ዘለዎ ዀይኑ ኣይኪነብርን እዩ። እቲ እተዋረደ ልዕል ይበል፡ እቲ ልዕል ዝበለ ኸኣ ይዋረድ።

²⁷ጥፍኣት፡ ጥፍኣት፡ ጥፍኣት ካባይ ኪመጻ እዩ። እቲ ኣነ ንእኡ ዝህቦ ብዓል ፍርዲ ኽሳዕ ዚመጽእ፡ እዚ ኸኣ ኣይኪነግርን እዩ።

²⁸ንስኻ ድማ፡ ኣታ ወዲ ሰብ፡ ተነበ፡ እግዚኣብሄር ኣምላኽ ብዛዕባ ደቂ ዓሞንን ብዛዕባ ጸርፎምን ከምዚ ይብል ኣሎ፡ ኢልካ ንገር በልውን፡ ኣብ ልዕሊ ኽሳድ እቶም በዚ ኣበሳ ዚፍጸመሉ ጊዜ መዓልቶም ዝበጽሔ ቕቱላት ረሲኣን ኼንብሩኽስ፡ ከንቱነት ኪርእዩልኪ፡ ጠንቈላ ሓሶት ከኣ ኪናገሩልኪ ኸለዉ፡ ሰይፊ፡ ሰይፊ ተመሊሑ ኣሎ። ኪሐርድን ኪጐምምን መስመስ ኪብልን ተወልዊሉ ኣሎ።

²⁹ንስኻ ድማ፡ ኣታ ወዲ ሰብ፡ ተነበ፡ እግዚኣብሄር ኣምላኽ ብዛዕባ ደቂ ዓሞንን ብዛዕባ ጸርፎምን ከምዚ ይብል ኣሎ፡ ኢልካ ንገር በልውን፡ ኣብ ልዕሊ ኽሳድ እቶም በዚ ኣበሳ ዚፍጸመሉ ጊዜ መዓልቶም ዝበጽሔ ቕቱላት ረሲኣን ኼንብሩኽስ፡ ከንቱነት ኪርእዩልኪ፡ ጠንቈላ ሓሶት ከኣ ኪናገሩልኪ ኸለዉ፡ ሰይፊ፡ ሰይፊ ተመሊሑ ኣሎ። ኪሐርድን ኪጐምምን መስመስ ኪብልን ተወልዊሉ ኣሎ።

³⁰ናብ ሰገባኡ ኽተቶ። ኣብታ እተፈጠርካላ ቦታ፡ ኣብታ እተወለድካላ ሃገር ክፈርደካ እየ።

³¹ኲራይ ኣብ ልዕሌኻ ክኽዕዎ፡ ሓዊ ነድረይ ድማ ኡፍ ክብለልካ፡ ናብ ኢድ እቶም ከም ኣራዊት ዝበሉ፡ ምጥፋእ ዝተግበሮም ሰባት ክውፍየካ እየ።

³²ብልዒ ሓዊ ኽትከውን ኢኻ፡ ደምካ ኣብ ማእከል ሃገር ኪክዖ እዩ። ኣነ እግዚኣብሄር ተዛሪበ እየ እሞ፡ ዚዝክረካ የልቦን።